საქალაქო სასამართლოში დემონსტრაციების დროს დაკავებულთა პროცესების პარალელურად, დიღმის პოლიციის სამმართველოსთან საპროტესტო აქცია გაიმართა.
მოქალაქეებმა წინააღმდეგობის გამოხატვის მიზნით ადგილზე ტრანსპარანტები მიიტანეს, წარწერებით: „არ აწამო!”, „წამება დანაშაულია, პროტესტი – არა!”.
„ეს ადამიანები დაკავებულები არიან პატრიოტიზმისთვის. ამ ადამიანებს სასტიკად უსწორდებიან. თითოეული ხელი, რომელიც არის მოქნეული პატრიოტი ადამიანების მიმართ, არის საქართველოსთვის მოქნეული ხელი”, – აცხადებს ნინო ლომჯარია, „საქართველოს ევროპული ორბიტის” დამფუძნებელი.
„ჩვენ ვგმობთ ძალადობას, უკანონობას, არაკონსტიტუციურობას და სოლიდარობას ვუცხადებთ ყველა პატრიოტ ადამიანს, რომლებიც ქვეყნის მომავალს იცავენ”, – ამბობს მამუკა ანდღულაძე, „მედიის ადვოკატირების კოალიციის” თავმჯდომარე.
„ყველა ის ადამიანი, რომლებიც დღეს იზოლატორში იმყოფებიან აქციაში მონაწილეობის გამო, უკანონოდ დააკავეს”, – ამბობს „საფარის” დამფუძნებელი ბაია პატარაია. მისი თქმით, შინაგან საქმეთა სამინისტროს თანამშრომლები საპროტესტო აქციის მონაწილეებს დაკავებისას „არაადამიანურად” ეპყრობიან.
70-ზე მეტი დემონსტრანტის მიმართ საქმის წარმოება უკვე დასრულებულია. მათ ნაწილს პატიმრობა მიესაჯა, ნაწილს კი, ჯარიმის გადახდა.
