თურქეთის პრეზიდენტი რეჯეფ თაიფ ერდოღანი კაიროში ჩავიდა და ეგვიპტის პრეზიდენტ აბდელ ფათაჰ ალ-სისის შეხვდა.
ეგვიპტის პრეზიდენტის ადმინისტრაციის განცხადებით, ლიდერები ერთობლივად უხელმძღვანელებენ ეგვიპტე–თურქეთის მაღალი დონის სტრატეგიული თანამშრომლობის საბჭოს მეორე სხდომას. ასევე დაგეგმილია მათი მონაწილეობა ეგვიპტურ-თურქული ბიზნესფორუმის დახურვის სესიაზე.
ეგვიპტესა და თურქეთს შორის ურთიერთობა დაახლოებით ათი წლის წინ დაიძაბა. მიზეზი ეგვიპტეში 2013 წლის სამხედრო გადატრიალება იყო, რომლის შედეგადაც ხელისუფლებას ჩამოაშორეს პრეზიდენტი მოჰამედ მორსი, „მუსლიმთა საძმოს“ წარმომადგენელი. თურქეთი ამ ისლამისტურ მოძრაობას ღიად უჭერდა მხარს, რაც ორ ქვეყანას შორის სერიოზული პოლიტიკური უთანხმოების საფუძველი გახდა.
ანკარასა და კაიროს ურთიერთობებიც გამწვავდა ლიბიასა და აღმოსავლეთ ხმელთაშუა ზღვასთან დაკავშირებული განსხვავებული პოლიტიკის გამო.
თუმცა 2023 წელს მხარეებმა ურთიერთობის აღდგენის გადაწყვეტილება მიიღეს. მას შემდეგ თურქ და ეგვიპტელ ლიდერებსა და ოფიციალურ პირებს შორის არაერთი ვიზიტი გაიმართა.
ორივე ქვეყანა წინააღმდეგია ღაზაში ისრაელის სამხედრო ოპერაციებისა. ისინი ერთობლივად მუშაობენ ცეცხლის შეწყვეტის შეთანხმების მისაღწევად.
