მარია ტადეო, ევრონიუსი: „სალვადორის ვიცე-პრეზიდენტ ფელიქს ულოას, როგორც წესი, ვერ შეხვდებით ბრიუსელში, ევროპის დედაქალაქში. ამიტომ პირდაპირ ასეთი კითხვით მივმართავ: რა გეგმები გაქვთ? როგორია თქვენი დღის წესრიგი?“
ფელიქს ულოა, სალვადორის ვიცე-პრეზიდენტი:
„დიდი მადლობა, რომ მომიწვიეთ და მომეცით საშუალება, ვესაუბრო ევროპულ საზოგადოებას. მართლაც, ბოლოს აქ 2022 წელს ვიყავი. მაშინ სალვადორი გარდამავალ ეტაპზე იყო. ახლა უკვე დარწმუნდით, რომ დროა, საერთაშორისო საზოგადოებას წარვუდგინო სრულიად ახალი ქვეყანა, რომელსაც ახლა ვაშენებთ, ქვეყანა, რომელიც სავსეა შესაძლებლობებით. მინდა, განვუცხადო ევროპელებსა და მთელ მსოფლიოს, რომელიც გვიყურებს, რომ ეს არის ახალი სალვადორი, რომ ამ ქვეყანაში ინვესტირების უამრავი შესაძლებლობაა“.
მარია ტადეო, ევრონიუსი: „თქვენ ევროპარლამენტის კონსერვატორებისა და რეფორმისტების იმ ჯგუფის მოწვევითაც ჩამობრძანდით, რომელიც მემარჯვენეობისკენ იხრება. მათთან იდეოლოგიური თანხვედრა გაქვთ?“
ფელიქს ულოა, სალვადორის ვიცე-პრეზიდენტი: „საქმე ისაა, რომ, როდესაც ახსენებთ ისეთ კონცეფციას, როგორიცაა მემეარჯვენე ფრთა, ეს, ცოტა არ იყოს, ანაქრონიზმს ჰგავს, რომელიც 21-ე საუკუნეში მოძველებული ჩანს - ამაზე აღარავინ საუბრობს.“
მარია ტადეო, ევრონიუსი: „მემარჯვენე და მემარცხენე აღარ არსებობს?“
ფელიქს ულოა, სალვადორის ვიცე-პრეზიდენტი: „არა, მსოფლიო აღარ იმართება მსგავსი მიდგომით. დღევანდელ მსოფლიოს სპეციფიკური დღის წესრიგის მიხედვით მართავენ. ასეთია, მაგალითად, გარემოს დაცვა. ვის არ აღელვებს ახლა ეს საკითხი, როცა ანთროპოცენურ ეპოქაში ვცხოვრობთ? ყველას. რატომ? იმიტომ, რომ ყველა ვთანხმდებით, რომ არ არსებობს მეორე პლანეტა დედამიწა. უნდა მივხედოთ ჩვენს პლანეტას“.
მარია ტადეო, ევრონიუსი: „ზოგი შეგეკამათებოდათ, და მათ შორის პრეზიდენტიც ალბათ, რომ ამ იდეის უკან იდეოლოგია დგას, თანაც ძალიან გამოკვეთილი. თუმცა ვთანხმდებით, რომ პრეზიდენტი ბუკელე არ არის კლაუდია შეინბაუმი (იგულისხმება კლაუდია შეინბაუმ პედრო), არა?“
ფელიქს ულოა, სალვადორის ვიცე-პრეზიდენტი: „არც კლაუდია შეინბაუმია და არც პედრო სანჩესი - ესპანეთის პრეზიდენტი. არცერთს არ ჰგავს“.
მარია ტადეო, ევრონიუსი: „იგი თავის თავს პროგრესულ მტკიცე მემარცხენეს უწოდებს, ამიტომ გკითხეთ“.
ფელიქს ულოა, სალვადორის ვიცე-პრეზიდენტი: „მაინც რას ნიშნავს, იყო პროგრესული ახლა? რომ გქონდეს ე.წ. ვოუქის დღის წესრიგი? ეს არის პროგრესულობა?“
მარია ტადეო, ევრონიუსი: „მაგრამ ვოუქიზმი არსებობს?“
ფელიქს ულოა, სალვადორის ვიცე-პრეზიდენტი: „მისი დღის წესრიგი არსებობს.“
მარია ტადეო, ევრონიუსი: „მემარჯვენე და მემერცხენე იდეოლოგიებს შორის კიდევ რაიმე მკაფიო იდეოლოგია არ ჩანს“.
ფელიქს ულოა, სალვადორის ვიცე-პრეზიდენტი: „მაგრამ „ვოუქიზმი“ არსებობს. „ბუკელიზმიც“ არსებობს და კიდევ ბევრი სხვა რამ.“
მარია ტადეო, ევრონიუსი: „ბუკელიზმი რას ნიშნავს?“
ფელიქს ულოა, სალვადორის ვიცე-პრეზიდენტი: „ეს არის სალვადორის მოდელი, რომელიც სალვადორის პრეზიდენტმა ბუკელემ შექმნა და რომელიც მისაბაძი მაგალითია ამ რეგიონის ყველა ქვეყნისთვის და სხვა ქვეყნებისთვისაც“.
მარია ტადეო, ევრონიუსი: „მაგრამ რას წარმოადგენს ეს მოდელი?“
ფელიქს ულოა, სალვადორის ვიცე-პრეზიდენტი: „ახლავე აგიხსნით. ეს გულისხმობს პრეზიდენტს, რომელიც პასუხს სცემს საკუთარი ხალხის მოთხოვნას. ბუკელემ 54%-ით მოიგო არჩევნები. მეორე ვადის დროს უკვე 85%-ით გაიმარჯვა და ახლა გაჩვენებთ გაზეთს, რომელშიც წერია, რომ 92%-ით მოიგო, მეორეში კი 93% წერია. რას ნიშნავს ეს? ეს ნიშნავს ხალხს. რადგან, როდესაც დემოკრატიაზე ვსაუბრობთ, ხალხს ვგულისხმობთ. დემოს - ხალხია და კრატოს - ძალაუფლება, ხალხის ძალაუფლება, რომელიც მინიჭებული აქვს მმართველს. და როდესაც აღიარებ ლათინურ კონცეფციას do ut des-ს, რომელიც ითარგმნება, როგორც „იმიტომ გაძლევ, რომ შენც მომცე“, ეს ნიშნავს, რომ ხალხი მმართველს ანიჭებს ძაალუფლებას და მან კი უკან უნდა დაუბრუნოს - რა? ის, რაც ხალხს სურს. თუ ხალხი კმაყოფილი არ არის, აღარ აირჩევს მას“.
მარია ტადეო, ევრონიუსი: „და იცით რატომ? ეს ხომ შესანიშნავად იცით. ამ ყველაფრის მეორე მხარეს დგას სახელმწიფო, ერი, რომელიც მეტისმეტად გასამხედროებულია, სადაც მთავრობის რკინის ხელი მოქმედებს, რომელზეც ამდენს საუბრობენ - თქვენ ხომ მშვენივრად მიხვდით ამას ამ ევროპული ტურნეს ფარგლებში, ამბობენ, რომ ადამიანის ფუნდამენტური უფლებები ირღვევა. ვიცი, არ დამეთანხმებით, მაგრამ ეს უნდა მეთქვა, რადგან არ ვიცი, რაზე მესაუბრებით. თქვენ ჩამოხვედით ევროპაში და ეს საკითხი არავის წამოუჭრია, არავის შეუმჩნევია“.
ფელიქს ულოა, სალვადორის ვიცე-პრეზიდენტი: „ეს საკითხი დააყენეს. რამდენადაც ვიცი, ამაზე მიუთითა ესპანურმა მედიამ და მედიის გარდა, სხვებმაც თქვეს. სახელებსაც მივუთითებ“.
მარია ტადეო, ევრონიუსი: „ევროპარლამენტარების ნახევარი ზუსტად ისე დაგიყენებთ ამ საკითხს, როგორც ახლა მე დავაყენე“.
ფელიქს ულოა, სალვადორის ვიცე-პრეზიდენტი: „ვიმეორებ, დღეს არავის აქვს სალვადორზე უკეთესი დღის წესრიგი მთელ ლათინურ ამერიკაში, ცენტრალურ ამერიკასა და ზოგადად ამერიკაში. ჩვენ ვართ ყველაზე უსაფრთხო ქვეყანა დასავლეთ ნახევარსფეროში და გვაქვს...“
მარია ტადეო, ევრონიუსი: „არ აღიარებთ იმ შეცდომებს, რომლებიც დაუშვით? შესანიშნავად იცით, რომ საუბარია პატიმრებზე, რომლებიც არ უნდა ისხდნენ ციხეში“.
ფელიქს ულოა, სალვადორის ვიცე-პრეზიდენტი: „ჩვენ გავათავისუფლეთ ხალხი. იცით, რამდენი გავათავისუფლეთ?“
მარია ტადეო, ევრონიუსი: „თქვენს სახელმწიფოში კანონის უზენაესობას იცავენ?“
ფელიქს ულოა, სალვადორის ვიცე-პრეზიდენტი: „აქ ორი საკითხი იკვეთება. არსებობს კანონის უზენაესობა და კანონების მთავრობა. ჩვენ ვართ კანონების მთავრობა. არცერთი ნაბიჯი არ იდგმება საკნონმდებლო საფუძვლის გარეშე. კანონის უზენაესობა უფრო ფართო კონცეფციაა, რადგან ის გულისხმობს ძალაუფლების დანაწილებას, უფრო მეტ ინსტიტუციას, სწორედ ამას ვქმნით ახლა. დემოკრატიულ ინსტიტუციებს, რომელთაც ძლიერი პრეზიდენტი უდგას სათავეში. ეს არის დემოკრატიის ახალი მოდელი, რომელიც ახლა იბადება“.
მარია ტადეო, ევრონიუსი: „სალვადორის ყველაზე დიდი ციხე, რომელიც კარგად არის ცნობილი ევროპაში, როგორც CECOT-ი (იშიფრება როგორც „ტერორისტების დაკავების ცენტრი“ ), საკმაოდ დიდ ინტერესს იწვევს, თუმცა ამ ციხეზე საზარელ ამბებსაც ჰყვებიან.“
ფელიქს ულოა, სალვადორის ვიცე-პრეზიდენტი: „რა საზარელ ამბებს? მაინც ვინ გამოვიდა ამ ციხიდან და მოჰყვა, რომ იქ საშინელება ხდება? ეს შავი პროპაგანდაა“.
მარია ტადეო, ევრონიუსი: „ფოტოები გამოვიდა. უამრავი ფოტო ვნახეთ, თავად მთავრობის გავრცელებულიც. თვით პრეზიდენტმა ბუკელემაც დააყენა ეს საკითხი“.
ფელიქს ულოა, სალვადორის ვიცე-პრეზიდენტი: „და იცით, რა თქვა პრეზიდენტმა პეტრომ (კოლუმბიის პრეზიდენტ გუსტავო პეტროს გულისხმობს), როდესაც ეს ფოტოები ნახა? თქვა, რომ ნაცისტების საკონცენტრაციო ბანაკებს მაგონებსო. რაც მაშინვე გააპროტესტა ებრაულმა საზოგადოებამ. მათ თქვეს, მაინც როგორ ადარებთ ჩვენს ხალხს ამ კრიმინალებსო“.
მარია ტადეო, ევრონიუსი: „მაგრამ ხვდებით, რომ ეს შემზარავი ფოტოები იყო?“
ფელიქს ულოა, სალვადორის ვიცე-პრეზიდენტი: „რასაკვირველია. იმიტომ, რომ ეს არის შეტყობინება, რომელსაც ახალგაზრდებს ვუგზავნით, რომ, აი, ეს ხალხი დამარცხებულია. ეს კი სავსებით შეესაბამება კანონის უზენაესობას, შეესაბამება ადამიანის უფლებებს. იცით, რა ხდებოდა, როდესაც ეს გვითხრეს? როდესაც ბანდის წევრებს იჭერდნენ, მათ თავი ისე ეჭირათ და ისეთ ჟესტიკულაციას იყენებდნენ, რომ ახალაგზრდების თვალში გამარჯვებულის შთაბეჭდილება დაეტოვებინათ, რომ მედიაში გამოჩენილიყვნენ. როდესაც ამ ხალხს ციხეში სვამ და იმას აჩვენებ, იქ რა დღეშიც არიან, აი, მაშინ უკვე აღარავის უნდა მათ ადგილას ყოფნა. ასე რომ, ეს ქვეცნობიერი გზავნილი იყო. საქმე ისაა, რომ აქ, ევროპაში, არ გესმით ეს, რადგან ნაცისტების საკონცენტრაციო ბანაკს ადარებთ, როგორც იმ კოლუმბიელმა ჯენტლმენმა თქვა...“
მარია ტადეო, ევრონიუსი: „მაგრამ ეს ბატონმა პეტრომ ბრძანა, რომელიც არ არის ევროპელი, არც ევროპელი ლიდერია“.
ფელიქს ულოა, სალვადორის ვიცე-პრეზიდენტი: „მაგრამ მან ევროპა გაიხსენა“.
მარია ტადეო, ევრონიუსი: „მაგრამ არცერთ ევროპელ ლიდერს არ უთქვამს ეს“.
ფელიქს ულოა, სალვადორის ვიცე-პრეზიდენტი: „ამას განიხილავდნენ ჟურნალისტები, რომლებიც არასდროს ყოფილან სალვადორში. ნებისმიერი ევროპელი ლიდერი ინატრებდა, რომ ასეთ დონეზე იღებდეს ხალხი. მაინც რომელს აქვს ასეთი მაღალი რეიტინგი? მათ შორის, ვინც ჩვენ გვაკრიტიკებდა, რომელი ევროპელი ლიდერი სარგებლობს ხალხში ასეთი პოპულარობით?“
მარია ტადეო, ევრონიუსი: „არცერთ ევროპელ ლიდერს არ აქვს 93%-იანი მხარდაჭერა“
ფელიქს ულოა, სალვადორის ვიცე-პრეზიდენტი: „იმიტომ, რომ კრიზისი აქვთ. კრიზისში არიან, იმიტომ, რომ ევროპა ვერ აცნობიერებს, რომ კრიზისშია. აქ, ბრიუსელში, კრიმინალი მძვინვარებს, ევროპის ნებისმიერ ქალაქში ისმის სროლა და თავს ესხმიან ხალხს. თავს არ გრძნობთ უსაფრთხოდ. ჩვენ კი სალვადორში 100%-ით უსაფრთხოდ ვართ“.
მარია ტადეო, ევრონიუსი: „მაგრამ, მოდი, უკან დავბრუნდეთ. დავუბრუნდეთ იმ კითხვას, რომელიც ვერ დავასრულეთ. საბოლოო ჯამში, ეს პოლიტიკური მოდგომაა, რომელსაც აქვს არსებობის სრული უფლება, რადგან ყველა ქვეყანა სუვერენულია. თქვენ ასევე ისაუბრეთ ქვეცნობიერ გზავნილზე ახალგაზრდებისადმი, მაგრამ ამ ყველაფრის საპირწონედ დგას სახელმწიფო, რომელიც რკინის ხელით მოქმედებს. ეს არის გასამხედროებული სახელმწიფო და ის...“
ფელიქს ულოა, სალვადორის ვიცე-პრეზიდენტი: „თქვენ ძალიან ცდებით“.
მარია ტადეო, ევრონიუსი: „მაგრამ ჩემი შეკითხვა ასეთია: რამდენად უღირს ქვეყანას, რომ კოლექტიურად თავს უსფართხოდ გრძნობდნენ, იმ დროს, როცა ადამიანს, რომელსაც დანაშაული არ ჩაუდენია, ციხეში შეცდომით სვამენ?“
ფელიქს ულოა, სალვადორის ვიცე-პრეზიდენტი: „ეს რა აქ არ ხდება? არ ხდება ესპანეთში, საფრანგეთში? გაზის კამერებში უშვებდნენ ადამიანებს, უდანაშაულო ხალხს სიკვდილისთვის წირავდნენ ყველა აქაურ ქვეყანაში. ასე რომ...“
მარია ტადეო, ევრონიუსი: „ევროპაში სიკვდილით დასჯა არ არსებობს“.
ფელიქს ულოა, სალვადორის ვიცე-პრეზიდენტი: „არ ვიცი. მე ვნახე, როგორ დახოცეს ხუთი ადამიანი 1975 წელს.“
მარია ტადეო, ევრონიუსი: „როცა ჯერ დაბადებულიც კი არ ვიყავი ესპანეთში. მაგრამ დღეს სიკვდილით დასჯა გაუქმებულია ესპანეთში. ამიტომაც გითხარით, რომ ეს ფაქტია“.
ფელიქს ულოა, სალვადორის ვიცე-პრეზიდენტი: „მოდი, ნუ დავუბრუნდებით ანაქრონიზმებს. მომავლისკენ გავიხედოთ. საით მიდის ქვეყანა? მოდი, სალვადორზე ვისაუბრით“.
მარია ტადეო, ევრონიუსი: „ვისაუბროთ სალვადორზე. როგორია ორმხრივი დღის წესრიგი, მაგალითად, და ამჟამად ესაუბრებით თუ არა პრეზიდენტ ტრამპს?“
ფელიქს ულოა, სალვადორის ვიცე-პრეზიდენტი: „არ ვიცოდი, რომ ის ევროპელი იყო. თქვენ ხომ ევროპის დღის წესრიგზე საუბრობდით აქ, მე ვაშინტონში არ ვიმყოფები. აქ, ბრიუსელში, ვარ, რადგან მინდა, ევროპელ ლიდერებს ვესაუბრო“.
მარია ტადეო, ევრონიუსი: „საუბარია, როგორია თქვენი მესიჯი ევროპელი ლიდრების მიმართ. ამის მერე გადავალთ სხვა საკითხზე“.
ფელიქს ულოა, სალვადორის ვიცე-პრეზიდენტი: „დაბეჯითებით გეუბნებით, რომ სალვადორი სულ სხვა ქვეყანაა. პრეზიდენტმა ბუკელემ თქვა, რომ ქვეყანა თავიდან დაიბადა. ეს ერთი. მეორეც, პრეზიდენტმა ბუკელემ, როდესაც მეორედ აირჩიეს, ინაუგურაციის დროს განაცხადა ასეთი რამ: „უსაფრთხოების სასწაული მოვახდინეთო“. ახლა ეკონომიკური ზრდის სასწაულიც გვექნება, ისეთი მაღალი მაჩვენებლი გვაქვს. წარმოიდგინეთ, რომ ტრადიციულად ერთ-ნახევარი პროცენტით გვიწინასწარმეტყველებდნენ ზრდას. ჩვენი 4%-იანი ზრდა გვქონდა. მე გითხარით, რომ ჰარვარდის უნივერსიტეტის ლაბორატორიამ, რომელიც კომპლექსურ ეკონომიკებს აფასებს, აღნიშნა, რომ 14 პუნქტით დავწინაურდით. ლათინურ ამერიკაში წამყვანი კომპლექსური ეკონომიკა გვაქვს“.
მარია ტადეო, ევრონიუსი: „და ახლა პრეზიდენტ ტრამპის შესაძლებლობის ფანჯარაზე ვისაუბროთ. აშკარაა, რომ მასთან საერთო გაქვთ და თანაც პრეზიდენტმა ტრამპმა ისაუბრა ამ დღის წესრიგზე, რომელიც სავსებით გასაგებია, რადგან სიტყვების თამაშთან გვაქვს საქმე მონროს დოქტრინასთან დაკავშირებით. ლათინურ ამერიკასთან მიმართებით ათწლეულების განმავლობაში ამბობდნენ ამას და ახლაც შეგვიძლია, შევეხოთ იდეოლოგიურ მხარეს. შეგვიძლია, განვიხილოთ მონროს დოქტრინის თემა, რომ, როდესაც მონროს დოქტრინა შეიქმნა, მას ათწლეულების განმავლობაში აკრიტიკებდნენ ამერიკის შეერთებულ შტატებში და აფასებდნენ, როგორც ლათინური ამერიკის საქმეებში ჩარევას. აქედან გამომდინარე, რა შესთავაზეთ, როდესაც ეს მონროს დოქტრინა გააცნობიერეთ, რამდენად ხელსაყრელია ის სალვადორისთვის?“
ფელიქს ულოა, სალვადორის ვიცე-პრეზიდენტი: „რაც შეეხება მონროს დოქტრინას. აქ იყო ინგლისი, ესპანეთი. მოდი, ცოტა ისტორიას გადავხედოთ“.
მარია ტადეო, ევრონიუსი: „არ მიიჩნევთ მას ჩარევად?“
ფელიქს ულოა, სალვადორის ვიცე-პრეზიდენტი: „მაგრამ ეს არის შეთანხმება სუვერენულ ერებს შორის, რომლებიც პატივს სცმენ თვითგამორკვევის უფლებას. სწორედ ეს არის პრეზიდენტ ბუკელეს მთავრობის სახელმძღვანელო პრინციპი, ჩვენი თვითგამორკვევისა და დამოუკიდებლობის უფლება, განსაკუთრებით იდეოლოგიური, პოლიტიკური და ეკონომიკური ბლოკებისგან დამოუკიდებლობის. რატომ? იმიტომ, რომ, როგორც პრეზიდენტმა განაცხადა, მსოფლიოს ყველა ქვეყანასთან უნდა გვქონდეს ურთიერთობა, განსაკუთრებით მათთან, ვინც სარგებლობას მოუტანს სალავდორელ ხალხს“.
მარია ტადეო, ევრონიუსი: „რაკი ინტერვიუს დასარულისკენ მივდივართ, მინდა, გკითხოთ: ყველა ქვეყანას შორის კარაკასის მთავრობაც იგულისხმება?“
ფელიქს ულოა, სალვადორის ვიცე-პრეზიდენტი: „თქვენ არ ხართ იურისტი და არ იცით, რას ნიშნავს დე ფაქტო და დე იურე. ეს არის დე იურე მთავრობა“.
მარია ტადეო, ევრონიუსი: „მაინც როგორია ვენესუელასთან ურთიერთობის დღის წესრიგი? გჯერათ, რომ ის გზა, რომელსაც ბატონი ტრამპი დაადგა, არჩევნებით მოყვანილი მთავრობისკენ მიდის?“
ფელიქს ულოა, სალვადორის ვიცე-პრეზიდენტი: „მე რატომ მეკითხებით, რას ნიშნავს ეს პოლიტიკა?“
მარია ტადეო, ევრონიუსი: „ამას ვეკითხებით ლათინური ამერიკიდან ევროპაში ჩამოსულ ნებისმიერ პრეზიდენტს.“
ფელიქს ულოა, სალვადორის ვიცე-პრეზიდენტი: „დიდი უპასუხისმგებლობაა სხვა სახელმწიფოს საგარეო პოლიტიკის განხილვა და შეფასება. ამას არასდროს გავაკეთებ. რატომ? პატივისცემის გამო. იმიტომ, რომ, როგორც მე არ მინდა, ვინმე ჩვენს საგარეო პოლიტიკაში ჩაერიოს, ისევე არ ჩავერევით სხვების პოლიტიკაში“.
მარია ტადეო, ევრონიუსი: „მაგრამ ეს თქვენი რეგიონის მნიშვნელოვანი ქვეყანაა“.
ფელიქს ულოა, სალვადორის ვიცე-პრეზიდენტი: „ყველა ქვეყანა მნიშვნელოვანია“.
მარია ტადეო, ევრონიუსი: „მაგრამ ვენესუელა განსაკუთრებული შემთხვევაა.“
ფელიქს ულოა, სალვადორის ვიცე-პრეზიდენტი: „ჩვენთვის ყველა ქვეყანა მნიშვნელოვანია“.
მარია ტადეო, ევრონიუსი: „სალვადორის მთავრობა არ არის დაინტერესებული, რომ რაღაცით მაინც დაეხმაროს დემოკრატიული გარდამავალი ეტაპის გავლაში?“
ფელიქს ულოა, სალვადორის ვიცე-პრეზიდენტი: „ამის გაკეთება ჩვენთვის არავის უთხოვია. როგორც კი გვთხოვენ, მაშინვე მივიღებთ გადაწყვეტილებას, დავეხმაროთ თუ არა. ვინც არ უნდა გვთხოვოს დახმარება, მხარდაჭერა და თანადგომა, მოხარული ვიქნებით, დიდსულოვნად გავუწოდოთ ხელი, მაგრამ არ გვინდა, ვინმეს თავს მოვახვიოთ ჩვენი მოდელი, თუკი ამას არავინ გვთხოვს“.
მარია ტადეო, ევრონიუსი: „და ბოლო კითხვა. თქვენ ლათინური ამერიკის ახალი ლიდერები და მთავრობები ახსენეთ. როგორი იქნება, თქვენი პროგნოზით, მომავალი ათი წელი?“
ფელიქს ულოა, სალვადორის ვიცე-პრეზიდენტი: „ნახეთ, ლათინური ამერიკა არის რეგიონი, სადაც პერიოდულად მუდმივად მეორდებოდა სამხედრო დიქტატურა, რომლის წინააღმდეგაც ვიბრძოლე, რათა დაგვემყარებინა დემოკრატია. ამის შემდეგ ამოქმედდა 80-იანი წლების ნეოლიბერალების მოდელი, ბრეტონ-ვუდსის ინსტიტუტები. ესეც შეიცვალა. პროგრესული მთავრობები მოვიდნენ, როგორც თქვენ უწოდებთ“.
მარია ტადეო, ევრონიუსი: „მე არაფერი მიწოდებია, უბრალოდ ვთქვი, თუ რას უწოდებენ ისინი საკუთარ თავს. პირადად მე არავითარი ზედსართავი სახელი არ გამომიყენებია“.
ფელიქს ულოა, სალვადორის ვიცე-პრეზიდენტი: „იმიტომ, რომ პედრო სანჩესმა შექმნა ალიანსები, შეთანხმებები დადო ამ მთავრობებთან, რომლებიც თქვენ აღნიშნეთ. აქ ციკლურად ვითარდება მდგომარეობა, ერთი ციკლი რომ ამოწურავს თავს, ახალი იწყება“.
მარია ტადეო, ევრონიუსი: „როგორ გგონიათ, ათი წლის შემდეგ ისევ პრეზიდენტი ბუკელე იქნება ქვეყნის სათავეში?“
ფელიქს ულოა, სალვადორის ვიცე-პრეზიდენტი: „თავად ამბობს, რომ - არა. ამბობს, რომ აპირებს წავიდეს პოლიტიკიდან მესამე ვადა რომ ამოეწურება, რადგან ასე შეუთანხმდა საკუთარ ოჯახს“.
მარია ტადეო, ევრონიუსი: „ვადის ლიმიტი არ დაუთქვამს. და თუ ხალხი დემოკრატიულად მიიჩნევს...“
ფელიქს ულოა, სალვადორის ვიცე-პრეზიდენტი: „მაგრამ დემოკრატია ხომ იმას ნიშნავს, როცა ხალხი აძლევს ხმას?“
მარია ტადეო, ევრონიუსი: „ეს უბრალოდ შეკითხვაა“.
ფელიქს ულოა, სალვადორის ვიცე-პრეზიდენტი: „100%-ით ასე იქნება - თუკი ხალხი არჩევნებზე ისევ აირჩევს. შეგახსენებთ, რომ ადამიანის უფლებათა საყოველთაო დეკლარაციის 21-ე მუხლი განსაზღვრავს თავისუფალი, კონკურენტუნარიანი, გამჭვირვალე და დემოკრატიული არჩევნების წინაპირობებს. თუკი ყველა ეს პირობა დაკმაყოფილდება და ადამიანს ისევ აირჩევენ, რატომ უნდა შეზღუდო ვინმე?“
ავტორი: მარია ტადეო