„საერთაშორისო გამჭვირვალობა – საქართველო“ განცხადებას ავრცელებს და წერს, რომ დასავლურმა სამყარომ „ქართული ოცნების“ უკვე 200-ზე მეტი წარმომადგენელი დაასანქცირა, რომელთაგან 98-ის ვინაობა გასაჯაროვდა, ხოლო დანარჩენებზე ანონიმური სავიზო შეზღუდვაა დაწესებული.
ორგანიზაციის ინფორმაციით, მათ შორის არიან: ბიძინა ივანიშვილი და მისი ოჯახის 4 წევრი; „ქართული ოცნების“ 32 მაღალჩინოსანი; 33 მოსამართლე, 12 პროკურორი; 10 პოლიციელი. როგორც განცხადებაში წერია, დემოკრატიული ქვეყნები ამ პირებს მშვიდობიანი მომიტინგეების სასტიკი დარბევის, დემოკრატიისთვის ძირის გამოთხრის, ევროინტეგრაციის პროცესის შეჩერების, საქართველოში რუსული ინტერესების გატარების, არჩევნების გაყალბების, კორუფციის, პროპაგანდისა და ქართველი ხალხის ნების წინააღმდეგ წასვლის გამო ასანქცირებენ.
„შეერთებულმა შტატებმა დააწესა დამატებით სავიზო შეზღუდვები 100 პირზე, მათ შორის არიან: პარტია „ქართული ოცნების“ წევრები, პარლამენტის წევრები, ცენტრალური და მუნიციპალური ხელისუფლების მაღალჩინოსნები, სამართალდამცავი და უსაფრთხოების ორგანოების მაღალჩინოსნები, კორუმპირებული ბიზნესლიდერები, პროპაგანდისტები, ზოგიერთი კერძო მოქალაქე და ყველა ამ პირის ოჯახის წევრები. ამ პირების სახელები არ გასაჯაროებულა სავიზო კონფიდენციალურობის კანონმდებლობის გამო“, – წერია „საერთაშორისო – გამჭვირვალობა საქართველოს” მიერ გავრცელებულ განცხადებაში.
