„თუ აგრესორს შეუძლია მოწინააღმდეგის დანებება მოითხოვოს, მაშინ რაღა საჭიროა მოლაპარაკებები?“ - ეს კითხვა იტალიის პრემიერ-მინისტრმა ქვეყნის პარლამენტში სიტყვით გამოსვლისას დაუსვა იმ კანონმდებლებს, რომლებიც უკრაინის მხარდაჭერის წინააღმდეგ გამოდიან.
ჯორჯა მელონის თქმით, მოსკოვი არ ეშვება საკუთარ იმპერიალისტურ ზრახვებს და ყველანაირი ფორმით ცდილობს კიევი პოლიტიკურად და სტრატეგიულად დაამარცხოს, რაც ძირს გამოუთხრის საერთო ევროპულ მშვიდობას, რისი აღკვეთაც, იტალიის ლიდერის განმარტებით, მხოლოდ პარტნიორების ერთიანობას შეუძლია.
„დანებება მშვიდობა არ არის - ეს დაპყრობაა.
ხვალ რომ უკრაინამ თავდაცვაზე უარი თქვას, როგორც ამას ბევრი ისურვებდა და გვთავაზობს, ჩვენ მშვიდობა კი არ გვექნებოდა, არამედ ევროპული სახელმწიფოს ოკუპაციაზე და საბჭოთა სტილის იმპერიალიზმის დაბრუნებაზე მოგვიწევდა საუბარი - იმ იმპერიალიზმისა, რომელსაც ევროპა ნახევარი საუკუნის განმავლობაში იცნობდა.
პირადად მე ის წლები არ მენატრება. არ მენატრება რუსული ტანკები, რომლებმაც პრაღისა და ბუდაპეშტის აჯანყებები ჩაახშეს. არც ბერლინის კედელი მენატრება და ვერავინ დამარწმუნებს, რომ საკუთარი თავისუფლების დამცველის დანებებას მშვიდობა შეიძლება ეწოდოს.
მშვიდობა, რომლის მიღწევასაც ვცდილობთ და რომლის ასაშენებლადაც ვმუშაობთ, ზოგჯერ პოლიტიკური მხარდაჭერის ფასადაც კი, სამართლიანი მშვიდობაა. რადგან მხოლოდ სამართლიანი მშვიდობა შეიძლება იყოს ხანგრძლივი. მხოლოდ სამართლიან მშვიდობას შეუძლია ევროპის დაცვა და ჩვენი ინტერესების უზრუნველყოფა“, - განაცხადა იტალიის პრემიერ-მინისტრმა.
ჯორჯა მელონიმ „ძალიან სარისკო ნაბიჯად“ შეაფასა ტრამპი-პუტინის დიზელის შეთანხმება.
იტალიის პრემიერ-მინისტრი მიიჩნევს, რომ ამ გზით ვაშინგტონი მოსკოვს საკუთარი სამხედრო მიზნების მიღწევაში ხელს უწყობს, ნაცვლად კრემლის საომარი მანქანის შესაძლებლობების მაქსიმალურად შეზღუდვისა.
„ჩემი აზრით, ტრამპის მიერ შემოთავაზებული დიზელის შეთანხმება ძალიან სარისკო გადაწყვეტილებაა. ცხადია, ყველას გვესმის და ვიზიარებთ ენერგიის ფასების შემცირების აუცილებლობას, რადგან ისინი იტალიაშიც ამძიმებს ოჯახებისა და ბიზნესების მდგომარეობას. თუმცა უნდა გვესმოდეს, რომ საწვავის ფასების მკვეთრი ზრდა, უპირველეს ყოვლისა, ირანში მიმდინარე ომით არის გამოწვეული და არა უკრაინის კონფლიქტით.
შესაბამისად, ამ გადაწყვეტილების შედეგი საეჭვოა, ხოლო რისკები - აშკარა. მოსკოვისთვის ლეგიტიმურობის მინიჭება იმ დროს, როდესაც მისი ბომბები კვლავ ეცემა უკრაინის ქალაქებს“, - განაცხადა მელონიმ.
რუსეთის პრეზიდენტზე საუბრისას, იტალიის მთავრობის მეთაურმა აღნიშნა, რომ „ის ევროპას პროვოცირებს, რადგან ყურადღების გადატანა სჭირდება კონფლიქტის განვითარების მიმდინარეობიდან“. მისივე სიტყვებით, პუტინი ახლა „ახალი მტრის“ ძიებაშია.
მელონის სიტყვებს დადებითი გამოხმაურება მოჰყვა უკრაინის პრეზიდენტის მხრიდან, რომელმაც მკაფიოდ დაფიქსირებული პოზიციისაა და კიევის მხარდაჭერისთვის მადლობა გადაუხადა.
სამაგიეროდ, მოსკოვში, ლავროვის უწყების პრესსპიკერმა, მარია ზახაროვამ იტალიის პრემიერ-მინისტრის განცხადებაზე საპასუხოდ თქვა, რომ დიზელის შეთანხმება ჯორჯა მელონის „საქმე არ არის“.