ისრაელის სამხედრო ძალებმა გაავრცელეს ვიდეოკადრები, რომლებშიც ღაზის სექტორში, ე.წ. „ყვითელი ხაზის“ აღმოსავლეთით, სამხედროების ქმედებებია ასახული.
ისრაელის სამხედროების ცნობით, მათ აღმოაჩინეს და გაანადგურეს დაახლოებით ერთი კილომეტრი სიგრძის მიწისქვეშა გვირაბის მარშრუტი.
ისრაელის არმიის განცხადებითვე, გვირაბში განთავსებული იყო იარაღი და სამი სამალავი, რომელსაც „ჰამასი“ იყენებდა.
ამასთან, ღაზის ჯანდაცვის სამინისტროს მონაცემებით, 10 ოქტომბერს ცეცხლის შეწყვეტის ძალაში შესვლის შემდეგ 470-ზე მეტი პალესტინელი დაიღუპა.
უწყების ინფორმაციით, 77 ადამიანი დაიღუპა იქ, სადაც ცეცხლის შეწყვეტის ხაზი გადის. ეს ტერიტორია ისრაელის კონტროლირებად ნაწილსა და პალესტინელებით დასახლებულ ადგილს შორისაა.
ღაზის სექტორში ვითარება კვლავ დაძაბულია, მხარეებს შორის ცეცხლის შეწყვეტის რეჟიმის მიუხედავად. ისრაელის არმია ოპერაციების გაგრძელებას გეგმავს. ღაზის ჯანდაცვის სააგენტო იუწყება, რომ მსხვერპლის რაოდენობა იზრდება.