ორ რეგიონულ კონკურენტს შორის კავშირების გამყარებისთვის თურქეთის პრეზიდენტი ათენს სტუმრობს.
რამდენიმეწლიანი დაძაბული ურთიერთობის შემდეგ საბერძნეთმა და თურქეთმა პრეზიდენტ ერდოღანის ათენში ვიზიტით ურთიერთობის გაუმჯობესების მიმართულებით მნიშვნელოვანი ნაბიჯი გადადგეს.
ერდოღანსა და მის დელეგაციას საბერძნეთის პრემიერ-მინისტრი, კირიაკოს მიცოტაკისი შეხვდა. საბერძნეთსა და თურქეთს შორის ხანგრძლივმა უთანხმოებამ ორი ქვეყანა ბოლო 50 წლის განმავლობაში ომის ზღვარზე სამჯერ მიიყვანა.
ეგეოსის ზღვასა და ხმელთაშუა ზღვის აღმოსავლეთ ნაწილში საზღვაო საზღვრებსა და რესურსებზე უფლებების მოპოვებაზე ქვეყნებს შორის ბოლო დაპირისპირება 2020 წელს მოხდა.
ურთიერთობის გაუარესების გამო, ერდოღანმა ჯერ კიდევ გასულ წელს განაცხადა, რომ არ იყო დაინტერესებული მიცოტაკისთან შეხვედრით.
თუმცა, ხუთშაბათის ვიზიტი წელს რიგით მესამე შეხვედრა იქნება ლიდერებს შორის, რაც კავშირების გაუმჯობესებაზე მიანიშნებს
ათენში მიღებული ერთ-ერთი გადამწყვეტი შეთანხმება მიგრაციას უკავშირდება – ფოკუსირებულია ორი ქვეყნის სანაპირო დაცვას შორის საკომუნიკაციო არხების დამყარებაზე.
მიცოტაკისმა აღნიშნა, რომ ის მხარს უჭერს ვიზების გამარტივებას თურქებისთვის, რომლებიც საბერძნეთის კუნძულებს სტუმრობენ. მან ასევე მოიწონა ანკარას თხოვნა ევროკავშირში თურქეთის მოქალაქეების მოგზაურობის შეზღუდვების შემსუბუქების შესახებ.
სხვა შეთანხმებები მოიცავს ვაჭრობის, ენერგეტიკის, განათლების, სოფლის მეურნეობის, სპორტის, ტექნოლოგიებისა და ტურიზმის საკითხებს.
