„დონალდ ტრამპი კვლავ გახდება პრეზიდენტი. ეს კი იმას ნიშნავს, რომ დასავლეთში წლის ბოლომდე „მშვიდობის მომხრე“ პოლიტიკურ ძალებს ექნებათ უმრავლესობა”, – ამის შესახებ უნგრეთის პრემიერ-მინისტრმა ვიქტორ ორბანმა განაცხადა.
მისი თქმით, ამერიკის შეერთებული შტატების არჩევნების შემდეგ შეიცვლება დასავლეთის პოლიტიკური დღის წესრიგი.
უნგრეთის პრემიერ-მინისტრს სჯერა, რომ ამერიკის პრეზიდენტი კვლავ დონალ ტრამპი გახდება.
„ამერიკის შეერთებულ შტატებში ამინდი იცვლება. დემოკრატები წავლენ და რესპუბლიკელები მოვლენ. დონალდ ტრამპი კვლავ პრეზიდენტი გახდება. ეს კი იმას ნიშნავს, რომ დასავლეთში წლის ბოლომდე „მშვიდობის მომხრე“ პოლიტიკურ ძალებს ექნებათ უმრავლესობა. დღეს დასავლურ სამყაროში „ომის მომხრე“ უმრავლესობაა, თუმცა ამერიკის შეერთებული შტატების არჩევნების შემდეგ „მშვიდობის მომხრე“ უმრავლესობა იქნება. დღეს დასავლეთში „მიგრაციის მომხრე“ პოლიტიკაა, თუმცა ამერიკის არჩევნების შემდეგ, ევროპაშიც მიგრაციის მოწინააღმდეგე პოლიტიკა იარსებებს. დღეს დასავლეთში „გენდერის“ ის პოლიტიკაა გავრცელებული, რომელიც ხელს უწყობს თანაცხოვრების ახალ ფორმებს, ხოლო ოჯახის ტრადიციებს ანადგურებს. თუმცა არჩევნების შემდეგ ესეც შეიცვლება. პატრიოტები აქ, ხოლო დონალდ ტრამპი ამერიკაში ტრადიციული ოჯახის დამცავ პოლიტიკას გაატარებენ. შესაბამისად, დასავლური სამყარო დიდი ცვლილებების წინაშე დგას”, – განაცხადა ვიქტორ ორბანმა.
ორბანი აცხადებს, რომ დონალდ ტრამპი, ისევე, როგორც თავად ორბანი და მისი ევროპელი მხარდამჭერები, ომისა და მიგრაციის საწინააღმდეგო პოლიტიკას აწარმოებს. ვიქტორ ორბანის განცხადებითვე, დონალდ ტრამპი ოჯახის ღირებულებებს დაიცავს, რომელსაც დღეს დასავლური სამყარო ანადგურებს.
„ვფიქრობ, რომ ახალი უმრავლესობა ყალიბდება. ხალხის უმრავლესობა მშვიდობის მომხრე და მიგრაციის და გენდერის წინააღმდეგია. ჩვენ პატრიოტები წარმოვადგენთ ამ ძალებს აქ ევროპაში და ვფიქრობ, რომ სწორედ ეს ძალები მოვა ხელისუფლებაში შეერთებული შტატებშიც”, – განაცხადა ვიქტორ ორბანმა.
