რუსეთის მიერ უკრაინის ქალაქ ზაპორიჟიაზე იერიშს ერთი ადამიანის სიცოცხლე ემსხვერპლა, შვიდი კი დაშავდა. ამის შესახებ ადგილობრივი ხელისუფლება იუწყება.
დარტყმის შედეგად დაზიანდა საცხოვრებელი სახლები, ავტომობილები და ქალაქის სხვადასხვა ინფრასტრუქტურული ობიექტი. თავდასხმის შემდეგ უკრაინის საგანგებო სიტუაციების სამსახურის წარმომადგენლები შემთხვევის ადგილებზე მაშინვე მივიდნენ და სამაშველო სამუშაოები დაიწყეს.
კადრებში ჩანს დაზიანებული შენობები, ჩამსხვრეული ფანჯრები და ნანგრევებით დაფარული ქუჩები. მაშველები ნანგრევებს შორის დაზარალებულებს ეძებდნენ და დაზიანებული ტერიტორიების გაწმენდას ცდილობდნენ.
უკრაინის საგანგებო სიტუაციების სამსახურის ინფორმაციით, ოპერაცია რთულ პირობებში მიმდინარეობს. ქალაქზე განმეორებითი დარტყმების საფრთხის გამო მაშველებს სამუშაოების შეჩერება რამდენჯერმე მოუწიათ.
ზაპორიჟია, რომელიც ფრონტის ხაზთან შედარებით ახლოს მდებარეობს, რუსეთის საჰაერო თავდასხმების ერთ-ერთ მთავარ სამიზნედ რჩება. ბოლო თვეების განმავლობაში ქალაქსა და მის შემოგარენში იერიშები გახშირდა, რის გამოც ადგილობრივი მოსახლეობა მუდმივი საფრთხის პირობებში ცხოვრობს.
უკრაინული მხარე აცხადებს, რომ რუსეთი სამოქალაქო ინფრასტრუქტურაზე თავდასხმებს აგრძელებს. მოსკოვი ამტკიცებს, რომ ის მხოლოდ სამხედრო ობიექტებს უტევს.