მოსალოდნელი დემონსტრაციების ფონზე, საფრანგეთის ხელისუფლებამ პარიზის ცენტრის რამდენიმე რაიონში დაწესებული კომენდანტის საათი 26 ოქტომბრამდე გაახანგრძლივა, ხოლო უქმე დღეებისთვის მარსელსა და ლიონში საპროტესტო აქციების გამართვა სრულად აკრძალა.
24 ოქტომბერს ქვეყნის სხვადასხვა ქალაქში ახალი დემონსტრაციებია მოსალოდნელი, თუმცა მოვლენათა განვითარების ერთ-ერთ მთავარ ეპიცენტრად მაინც პარიზი მიიჩნევა - საფრანგეთის დედაქალაქში დაიხურება ლუვრი, ორსესა და პიკასოს მუზეუმები.
რესპუბლიკა ჯერ კიდევ იმკის გასულ უქმეებზე მომხდარი მასშტაბური არეულობის შედეგებსა და ითვლის მიყენებულ ზარალს, რომელიც, წინასწარი შეფასებით, მილიარდ ევროს აჭარბებს.
მასობრივი საპროტესტო აქციების დაწყების მიზეზები ჩრდილში მოექცა დემონსტრანტთა მხრიდან ძალადობრივი ქმედებებისა და ძარცვის ფაქტების გამო, რის შედეგადაც კომერციული და ისტორიული შენობები განადგურდა.
პრეზიდენტ ემანუელ მაკრონის თქმით, საფრანგეთის სხვა რაიონებში, სადაც საპროტესტო აქციები სრულად აკრძალული არ არის, მხოლოდ პროფკავშირების მიერ შეთანხმებული დემონსტრაციები დაიშვება.
მანვე დასძინა, რომ ქვეყნის ხელისუფლების ყველა შესაბამისი უწყება მობილიზებულია საზოგადოებრივი წესრიგის დასაცავად. უფრო კონკრეტულად, შინაგან საქმეთა მინისტრის მოადგილემ, ჟან-დიდიე ბერჟემ განაცხადა, რომ გასულ უქმეებთან შედარებით, პოლიციელების რაოდენობა 20%-ით არის გაზრდილი. მანამდე მთავრობას აკრიტიკებდნენ იმის გამო, რომ არეულობის მასშტაბებმა ის მოულოდნელობის წინაშე დააყენა.
„წესები მარტივია და, ჩემი აზრით, ეს უბრალოდ საღი აზრის საკითხია. ზოგადი რეკომენდაციაა, რომ მომდევნო დღეებში დემონსტრაციები არ გაიმართოს.
მათ, ვისაც დემონსტრაციების გაგრძელება სურს და რომლებიც პროფკავშირული ორგანიზაციები არიან, პრეფექტები ალტერნატიულ მარშრუტებს შესთავაზებენ.
რაც შეეხება მათ, ვინც პროფკავშირულ ორგანიზაციებს არ წარმოადგენს, დემონსტრაციები, შეძლებისდაგვარად, აიკრძალება, რათა შენარჩუნდეს სიმშვიდე, დაცული იყოს ბიზნესები და უზრუნველყოფილი იყოს საზოგადოებრივი შენობების უსაფრთხოება.
მომავალ ორშაბათს, კვირა საღამოს გაკეთებული განცხადების შესაბამისად, პრემიერ-მინისტრი და მთავრობა შეხვდებიან საშუალო სკოლების მოსწავლეთა ორგანიზაციების წარმომადგენლებს, უნივერსიტეტის სტუდენტებს, მასწავლებლებს, პროფკავშირებსა და დამსაქმებელთა ორგანიზაციებს, ადგილობრივი ხელისუფლების წარმომადგენლებსა და პარლამენტარებს, რათა გაგრძელდეს დიალოგი და მუშაობა ლეგიტიმურ მოთხოვნებსა და პრეტენზიებზე, განსაკუთრებით კი ჩვენი ახალგაზრდების მოთხოვნებსა და საჭიროებებზე“, - განაცხადა საფრანგეთის პრეზიდენტმა, ემანუელ მაკრონმა.
ხუთშაბათს, 22 ოქტომბერს საფრანგეთის იუსტიციის მინისტრმა ჟერალდ დარმანენმა განაცხადა, რომ გასულ უქმეებზე მომხდარ არეულობაში მონაწილეობის გამო დაჩქარებული სასამართლო განხილვების შედეგად 217 ადამიანს პატიმრობა მიესაჯა. მოსალოდნელია, რომ ეს რიცხვი გაიზრდება.
დარმანენის თქმით, საფრანგეთის მასშტაბით 2 700 ადამიანი დააკავეს, რომელთაგან ათასზე მეტი უკვე წარდგა სასამართლოს წინაშე.
გაზეთ Le Figaro-ს ცნობით, მინისტრმა აღნიშნა, რომ დაკავებულთა ნახევარს მანამდე ნასამართლეობა არ ჰქონია.