ჩრდილოეთ კოსოვოში ნატოს სამშვიდობო ძალებმა უსაფრთხოების ზომები გააძლიერეს მერიის შენობის წინ, იმ ადგილას, სადაც გასულ კვირას შეტაკებების დროს 80-ამდე ადამიანი დაშავდა.
ოთხშაბათს, უკვე მესამედ, ასობით ეთნიკურად სერბი შეიკრიბა ზვეჩანის მერიის შენობის წინ. ისინი ჩრდილოეთ კოსოვოდან პოლიციის სპეციალური დანაყოფების გაყვანასა და მერიაში არჩეული ეთნიკურად ალბანელი ოფიციალური პირების გადაყენებას მოითხოვენ. როგორც ცნობილია, სერბებმა ბოლო არჩევნებს ბოიკოტი გამოუცხადეს.
აქციის მონაწილეებმა მერიის შენობის წინ სერბეთის უზარმაზარი, თითქმის 200-მეტრიანი დროშა გაშალეს.
ვითარების განმუხტვას საერთაშორისო საზოგადოება ცდილობს. ევროკავშირის ოფიციალური პირები უკვე შეხვდნენ სერბეთის პრეზიდენტს ალექსანდარ ვუჩიჩს.
პარალელურად, ევროკავშირის ოფიციალურ პირებთან მოლაპარაკებებს მართავს კოსოვოს პრემიერ-მინისტრი ალბინ კურტიც.
საერთაშორისო საზოგადოება შიშობს, რომ დაძაბულობა და არეულობა კონფლიქტს განაახლებს.
ნატო ადგილზე დამატებით 700 სამხედროს გზავნის. ამავდროულად, გერმანიის მთავრობის სპიკერი აცხადებს, რომ გერმანიის კანცლერი ოლაფ შოლცი და საფრანგეთის პრეზიდენტი ემანუელ მაკრონი დღეს კოსოვოსა და სერბეთის ლიდერებს შეხვდებიან.
