დონალდ ტრამპი ამბობს, რომ თეირანთან მოლაპარაკებებს აწარმოებს და რომ ირანში რეჟიმი ფაქტობრივად შეიცვალა. მისივე განმარტებით, ახალი ლიდერები, რომლებმაც ლიკვიდირებული ხელმძღვანელები ჩაანაცვლეს, ძველებისგან ძალიან განსხვავდებიან.
თეირანში ამერიკის შეერთებულ შტატებთან მოლაპარაკებებს სულაც უარყოფენ.
განცხადებები ამერიკის შეერთებული შტატების პრეზიდენტმა ოვალურ ოფისში გააკეთა. მანვე უპასუხა კითხვას იმის შესახებ, აპირებს თუ არა მისი წარმომადგენლების, ჯარედ კუშნერისა და სტივ უიტკოფის, გაგზავნას ირანთან პირდაპირ მოლაპარაკებებში.
„როგორც აღმოჩნდა, ჩვენ მოლაპარაკებების პროცესში ვართ. და ახლა ხედავთ, რომ რაც გუშინ ვთქვი — სიმართლე იყო. მოლაპარაკებები მიმდინარეობს. ამას მათთან ერთად აკეთებენ მარკო რუბიო, ჯეი დი ვენსი. ბევრია ადამიანი ჩართული. მეორე მხარეზე შემიძლია გითხრათ, რომ შეთანხმება უნდათ. ვის არ ენდომებოდა ეს მათ ადგილზე?
ამის თქმა არ მინდა, მაგრამ ჩვენ მათი მთელი ხელმძღვანელობა დავხოცეთ. შემდეგ ახალი ლიდერის ასარჩევად შეიკრიბნენ და მათც კი მოვკალით. ახლა ახალი ჯგუფი ჰყავთ და იმავეს გაკეთება მარტივად შეგვიძლია. მაგრამ ვნახოთ, როგორები გამოდგებიან. ფაქტობრივად ეს რეჟიმის ცვლილებაა. დიახ, ასეა, რადგან ლიდერები სრულიად განსხვავებულები არიან მათგან, ვინც იყო და ვინც ეს პრობლემები შექმნა“, — თქვა დონალდ ტრამპმა.
დონალდ ტრამპს ჰკითხეს, თუ რატომ ენდობა მათ, ვისთანაც, მისივე თქმით, მოლაპარაკებებს აწარმოებს. პრეზიდენტი აცხადებს, რომ არავის ენდობა, თუმცა გარემოებები მიანიშნებს, რომ ისინი ვაშინგტონთან აუცილებლად შეთანხმდებიან.
„ისინი შეთანხმებას დადებენ. გუშინ მათ საოცარი რამ გააკეთეს. საჩუქარი მოგვცეს. იგი დღეს მივიღეთ. ძალიან დიდი საჩუქარია, უზარმაზარი ღირებულების. არ გეტყვით, რა არის, მაგრამ ძალიან მნიშვნელოვანი ჯილდოა და ეს მათ გამოგვიგზავნეს. თქვეს, რომ ამას გააკეთებდნენ. ეს ნიშნავს, რომ საქმე სწორი ადამიანების ხელშია.“
დონალდ ტრამპმა თქვა ისიც, რომ ეს „საჩუქარი“ ჰორმუზის სრუტეს ეხება და ნავთობსა და გაზს უკავშირდება.
ამერიკის შეერთებული შტატების პრეზიდენტის მიერ ბოლო დღეებში მოლაპარაკებებთან დაკავშირებით გაკეთებულ განცხადებებს თეირანი ირონიით შეხვდა.
„თქვენი შიდა კონფლიქტები იმ დრომდე მივიდა, რომ საკუთარ თავთან აწარმოებთ მოლაპარაკებებს? ჩვენ ამას მკაფიოდ ვაცხადებთ: სანამ ჩვენი ნება არ იქნება, არაფერი დაბრუნდება ძველ მდგომარეობაში. ეს მხოლოდ მაშინ მოხდება, როცა ირანელი ხალხის წინააღმდეგ მოქმედების—even იდეაც—სრულად გაქრება თქვენი ბინძური გონებიდან“, — განაცხადა ირანის ესლამური რევოლუციის გუშაგთა კორპუსის (ხათამ ალ-ანბიას ცენტრალური შტაბის) პრესსპიკერმა იბრაჰიმ ზოლფაღარიმ.