ვენესუელის გარშემო გაერთიანებული არაერთი სახელმწიფო და საერთაშორისო ორგანიზაცია, სხვადასხვა გზით განაგრძობს ლათინოამერიკული ქვეყნისთვის ბოლო საუკუნის ყველაზე ძლიერი და დამანგრეველი მიწისძვრების შედეგებთან ბრძოლას.
ზოგიერთი მათგანი სამძებრო-სამაშველო ოპერაციაშია ჩართული, ზოგი კი ჰუმანიტარული დახმარებით უზრუნველყოფს ვენესუელელთა საჭიროებების დაკმაყოფილებას. კრიტიკული 72 საათის გასვლის შემდეგ ნანგრევებში ჩარჩენილ მოქალაქეთა გადარჩენის იმედი სულ უფრო მცირდება.
სტიქიისას დაღუპულთა რაოდენობამ 1 700-ს გადააჭარბა და, ვენესუელის დროებით ხელისუფლებისა თუ აშშ-ის გეოლოგიური სამსახურის ცნობით, სამწუხაროდ, ეს რიცხვი ახლოსაც კი არაა რეალობასთან. უცნობია 68 000-ზე მეტი ადამიანის ადგილსამყოფელი - ოჯახები მათთან კავშირზე ვერ გადიან და ხუთი დღეა, უშედეგოდ ეძებენ.
მდგომარეობას ართულებს ის ფაქტი, რომ ვენესუელის სხვადასხვა წერტილში 24 ივნისის შემდეგ სხვადასხვა სიმძლავრის 500 განმეორებითი მიწისქვეშა ბიძგი დაფიქსირდა, ამიტომ მაშველებს სიცოცხლის რისკის ფასად უწევთ სამძებრო ოპერაციის გაგრძელება.
„3 000-ზე მეტი დაშავებული და 12 000-ზე მეტი იძულებით გადაადგილებული პირი გვყავს. სამწუხაროდ, ვერ გავექცევით იმ ფაქტს, რომ ეს რიცხვები სამძებრო-სამაშველო სამუშაოების გაგრძელებასთან ერთად გაიზრდება. სულ მცირე, 2 500 შენობა დაზიანდა, მათი უმრავლესობა სრულად განადგურებულია. კ
რიტიკულად მნიშვნელოვანი 72-საათიანი პერიოდი გადავლილია, თუმცა ესეც ქვეყნის ერთგვარი საოცრებაა - მაშველებმა ჯერ კიდევ შეძლეს ცოცხალი ადამიანების ამოყვანა. მხოლოდ გუშინ ნანგრევებიდან 7 ადამიანი ამოიყვანეს.
აშკარაა, რომ ხელისუფლებასთან ერთად კონცენტრირებული ვართ სასწრაფო სამედიცინო დახმარებაზე და ოპერატიულად ვმუშაობთ მოქალაქეთა დროებითი თავშესაფრით უზრუნველყოფაზე.
მომდევნო საათებში მოსალოდნელია ტროპიკული ტალღა, რომელიც ვენესუელაში ძლიერ წვიმებს მოიტანს. წარმოიდგინეთ, რას ნიშნავს ეს უსახლკაროდ დარჩენილებისთვის.
ორჯერ მომიწია ორი სრული დღის გატარება სტიქიით მეტად დაზარალებულ რეგიონებში და იქ გამოვლენილმა სოლიდარობამ და გმირობამ აღმაფრთოვანა. რა თქმა უნდა, ეს ცოტათი აშუშებს ადგილობრივთა ტკივილს და საჭიროებებს, რადგან საზოგადოება მობილიზებულია“, - განაცხადა ჯანლუკა რამპოლა დელ ტინდარომ, ვენესუელაში გაეროს მუდმივმოქმედმა კოორდინატორმა.
მიწისძვრებისგან დაზარალებული ვენესუელის დასახმარებლად მსოფლიოს არაერთი ქვეყანა გაერთიანდა. ამ მხრივ, განსაკუთრებით აქტიურობენ ლათინოამერიკული სახელმწიფოები, მათ შორის ეკვადორი, სადაც ჰუმანიტარული ტვირთებისთვის სპეციალური მიმღები პუნქტებია გახსნილი.
ჩინეთის საგარეო საქმეთა სამინისტროს თანახმად, ფინანსური გზით მხარდამჭერთა სიას დაემატება პეკინიც, რომელიც კარაკასს 100 მილიონი იუანის, ანუ 13 მილიონ 700 ათასი დოლარის ექვივალენტის თანხას გამოუყოფს.