როგორც ამბობენ, აშშ-ის პრეზიდენტმა დონალდ ტრამპმა დაამტკიცა ირანზე თავდასხმის გეგმები, მაგრამ საბოლოო ბრძანებების გაცემისგან ჯერჯერობით თავს იკავებს.
ამერიკულ მედიასაშუალება The Wall Street Journal-თან საუბრისას ტრამპის უფროსი თანაშემწე ამბობს, რომ აშშ-ის პრეზიდენტი თავდასხმების ნებართვას არ გასცემს იმ შემთხვევაში, თუ ირანი უკან დაიხევს.
ისრაელ – ირანის კონფლიქტის ფონზე, ტრამპმა არაერთხელ მოუწოდა ირანს, უპირობოდ დანებდეს და უარი თქვას ბირთვულ პროგრამაზე.
კონფლიქტმა, რომელიც უკვე მეშვიდე დღეა მიმდინარეობს, ათობით ისრაელელის და ასობით ირანელის სიცოცხლე შეიწირა.
ოთხშაბათს, კითხვაზე – გეგმავს თუ არა ვაშინგტონი ირანზე თავდასხმას ტრამპმა უპასუხა: „შეიძლება გავაკეთო ეს, შეიძლება არა“ – ტრამპმა ისიც კი თქვა, რომ აშშ-ის მიერ ირანის უზენაესი ლიდერის, აიათოლა ალი ხამენეის მკვლელობა არ არის გამორიცხული.
