რუსეთის საოკუპაციო ძალებმა უკრაინაში ხმელნიცკის ოლქზე უპილოტო საფრენი აპარატებით მიიტანეს იერიში. უკრაინის პრეზიდენტის თქმით, რუსების სამიზნე ხმელნიცკის ოლქში არსებული ატომური ელექტროსადგური იყო. როგორც უკრაინის შეიარაღებული ძალები იუწყებიან, ირანული დრონებით იერიში მოიგერიეს, თუმცა ნამსხვრევების გამო მშვიდობიან მოსახლეობას მიადგა ზიანი. ოფიციალური ინფორმაციით, რუსული იერიშის შედეგად 11 მრავალბინიანი საცხოვრებელი, 9 კერძო სახლი, 2 სკოლა და სახანძრო სამაშველო დანაყოფების ინფრასტრუქტურა დაზიანდა.
ამავდროულად, სასტიკი ბრძოლები გრძელდება დონეცკის ჩრდილოეთში, დასახლება ავდიივკასთან, სადაც ბოლო რამდენიმე კვირის განმავლობაში რუსული იერიში არ წყდება
„ბახმუტის ფლანგზე უკრაინელმა სამხედროებმა დასახლებულ პუნქტებთან – კლიშჩიივკასა და ანდრიივკასთან მოწინააღმდეგის 10 იერიში მოიგერიეს. ამავდროულად, ფრონტის ამ მიმართულებაზე უკრაინის დამცველები კვლავ აგრძელებენ შეტევას. რაც შეეხება ოპერატიულ ტაქტიკური დაჯგუფება „ტავრიის“ მიმართულებას, ავდიივკის ფლანგზე მოწინააღმდეგე კვლავ ცდილობს ამ დასახლების ალყაში მოქცევას. ოკუპანტები აქტიურად იყენებენ ავიაციას, თუმცა უშედეგოდ. რუსებს დიდი სამხედრო დანაკარგი აქვთ. ფრონტის ამ მიმართულებაზე მოწინააღმდეგის 15 იერიში მოვიგერიეთ“, – აცხადებს უკრაინის შეიარაღებული ძალების პრესსპიკერი ანდრიი კოვალოვი.
სოციალურ ქსელში ვრცელდება ინფორმაცია, რომ ლუჰანსკის ოლქში, რუსეთის მიერ ოკუპირებულ ტერიტორიაზე, რამდენიმე აფეთქება მოხდა. ოფიციალურად ჯერ არ დადასტურებულა, თუ რამ გამოიწვია ეს აფეთქებები. უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინული არმიის მიერ ორ აეროდრომზე „ატაკამსებით“ მიტანილი იერიშების შემდეგ რუსულ არმიაში ძალების გადაჯგუფებაა დაწყებული.
„მას შემდეგ, რაც ჩვენმა არმიამ ბერდიანსკისა და ლუჰანსკის აეროდრომებს დაარტყა, ოკუპანტებს საკუთარი ავიაცია შორს გადაჰყავს. კონკრეტულად კი ჩვენი ყირიმიდან გაჰყავთ. ეს კარგი ნიშანია. ჯერ რუსული ფლოტი გაიქცა, ახლა კი რუსული ავიაცია გარბის. რუსებისთვის კარგია, რომ გაქცევა შეუძლიათ. იმიტომ, რომ მათ საბოლოოდ ჩვენი ტერიტორიის დატოვება მოუწევთ“, – აღნიშნავს ვოლოდიმირ ზელენსკი.
“ომის შემსწავლელი ინსტიტუტის” ინფორმაციით, უკრაინა შემოდგომა-ზამთრის პერიოდში ახალი რუსული იერიშების მოსაგერიებლად ემზადება. ამ დროისთვის კი ფრონტის ხაზზე ყველაზე აქტიური საბრძოლო დაპირისპირებები დონეცკის ოლქშია. როგორც უკრაინის შეიარაღებული ძალების პრესსპიკერი იუწყება, ერთ დღეში საბრძოლო მოქმედებების შედეგად რუსმა სამხედროებმა დაკარგეს 810 ჯარისკაცი, 29 ტანკი, 18 ჯავშანმანქანა, 30 ერთეული საარტილერიო საშუალება და 17 უპილოტო საფრენი აპარატი.
Search
