უკრაინის სამხრეთის საპორტო ქალაქ ოდესაში ვიზიტის დროს გერმანიის თავდაცვის მინისტრმა ბორის პისტორიუსმა უკრაინისთვის 500 მილიონი ევროს ღირებულების სამხედრო დახმარების შესახებ განაცხადა.
პისტორიუსის თქმით, უკრაინა ზეწოლის ქვეშაა, რადგან რუსული ძალები ყველაფერს აკეთებენ იმისათვის, რომ რაც შეიძლება მეტად გაწელონ ფრონტის ხაზი და ბრძოლაში ჩაითრიონ უკრაინელი სამხედროები. ამ მხრივ რუსულმა ძალებმა გარკვეულ წარმატებას მიაღწიეს, თუმცა მნიშვნელოვანი წინსვლა ჯერ მაინც არ აქვთ.
მიმდინარე თვეს რუსული ძალების მიერ ხარკივის რეგიონზე განახლებული შეტევის ფონზე ფრონტის ხაზზე მყოფ უკრაინელ სამხედროებს კვლავ საბრძოლო მასალის დეფიციტი აქვთ.
რუსეთმა გარკვეულ ტერიტორიებზე წინ წაიწია. უკრაინას კი ამერიკის შეერთებული შტატებიდან სამხედრო დახმარების დაგვიანებისა და დასავლეთ ევროპის არაადეკვატური სამხედრო წარმოების გამო უჭირს მოსკოვის ძალების შეჩერება. ამ პროცესებმა მნიშვნელოვნად შეაფერხა შეიარაღების მიწოდება ბრძოლის ველზე.
თავის ყოველდღიურ მიმართვაში უკრაინის პრეზიდენტმა ვოლოდიმირ ზელენსკიმ განაცხადა, რომ პარტნიორებთან იგეგმება ახალი შეთანხმებების გაფორმება საჰაერო თავდაცვის სისტემებსა და დრონების წარმოებასთან დაკავშირებით.
New security agreements for Ukraine provide more strength and opportunities for protecting our people. Three more robust documents enshrining long-term support for our people were signed with Spain, Belgium, and Portugal.
Cooperation in defense, clear support for Ukraine's EU… pic.twitter.com/HJN0GFndfN
— Volodymyr Zelenskyy / Володимир Зеленський (@ZelenskyyUa) May 30, 2024
მათ უკვე გამოთქვეს მზაობა, რომ გააძლიერებენ უკრაინის საჰაერო თავდაცვის შესაძლებლობებს. პრეზიდენტის თქმით, ახლა მთავარია მათი სრულად განხორციელება და უფრო მეტი შეთანხმება.
ამავდროულად, 30 მაისს პრეზიდენტმა ჯო ბაიდენმა კიევს დართო ნება, მხოლოდ ხარკივის დასაცავად გამოიყენოს ამერიკული შეიარაღება რუსეთის ტერიტორიაზე არსებულ სამხედრო სამიზნეებზე.
