ხერსონის რეგიონში, ოკუპანტებისგან ახლად გათავისუფლებულ სოფელ ვისოკოპილიაში, ადგილობრივები პატივს მიაგებენ გარდაცვლილთა ხსოვნას და ცდილობენ, საჭირო ნივთები შეაგროვონ. აქ ყველგან იგრძნობა ნგრევისა და ბრძოლის კვალი. ერთ-ერთ ადგილობრივს, ვოლოდიმირს, ცრემლი ადგება, როცა თავის გარდაცვლილ მეზობლებს იხსენებს.
ვოლოდიმირმა ჟურნალისტებს თავისი მეზობლების საფლავები აჩვენა. იგი ჰყვება, რომ ერთ-ერთი მათგანი აგურის ქარხანაში დახვრიტეს, ერთი კი საკუთარ საწოლში მოკლეს.
დაბომბვის შიშის მიუხედავად, მოსახლეობა ნელ-ნელა უკან ბრუნდება. მათ სურთ, აღადგინონ თავიანთი დანგრეული სახლები. ეს ერთ-ერთი პირველი სოფელია, რომელიც უკრაინელთა კონტრშეტევის შედეგად გათავისუფლდა. ომამდე აქ 4000 მოსახლე იყო. ადგილობრივების ინფორმაციით, ოკუპაციის პირობებში 13 ადამიანი დაიღუპა. მათგან სამი კი რუსმა სამხედროებმა დახოცეს.
ერთ-ერთი ადგილობრივი ამბობს, რომ მისმა ოთხი წლის ქალიშვილმაც კი იცის, რა არის გრადი, ურაგანი, ტანკი და ნაღმმტყორცნი.
ოკუპაციამ იზიუმის მცხოვრებლებს დიდი ტრავმა მიაყენა. იზიუმის შემოგარენსა და ხარკივის ჩრდილო-აღმოსავლეთის ტყეებში ჯერ ისევ პოულობენ საფლავებს. ქალაქი საგრძნობლად დაზარლდა და თითქმის ყველაფერი დანგრეულია. მცხოვრებლები იმ შიშზე საუბრობენ, რომელსაც ისინი მრავალთვიანი ოკუპაციის პირობებში განიცდიდნენ.
