ევროკავშირის წევრი სახელმწიფოების შინაგან საქმეთა მინისტრების ვიდეოკონფერენციამ, რომელიც ესპანეთში მიგრაციის კრიზისის გამო საგანგებოდ გაიმართა, როგორც ჩანს, ბლოკის შიგნით არსებული უთანხმოება კიდევ უფრო მეტად გაზარდა.
მოლაპარაკებები, რომლებიც მიმართული უნდა ყოფილიყო სამომავლოდ მსგავსი შემთხვევების თავიდან აცილებისკენ, მხარეები კონკრეტულ კონსესუსამდე ვერ მიიყვანა.
ესპანეთის შინაგან საქმეთა მინისტრს, ფერნანდო გრანდე-მარლასკას, მიგრაციული პოლიტიკის გამკაცრების მომხრეთა ხისტ პოზიციასთან შეჯახება მოუწია.
მიუხედავად იმისა, რომ ესპანეთმა მიგრანტების მაროკოში დასაბრუნებლად სწრაფი ზომები მიიღო, პრემიერ-მინისტრ პედრო სანჩესის მთავრობა კვლავ მიგრაციის მიმართ უფრო ლიბერალურ მიდგომას ინარჩუნებს, ვიდრე მისი ევროპელი პარტნიორების უმეტესობა.
ანალიტიკოსების აზრით, ევროკავშირმა ამ საკითხისადმი საკმაოდ მკაფიოდ გამოაჩინა თავისი სისუსტე, რომელიც, მათივე თქმით, მომავალში გაერთიანებას უფრო სერიოზული გამოწვევების წინაშე აღმოაჩენს.
„ვფიქრობ, რეალურად არ შეგვიძლია ღიად ვისაუბროთ იმაზე, რა არის ნამდვილად სწორი ან არასწორი მიგრაციულ პოლიტიკასთან დაკავშირებით, განსაკუთრებით იმ გამოწვევების ფონზე, რომლებიც დღეს არსებობს.
ნაცვლად იმისა, რომ ეს შესაძლებლობა გამოვიყენოთ რეალური პრობლემების განსახილველად, ისევ იმავე მარტივ და ზედაპირულ გადაწყვეტილებებს ვუბრუნდებით - მაგალითად, შიდა სასაზღვრო კონტროლის დაწესებაზე საუბარს. თუმცა, ამ კონკრეტულ შემთხვევაში, ასეთი მიდგომა, როგორც ჩანს, პრობლემის არსს სრულიად აცდენილია.
ის ფაქტი, რომ პედრო სანჩესი ზეწოლას განიცდის არა მხოლოდ საკუთარი ქვეყნის შიგნით - როგორც ულტრამემარცხენე, ისე ულტრამემარჯვენე პოლიტიკური ძალების მხრიდან - არამედ ევროკავშირის სხვა წევრი სახელმწიფოების მხრიდანაც, ნიშნავს, რომ იმ საკითხების ჩამონათვალი, რის გამოც მას შეიძლება თავს დაესხან ან გააკრიტიკონ, გაცილებით ფართოა, ვიდრე ზოგიერთი სხვა მთავრობის მეთაურის შემთხვევაში.
განსაკუთრებით მაშინ, როდესაც კონსერვატიული პოლიტიკური მიმართულების ლიდერები ევროკავშირის წევრი ქვეყნების ნახევარზე მეტის მხარდაჭერით სარგებლობენ, მათი პოზიცია შედარებით უფრო მყარია.
ჩემი აზრით, პოლიტიკური ლიდერები მიეჩვივნენ იმ აზრს, რომ არარეგულარული მიგრანტების ნაკადი შემცირდა და მომავალშიც კლების ტენდენციას შეინარჩუნებდა. თუმცა მათ სათანადოდ არ უფიქრიათ, რომ ვითარება ნებისმიერ დროს შეიძლება შეიცვალოს და მსგავსი სცენარისთვის მზადყოფნა კვლავ აუცილებელია“, - თქვა ევროპული პოლიტიკური ცენტრის მიგრაციის საკითხების მკვლევარმა, ჰელენა ჰანსმა.
ვიდეოკონფერენციის მიღმა ცნობილია, რომ ყველაზე მკაცრი პოზიცია იტალიას უკავია. პრემიერ-მინისტრმა ჯორჯა მელონიმ არაერთხელ გააკრიტიკა მადრიდის მიგრაციული პოლიტიკა, მათ შორის ესპანეთში უკვე მყოფი არალეგალი მიგრანტების ნაწილის ლეგალიზაციის ინიციატივა. სწორედ მისი გადაწყვეტილებით, 31 ივლისიდან ესპანეთსა და იტალიას შორის დროებით შეჩერებულია შენგენის რეჟიმი.
მადრიდმა მკაცრად გააკრიტიკა ევროპელი პარტნიორის ეს ნაბიჯი და განაცხადა, რომ მსგავსი ზომა ევროკავშირის კანონმდებლობით საერთოდ არ არის გათვალისწინებული.