ევროზონის ქვეყნების მთავრობებს ამ პარასკევამდე აქვთ დრო, წარადგინონ კანდიდატები ევროპის ცენტრალური ბანკის, კრისტინ ლაგარდის შემცვლელის თანამდებობაზე.
ევროკავშირის ფინანსთა მინისტრები კი ამ კანდიდატურებს 9 ნოემბერს გამართულ შეხვედრაზე განიხილავენ, განუცხადა Euronews-ს ევროჯგუფის წარმომადგენელმა.
ამ რეკომენდაციაზე ხმის მიცემის უფლება მხოლოდ იმ ქვეყნებს აქვთ, რომლებიც ევროს იყენებენ. სწორედ ამიტომ, მსგავსი დანიშვნების საკითხები წინასწარ განიხილება ევროჯგუფში.
გასულ კვირას კრისტინ ლაგარდმა განაცხადა, რომ თანამდებობას 2027 წლის 7 თებერვალს დატოვებს, რითაც ევროპის ცენტრალური ბანკის პრეზიდენტის პოსტზე თავის რვაწლიან მანდატს თითქმის ცხრა თვით შეამცირებს.
იმავე დღეს, მოგვიანებით, ფრანკფურტში ჟურნალისტებთან საუბრისას მან განაცხადა, რომ თანამდებობიდან წასვლა მისცემს შესაძლებლობას, ისაუბროს ისეთ საკითხებზეც, რომლებიც მონეტარული პოლიტიკის ფარგლებს სცდება.
თუმცა ლაგარდმა უარი თქვა, დაეკონკრეტებინა, დაუჭერს თუ არა მხარს რომელიმე კანდიდატს საფრანგეთის 2027 წლის აპრილის საპრეზიდენტო არჩევნებში.
როგორც Euronews-ი ჯერ კიდევ თებერვლიდან იუწყება, მთელი წლის განმავლობაში ვრცელდებოდა ვარაუდები, რომ ლაგარდის თანამდებობიდან წასვლის ვადები საფრანგეთის არჩევნებს უკავშირდებოდა.
ნაადრევი გადადგომა საფრანგეთის პრეზიდენტ ემანუელ მაკრონსა და გერმანიის ფედერალურ კანცლერ ფრიდრიხ მერცს შესაძლებლობას აძლევს, მონაწილეობა მიიღონ ევროპის ცენტრალური ბანკის პრეზიდენტის ახალი კანდიდატურის შერჩევაში. ამასობაში, საფრანგეთში აპრილის არჩევნების წინ ჩატარებული გამოკითხვების თანახმად, ულტრამემარჯვენე პოლიტიკური ძალები მაღალ რეიტინგებს აჩვენებენ.
ევროპის ცენტრალური ბანკის პრეზიდენტის უმაღლესი თანამდებობისთვის ამჟამად ორი კანდიდატურა განიხილება. ორივე მათგანს მთავრობებმა საჯარო მხარდაჭერა სექტემბერში გამოუცხადეს, ლაგარდის განცხადებამდე რამდენიმე კვირით ადრე.
ერთ-ერთი კანდიდატია პაბლო ერნანდეს დე კოსი - საერთაშორისო ანგარიშსწორების ბანკის გენერალური დირექტორი. ამ ბანკს ხშირად „ცენტრალური ბანკების ბანკსაც“ უწოდებენ. 2018-2024 წლებში იგი ესპანეთის ბანკის პრეზიდენტის თანამდებობას იკავებდა.
მეორე მთავარი კანდიდატია კლაუს კნოტი, რომელიც 14 წლის განმავლობაში, 2025 წლამდე, ნიდერლანდების ცენტრალურ ბანკს ხელმძღვანელობდა.
სანჩესის მხრიდან მისი კანდიდატურის მხარდაჭერის გამოცხადებიდან მეორე დღეს ნიდერლანდების პრემიერ-მინისტრმა რობ იეტენმა Bloomberg-თან ინტერვიუში განაცხადა, რომ კნოტი მრავალი ქვეყნისთვის „იდეალური კანდიდატი“ იქნებოდა.
კანდიდატს დასჭირდება ევროზონის 21 ქვეყნიდან სულ მცირე 16 ქვეყნის მხარდაჭერა, რომელთა მოსახლეობაც ევროზონის საერთო მოსახლეობის არანაკლებ 65%-ს შეადგენს.
საბოლოო გადაწყვეტილებას ევროკავშირის ლიდერები მიიღებენ მას შემდეგ, რაც საკუთარ დასკვნებს წარადგენენ ევროპარლამენტი და ევროპის ცენტრალური ბანკის მმართველი საბჭო.