ისრაელმა ლიბანში, ბარჯის დასახლებაზე, მიიტანა ავიაიერიში. სამაშველო სამსახურებმა 30-ზე მეტი ადამიანის ცხედარი ამოიყვანეს საცხოვრებელი კორპუსის ნანგრევებიდან. ოფიციალური პირები აცხადებენ, რომ სამძებრო-სამაშველო სამუშაოები ამ დრომდე გრძელდება. ადგილობრივების ინფორმაციით, სამი ადამიანი უგზო-უკვლოდ დაკარგულად მიიჩნევა.
ადგილობრივი მცხოვრები მუჰიდინ ალ-ქალააჯი ამბობს, რომ შემთხვევის დროს იგი სამსახურში იყო, მისი ოჯახი კი – სახლში. მისი თქმით, ყველაფერი ჩვეულებრივად იყო, სახლიდან რომ გავიდა. დაახლოებით ცხრის ნახევარზე ცოლმა დაურეკა და უთხრა, რომ მათ საცხოვრებელ კორპუსს ჭურვი მოხვდა, შენობა ჩამოინგრა, ნანგრევებში კი უამრავი ადამიანი მოყვა.
ისრაელელ სამხედროებს ინციდენტთან დაკავშირებით კომენტარი ჯერ არ გაუკეთებიათ. ამავდროულად, ჯანმომ ოთხშაბათს განაცხადა, რომ ღაზიდან გაიყვანს 100-ზე მეტ ადამიანს, რომელთაც სამედიცინო დახმარება ესაჭიროებათ. ეს ყველაზე მასშტაბური ოპერაცია იქნება ბოლო ექვსი თვის განმავლობაში. ჯანმოში აცხადებენ, რომ ევაკუაცია შეეხება ასევე ქრონიკული დაავადებებისა და ტრავმული დაზიანებების მქონე პაციენტებსაც.
