უნდობლობის 8 ვოტუმის დაძლევისა და მრავალთვიანი განხილვების შემდეგ, საფრანგეთმა 2026 წლის სადავო სახელმწიფო ბიუჯეტი დაამტკიცა, თუმცა არატრადიციული გზით.
საფრანგეთის პრემიერ-მინისტრმა სებასტიან ლეკორნუმ გამოიყენა სპეციალური კონსტიტუციური უფლებამოსილება, რათა გადაწყვეტილება დეპუტატთა კენჭისყრის გარეშე მიეღო.
ულტრამემარჯვენე პარტიამ, „ეროვნულმა გაერთიანებამ“ და ულტრამემარცხენე მოძრაობამ, „დაუმორჩილებელმა საფრანგეთმა“ განაცხადეს, რომ მთავრობის უნდობლობისთვის საჭირო კანონპროექტებს წარადგენდნენ, თუმცა, რადგან მათი საკანონმდებლო ინიციატივა ჩავარდა, მთავრობის მიერ წარმოდგენილი ბიუჯეტი ავტომატურად დამტკიცდა.
ეროვნულ ასამბლეაში მიღებული გადაწყვეტილებით, შესაძლოა, საფრანგეთმა პოლიტიკური ჩიხიდან გამოსვლის პროცესი დაიწყოს, თუმცა, ქვეყნის პარლამენტში გაკეთებული განცხადებები არ გამორიცხავს, რომ პოლიტიკური მდგომარეობა მეტად გამწვავდეს.
„თქვენ უარს ამბობთ, მოუსმინოთ საზოგადოების დიდ ნაწილს, რომლებიც გამოთქვამენ მზაობას, ერთხელ და სამუდამოდ დაასრულონ ეს ანარქიზმი, რომელიც სინამდვილეში მაკრონიზმია. ფინანსური სამართლიანობა ეს არის ამ ბიუჯეტის მთავარი დანაკლისი. როგორც ყველა თქვენი წინამორბედი, თქვენც უმოქმედობას ავლენთ. 2017 წლიდან მოყოლებული, მდიდრების ქონება გაორმაგდა, უთანასწორობა და სიღარიბე კი კვლავ მზარდია. მაშინ, როცა მაღალი დონის საზოგადოებაში მდიდრების წილი იზრდება, ღარიბი ოჯახები არასტაბილურობის, ინფლაციისა და სახელმწიფო სერვისების ხარისხის გაუარესების პირისპირ რჩებიან.
ჩვენ ვართ დაბალი ანაზღაურების მქონე სახელმწიფო. ხელისუფლებაში ემანუელ მაკრონის მოსვლის შემდეგ მოკლევადიანი კონტრაქტების მეშვეობით ხელფასის მიმღებთა რაოდენობა დასაქმებულთა სრული რაოდენობის 20%-მდე გაიზარდა. თქვენ ანადგურებთ შრომით ღირებულებებს. თქვენ ორჯერ ზრდით დანახარჯებს, ამავდროულად აღარიბებთ მშრომელებს და ასუსტებთ სოციალური დახმარების სისტემას.
მთელი დისკუსიის განმავლობაში ჩვენ კონკრეტულ წინადადებებს წარვადგენდით, თუმცა უშედეგოდ. 2017-დან 2025 წლამდე პერიოდში სწორედ გადასახადების შემცირებამ მიგვიყვანა სახელმწიფო ბიუჯეტის გაუარესებამდე. სახელმწიფო შემოსავლები მთლიანი შიდა პროდუქტის დაახლოებით 3%-ით შემცირდა, თუმცა თქვენ ეს არ გაწუხებთ…“ – თქვა საფრანგეთის კომუნისტური პარტიის, „ახალი სახალხო ფრონტის“ წევრმა, სტეფან პეუმ.
„განხეთქილება ამით არ მთავრდება — ის ასევე სრულად არის აცდენილი ბიუჯეტში არსებულ რეალობას. თქვენ მხოლოდ ისე წაიკითხეთ ეს ბიუჯეტი, როგორც ის ეროვნულ წარმომადგენლობას წარვუდგინეთ პასუხისმგებლობის ამ ვალდებულების ფარგლებში? რატომ საუბრობთ სრულიად მცდარი არგუმენტებით, რატომ ასახელებთ სრულიად მცდარ ციფრებს, რათა თქვენი არგუმენტაცია შეამოწმოთ?
დიახ, ჩვენ შევინარჩუნებთ 5%-იან დეფიციტს წელს, როგორც შარშან შევინარჩუნეთ 5.4%-იანი დეფიციტი. და იგივე ადამიანები შარშან პრემიერ-მინისტრ ფრანსუა ბეირუდს ეუბნებოდნენ: „თქვენ იტყუებით“, „ვერ შეინარჩუნებთ“, „ვერ შევძლებთ“. სწორედ ამ ორი მთავრობის ქმედებების წყალობით 2025 წლისთვის ეს შედეგი შენარჩუნებულია…“ – თქვა საფრანგეთის პრემიერ-მინისტრმა, სებასტიან ლეკორნუმ.
საფრანგეთის პრემიერ-მინისტრის, სებასტიან ლეკორნუს განმარტებით, ბიუჯეტის ტექსტი არ ეკუთვნის ქვეყნის ხელისუფლებას, არამედ არის „საპარლამენტო კომპრომისის შედეგი“, ხოლო ამ პროცესში საკანონმდებლო ორგანოში წარმოდგენილმა „ყველა ჯგუფმა მიიღო მონაწილეობა“. მანვე დასძია, რომ ბიუჯეტი საკონსტიტუციო საბჭოს წარუდგინა იმის დასადგენად, შეესაბამებოდა თუ არა ის ქვეყნის მთავარ სამართლებრივ დოკუმენტს.
საფრანგეთში 2024 წელს გამართული ვადამდელი საპარლამენტო არჩევნების შემდეგ, კანონმდებლები რამდენჯერმე ვერ შეთანხმდნენ სხვადასხვა ინიციატივასთან დაკავშირებით.
მთავარი სადავო საკითხი იყო საფრანგეთის გაუარესებული ფინანსური მდგომარეობის მოგვარების გზები. სახელმწიფო ბიუჯეტის ირგვლივ არსებული პრობლემები ლეკორნუს ორ წინამორბედს თანამდებობის ფასად დაუჯდა. განვითარებული პროცესების პარალელურად, ულტრამემარჯვენე პარტია „ეროვნული გაერთიანება“ კანონმდებლებს მთავრობის დაშლის ხელშეწყობისთვის საჭირო პროცედურაში მხარდაჭერისკენ მოუწოდებდა.
სახელმწიფო ბიუჯეტის საკითხმა ემანუელ მაკრონის მოკავშირეთა შორისაც გამოიწვია სკეპტიციზმი. მათი აზრით, დოკუმენტი „არ არის მზად მომავლისთვის“ და მიუთითებდნენ, რომ გადასახადების გაზრდა მნიშვნელოვან ზიანს მიაყენებდა ეკონომიკურ აქტივობას.
„სოციალისტების“ წარმომადგენლებმა არ დაუჭირეს მხარი მთავრობისთვის უნდობლობის გამოცხადებას, თუმცა, სანაცვლოდ, ემანეულ მაკრონის ხელისუფლებასთან კომპრომისს მიაღწიეს და შეთანხმდნენ სადავო საპენსიო რეფორმის 2027 წლამდე შეჩერებაზე.
