ბრაზილიელი სენატორი და ამერიკის შეერთებული შტატების პრეზიდენტის მოკავშირე ფლავიუ ბოლსონარუ და ქვეყნის მოქმედი პრეზიდენტი, ლუის ინასიუ ლულა და სილვა 25 ოქტომბერს ერთმანეთს არჩევნების მეორე ტურში დაუპირისპირდებიან. კვირას გამართულ საპრეზიდენტო არჩევნებში გამარჯვება ვერცერთმა კანდიდატმა ვერ მოიპოვა – პირველივე ტურში გამარჯვებისთვის საჭირო მხარდაჭერა ვერც 80 წლის მოქმედმა პრეზიდენტმა და ვერც მისმა კონკურენტმა, ქვეყნის ყოფილი პრეზიდენტის, ჟაირ ბოლსონარუს 45 წლის ვაჟმა ვერ მიიღო.
ოფიციალური ცნობით, ბოლსონარუს 56 მილიონზე მეტი მოქალაქე მიემხრო, ხოლო ლულას დაახლოებით 53,7 მილიონმა ამომრჩეველმა მისცა ხმა.
ქვეყნის მომავალი პრეზიდენტის უფლებამოსილების ვადა 5 იანვარს დაიწყება და საპრეზიდენტო რბოლაში გამარჯვებული სამხრეთ ამერიკის უდიდეს ეკონომიკასა და 214-მილიონიან მოსახლეობას ჩაუდგება სათავეში.
ბოლსონარუს გამარჯვება ქვეყანაში ამერიკის შეერთებული შტატების გავლენას გაზრდის. ლულას თანამდებობაზე დარჩენის შემთხვევაში კი, სავარაუდოდ, ბრაზილია ვაშინგტონისგან დისტანცირებას გააგრძელებს და ჩინეთთან კავშირებს კიდევ უფრო გააღრმავებს.
ფლავიუ ბოლსონარუ პრესასა და მხარდამჭერთა მცირე ჯგუფს საკუთარ სახლთან შეხვდა. „ბრაზილიას ცვლილება სურს. ეს მშრომელთა პარტიის ეპოქის დასასრულია“, – განაცხადა მან.
„ძალიან ბედნიერი ვარ შედეგით, რომელიც ახლახან ვიხილეთ. თითქმის 56 მილიონმა ბრაზილიელმა მომცა ხმა. ძალიან მახარებს იმის დანახვა, რომ ბრაზილიას ცვლილება სურს. სწორედ ეს არის მთავარი დღევანდელ დღეში. ბრაზილიას ცვლილება სურს, და ძალიან ბედნიერი ვარ ყველა რეგიონში მიღებული შედეგებით – რიო-დე-ჟანეიროში, სან-პაულუსა და მინას-ჟერაისში.
ეს მშრომელთა პარტიის ეპოქის დასასრულია. მშრომელთა პარტიის ეპოქა დასრულებულად გამოცხადდა. იმ მშრომელთა პარტიის ეპოქა, რომელიც მემკვიდრეობად მოკლული ქალების და ვალებში მყოფი ბრაზილიელების რეკორდულ რაოდენობას გვიტოვებს“, – განაცხადა ფლავიუ ბოლსონარუმ.
ლულამ არჩევნების შედეგს „მოულოდნელი“ უწოდა და თქვა, რომ გამარჯვებას პირველივე ტურში ელოდა. მანვე დასძინა, რომ გამარჯვების მოსაპოვებლად კამპანიას დაუყოვნებლივ დაიწყებს.
„შედეგი ხშირად მოულოდნელია. ვერასდროს ვიღებთ ყველაფერს, რაც გვინდოდა. უნდა გამოგიტყდეთ, დარწმუნებული ვიყავი, რომ არჩევნებს პირველივე ტურში მოვიგებდი.
ამგვარად, ამხანაგებო, „ბრაზილიის ჩემპიონატის“ პირველი ეტაპი დასრულდა. მეორე ეტაპი კი ისაა, რომ ლულამ და ალკმინმა არჩევნები მოიგონ და ამ ქვეყნის მართვა განაგრძონ“, – განაცხადა ლუის ინასიუ ლულა და სილვამ.
ლულასა და ბოლსონარუს სამი კვირა ექნებათ იმ ამომრჩევლების მოსაზიდად, რომლებმაც პირველ ტურში მხარი არცერთ მათგანს არ დაუჭირეს.
ლულას მესამე საპრეზიდენტო ვადის განმავლობაში მისი რეიტინგი მკვეთრად შემცირდა. თუმცა, ამერიკის შეერთებულ შტატებთან წინააღმდეგობამ მას მხარდაჭერა შემატა. მოქმედ პრეზიდენტს კვლავ ჰყავს მხარდამჭერთა მყარი ბაზა, რომელიც მიიჩნევს, რომ მისმა სოციალურმა პოლიტიკამ მილიონობით ბრაზილიელის ცხოვრება გააუმჯობესა.
თუმცა, ცხოვრების გაძვირებისა და კორუფციული სკანდალის გამო ლულას რთული ბრძოლა ელის.
იმიჯის პრობლემა ორივე კანდიდატს აქვს. რამდენიმე გამოკითხვა აჩვენებს, რომ ბრაზილიის მოსახლეობის დაახლოებით ნახევარი ბოლსონარუს ოჯახს ეწინააღმდეგება, ხოლო მეორე ნახევარი ლულას მუშათა პარტიას.
წარმატებული საპრეზიდენტო კამპანიისთვის ორივე კანდიდატს სხვა კანდიდატების ამომრჩეველთა მხარდაჭერის მოპოვება დასჭირდება, რის გამოც მათ შესაძლოა გარკვეულ პოლიტიკურ საკითხებზე დათმობაზე წასვლა მოუწიოთ.