9 სექტემბერს, საქსონია-ანჰალტში გამართულ არჩევნებში ულტრამემარჯვენეების დამაჯერებელი გამარჯვებიდან სამი დღის შემდეგ, გერმანიის კანცლერ ფრიდრიხ მერცსა და AfD-ის თანათავმჯდომარე ალის ვაიდელს შორის პარლამენტში ცხარე კამათი გაიმართა. ვაიდელმა დებატები გახსნა და განაცხადა, რომ მერცის კოალიციის დღეები დასრულდა.
„საქსონია-ანჰალტში ხალხმა არა მხოლოდ დაგსაჯათ, არამედ გაანადგურა თქვენი პარტია. მეკლენბურგ-წინა პომერანიაში თქვენ უკვე უმცირესობაში ხართ. ფედერალურ დონეზე, სამართლიანადაც, ამ გზაზე ხართ. თქვენ ვერ გაიგეთ ის გზავნილი, რომელიც საქსონია-ანჰალტის ამომრჩევლებმა კვირას გაცნობეს, მაგრამ ეს არ არის რელევანტური, რადგან თქვენი დრო ისედაც ამოიწურა. მოქალაქეებს პოლიტიკის შეცვლა სურთ და ისინი ამას მიიღებენ“. - აცხადებს პარტია ალტერნატივა გერმანიისთვის თანათავმჯდომარე, ალის ვაიდელი.
ფრიდრიხ მერცმა კი უპასუხა, რომ AfD-ის შედეგები ამ არჩევნებში მართლაც შესანიშნავი იყო, მაგრამ აღნიშნა, რომ პარტიამ ვერ მოიპოვა საქსონია-ანჰალტში მმართველობისთვის საჭირო აბსოლუტური უმრავლესობა. მიუხედავად იმისა, რომ მისმა მთავრობამ მიგრაციული პოლიტიკა გაამკაცრა, AfD-ის ხედვა და გეგმები მიგრაციულ პოლტიკასთან დაკავშირებით მაინც გააკრიტიკა.
„ამ პოლიტიკით გერმანიაში უმრავლესობას ვერსად მოიპოვებთ. თქვენ ხართ და რჩებით, ქალბატონო ვაიდელ, დამანგრეველი ძალა. და თუ ის, რასაც აქ ემხრობით, ახდება - კერძოდ, „რეიმიგრაცია“, რომელიც სხვა არაფერია, თუ არა ეთნიკური წმენდა, რომელიც დაფუძნებულია პროფესიაზე, კანის ფერსა და წარმომავლობაზე - სხვა არაფერი იქნება. ქალბატონებო და ბატონებო, სიტყვა „რეიმიგრაცია“ მხოლოდ წარმოშობასა და კანის ფერზე დაფუძნებული ეთნიკური წმენდის სინონიმია“. - განაცხადა გერმანიის კაცლერმა, ფრიდრიხ მერცმა.
პარტიის „ალტერნატივა გერმანიისთვის“ აღზევებამ ის ადამიანები შეაშფოთა, რომლებიც მიიჩნევენ, რომ გერმანიას განსაკუთრებული პასუხისმგებლობა აკისრია, ნაცისტური წარსული გამოისყიდოს.
6 სექტემბერს გამართულ არჩევნებში „AfD“-მ ხმების თითქმის 44 პროცენტი მიიღო, ქრისტიან-დემოკრატიულმა კავშირმა კი - 17 პროცენტი, რაც მერცის პარტიას ამ თვეში კიდევ ორი რეგიონული არჩევნების წინ მზარდი ზეწოლის ქვეშ აქცევს.