პროფკავშირების ლიდერები, რომლებიც 21 ოქტომბერს საფრანგეთის პრემიერ-მინისტრ სებასტიენ ლეკორნუს შეხვდნენ, თითქმის ორსაათნახევრიანი მოლაპარაკებების შემდეგ უკმაყოფილო დარჩნენ.
პროფკავშირების წარმომადგენლებს საფრანგეთში მიმდინარე სოციალურ არეულობასთან დაკავშირებით კონკრეტული პასუხების მიღების იმედი ჰქონდათ. მათი აზრით, ხელისუფლება მათ მოთხოვნებს არ ისმენს.
„დროა, ჩვენი მობილიზაცია ახალ ეტაპზე გადავიყვანოთ. მთავარი აქცენტი გაფიცვაზე უნდა გაკეთდეს. სწორედ ამიტომ შრომის საყოველთაო კონფედერაცია, პროფკავშირულ კოალიციასთან ერთად 5 ნოემბერს მაქსიმალურად ფართომასშტაბიან მობილიზაციას გეგმავს“. - ამბობს შრომის საყოველთაო კონფედერაციის გენერალური მდივანი, სოფი ბინე.
„ჩვენგან ითხოვენ, რომ საპროტესტო აქციები უფრო მშვიდობიანი იყოს. თუმცა, პროტესტის ჩაცხრობის საუკეთესო გზა ისეთი პირველადი ზომების მიღებაა, რომლებიც ხალხის გაღიზიანებას შეამცირებს. ამ ეტაპზე კი მსგავსი ნაბიჯები არ გადადგმულა“. - აცხადებს ქრისტიან მუშაკთა ფრანგული კონფედერაციის პრეზიდენტი, სირილ შაბანიე.
ამასობაში საფრანგეთის მასშტაბით მართლმსაჯულების სისტემა აქტიურად მუშაობს.
17 ოქტომბერს მომხდარი ძალადობრივი ქმედებების გამო ბევრი მონაწილე სასამართლოს წინაშე წარდგა. იუსტიციის მინისტრ ჟერალდ დარმანენის განცხადებით, დაკავებულია დაახლოებით 2500 ადამიანი. მათგან 917 უკვე სასამართლოს წინაშე წარდგა, 174 კი ჯერ კიდევ პატიმრობაშია.
ამავდროულად, პარიზში, ლიონში, მარსელში, ბორდოსა და ნიცაში უკვე მესამე ღამეა, რაც კომენდანტის საათი მოქმედებს.
აღნიშნულ ქალაქებში, შემდგომი არეულობების თავიდან ასაცილებლად, ღამის საათებში შეზღუდვები კვლავ ძალაში რჩება, პოლიცია კი გაძლიერებულ რეჟიმში მუშაობს.
შესაძლოა, რეგულაციები 24 ოქტომბრამდე გახანგრძლივდეს, რადგან ამ პერიოდში ქვეყნის მასშტაბით საპროტესტო აქციების მორიგი ტალღაა დაგეგმილი.