ღაზის სექტორის სამხრეთ ნაწილში, ისრაელის საჰაერო დარტყმის შედეგად არიან გარდაცვლილები. პალესტინელები საკუთარ ოჯახის წევრებსა და ნათესავებს გლოვობენ.
ქალაქ რაფაჰში მდებარე ქუვეითის სამედიცინო დაწესებულებაში განაცხადეს, რომ ოთხშაბათს გვიან ღამით ისრაელის საჰაერო დარტყმის შემდეგ ხუთი ადამიანის, მათ შორის ორი ბავშვის ცხედარი მიიღეს.
საავადმყოფოს ცნობით, ქალაქ მუვასიზე დარტყმის შედეგად მიღებული ჭრილობების გამო მათთან კიდევ 32 ადამიანი მკურნალობდა.
„ისრაელის სამხედრო თვითმფრინავებმა რაკეტები გაუშვეს ალ-ნაჯატის ბანაკში, ქუვეითის საავადმყოფოს მახლობლად. მათ ოთხი რაკეტა გამოიყენეს, რის შედეგადაც მთელი ოჯახი დაიღუპა და მრავალი სხვა დაშავდა. ექვსი ოჯახის წევრი და ნათესავი დავკარგე. ისრაელი სამიზნეში ბავშვებსა და ქალებს იღებს. ისინი საერთოდ რა შუაში არიან? ჩვენ ცეცხლის შეწყვეტისა და ზავის პირობებში ვართ. და მაინც, როგორ შეუძლია ისრაელს კვლავ ამხელა აგრესია და სისასტიკე გამოავლინოს?“-ამბობს რააფატ აბუ ჰუსეინი, დაღუპულის ნათესავი.
ისრაელმა განაცხადა, რომ მათ საჰაერო დარტყმა „ჰამასის“ მებრძოლებზე განახორციელეს, დილით განხორციელებული თავდასხმის საპასუხოდ, რომლის დროსაც ხუთი ისრაელელი ჯარისკაცი დაიჭრა.
ეს დარტყმა იყო უახლესი გამოცდა ცეცხლის შეწყვეტის შეთანხმებისთვის, რომელიც ძირითადად ოქტომბრის დასაწყისიდან მტკიცდება. თუმცა მიუხედავად შეთანხმებისა, როგორც ისრაელს, ასევე ჰამასს დარღვევების შესახებ ძალიან ბევრი პრეტენზია აქვთ.
„ბავშვებს ეძინათ და ჩვენც დაძინებას ვაპირებდით, როდესაც აფეთქება მოხდა. არ ვიცოდით აფეთქების წყარო ან ადგილმდებარეობა, რადგან ვიცით, რომ ცეცხლის შეწყვეტის შესახებ შეთანხმება კვლავ მოქმედებს. შოკირებული დავრჩით უჩვეულოდ ინტენსიური ცეცხლის დანახვაზე. მათ რაკეტები ესროლეს ქსოვილის, პლასტმასისა და ხისგან დამზადებულ კარავს. ბავშვებს ეძინათ. ისინი ძილში დახოცეს, რას ერჩიან მათ? პატარა ბავშვებმა რა დააშავეს ამის ფასი? რა გააკეთეს, რომ ეს დაიმსახურეს?“-ამბობს აიშა აბუ ჯაზარი, რაფაჰიდან დევნილი.
ადგილობრივი ჯანდაცვის წარმომადგენლების ცნობით, ოქტომბრის ბოლოს მომხდარი დარტყმების შედეგად 104 ადამიანი დაიღუპა, ხოლო ნოემბრის ბოლოს – 33.
