ემანუელ მაკრონი აცხადებს, რომ საფრანგეთი მზად არის, საკუთარი წვლილი შეიტანოს ენერგეტიკული ბაზრის დასტაბილურებაში, რისთვისაც ეტაპობრივად გამოათავისუფლებს 14.5 მილიონი ბარელის ოდენობის ნავთობის სტრატეგიულ რეზერვებს.
G7-ის ლიდერებთან ვიდეოკონფერენციისას, ემანუელ მაკრონმა გონივრულ სვლად შეაფასა პარიზში ბაზირებული საერთაშორისო ენერგეტიკული სააგენტო-ს გადაწყვეტილება, რომელიც ნავთობის გლობალური მარაგების გამოთავისუფლებას გულისხმობს, კრიტიკულად მნიშვნელოვანი ნედლეულის ფასების ადეკვატურ ჩარჩოებში მოსაქცევად.
„როცა ვამბობ „ჩვენ“, ვგულისხმობ საერთაშორისო ენერგეტიკული სააგენტოს წევრ 30-მდე სახელმწიფოს. გასაგები რომ იყოს, ეს 400 მილიონი ბარელი წარმოადგენს ნავთობის ოდენობას, რომელიც საკმარისია დაახლოებით 20 დღისთვის. ამიტომ ეს მნიშვნელოვანი ამბავია.
ეს ნავთობის ყველაზე მასშტაბური გამოთავისუფლებაა მას შემდეგ, რაც ჩვენ დავიწყეთ ამ სტრატეგიული ნაბიჯის გადადგმა. ამასთან, აუცილებელია ყველა ზომის მიღება დროის ამ მონაკვეთში წარმოების მაქსიმალურად გასაზრდელად და ამ ომის შედეგების გამოსასწორებლად, რომელიც, შეგახსენებთ, ნავთობისა და ბუნებრივი აირის სექტორისთვის სერიოზული პრობლემის მომტანია.
ამავდროულად, ვითანამშრომლებთ რიგ სახელმწიფოებთან, რათა თავიდან ავირიდოთ ექსპორტთან დაკავშირებული ნებისმიერი შემზღუდავი ზომა“, — განაცხადა საფრანგეთის პრეზიდენტმა, ემანუელ მაკრონმა.
ევროპელ ლიდერებთან ვირტუალური შეხვედრისას საფრანგეთის პრეზიდენტმა განაცხადა, რომ, მიუხედავად ირანულ პოზიციებზე აშშ-ისა და ისრაელი-ს დარტყმებისა, სამხედრო თვალსაზრისით ირანი-ს შესაძლებლობები გონივრულად უნდა შეფასდეს.
ემანუელ მაკრონის თქმით, მისთვის უცნობი რჩება, შეძლო თუ არა ირანმა ჰორმუზის სრუტე-ში ნაღმების განლაგება.
„ამ საკითხზე არ მაქვს ზუსტი და სანდო ინფორმაცია. როგორც თქვენ, ღია წყაროებში განხილვებისას ან კომენტარებში ვნახე, რომ ეს შესაძლოა ასეა, თუმცა არ მაქვს კონკრეტული მტკიცებულება არც პარტნიორებისგან და არც საკუთარი წყაროებისგან, ამიტომ ამ კითხვას ვერ ვუპასუხებ.
ნათელია, ეს იყო სერიოზული ნაბიჯი ირანელთა მხრიდან, მაგრამ არ მინდა ვისაუბრო იმაზე, რაშიც დარწმუნებული არ ვარ.
ნებისმიერ შემთხვევაში, დღეს ეს არის საბრძოლო მოქმედებების ზონა, ამიტომ ამჟამად ჩვენ სერიოზულად ვერ განვიხილავთ საერთაშორისო ვაჭრობის განახლების შესაძლებლობას.
მოცემულ ვითარებაში სრუტის ორივე მხარეს დგას ასობით ტანკერი და კონტეინერმზიდი.
პირველ რიგში აუცილებელია კონფლიქტის შეჩერება, შემდეგ კი სტრუქტურული მუშაობა — ეს არის როგორც უსაფრთხოების, ისე ტექნიკური საკითხი. სწორედ ამისთვის ვემზადებით“, — თქვა ემანუელ მაკრონმა.
საფრანგეთის პრეზიდენტის პოზიციაა, რომ ჰორმუზის სრუტის ჩაკეტვა და ნავთობზე ფასების მკვეთრი ზრდა „არავითარ შემთხვევაში არ ამართლებს მოსკოვისთვის დაწესებული სანქციების გაუქმებას“.
„დიდი შვიდეულის“ (G7) სახელმწიფოთა ლიდერებთან საუბრისას ემანუელ მაკრონმა ხაზი გაუსვა, რომ ახლო აღმოსავლეთში მიმდინარე სამხედრო ოპერაციის პარალელურად ევროპელ მოკავშირეებს არ უნდა დაავიწყდეთ ერთი რამ — უკრაინაში კრემლის სრულმასშტაბიანი აგრესია არ დასრულებულა.
„ცალსახაა, რომ ეს ვითარება არ უნდა გვაძლევდეს საშუალებას, მოვადუნოთ ყურადღება ან შევამციროთ უკრაინისადმი მხარდაჭერა, ასევე ის მკაფიო დამოკიდებულება, რომელიც გვაქვს რუსეთის წინააღმდეგ დაწესებული სანქციების თაობაზე“, — განაცხადა საფრანგეთის პრეზიდენტმა.
ემანუელ მაკრონის თქმით, სტრატეგიული თანამშრომლობისა და, ფაქტობრივად, უწყვეტი კომუნიკაციის ფონზე, ვაშინგტონის ევროპელი მოკავშირეებისთვის მაინც ბუნდოვანი რჩება თეთრი სახლი-ს ადმინისტრაციის საბოლოო მიზნები ირანთან დაკავშირებით.
საფრანგეთის პირველი პირისთვის არ არის საკმარისი მხოლოდ ამერიკული მხარის განცხადებები თეირანის ისლამური რეჟიმის დასრულების შესახებ.
თავად „დიდი შვიდეულის“ (G7) წევრი აშშ ლიდერთა შეხვედრას არ დასწრებია.