საქართველოში ინტერის აკადემიაში 500-მდე ბავშვი ირიცხება. ინტერის აკადემია საქართველოში 3 წლის წინ დაარსდა და წარმატებული მუშაობის შემდეგ ხელშეკრულება კიდევ 5 წლით გაგრძელდა. ამის შესახებ ევრონიუს ჯორჯიასთან ინტერვიუში ინტერის აკადემიის ტექნიკურმა დირექტორმა მარკო მონტიმ ისაუბრა. აკადემიის ტექნიკური დირექტორი საქართველოში ინტერის აკადემიას ესტუმრა. ვეტერანი იტალიელი ფეხბურთული მრავალწლიანი კარიერისას სერია ა’ს სხვადასხვა გუნდში ირიცხებოდა, მათ შორის „ინტერის მილანში”, „ლაციოსა” და „ატალანტაში”. ახლა ის მსოფლიოს მასშტაბით „ინტერ მილანის” აკადემიების ტექნიკური დირექტორია. ევრონიუს ჯორჯიას ეთერში ვეტერანმა იტალიელმა ფეხბურთელმა ასევე ბავშთა და ზოგადად ქართული ფეხბურთის შესახებ ისაუბრა.
პირველ რიგში, დიდი მადლობა მობრძანებისთვის. შეგიძლიათ, გვითხრათ, რა არის საქართველოში თქვენი ვიზიტის მთავარი მიზანი?
მოგესალმებით. მიხარია, რომ აქ ვარ. როგორც წესი, მთელი მსოფლიოს მასშტაბით ყოველწლიურად ვსტუმრობ ინტერის აკადემიებს. ახლა კი თბილისში ჩამოსვლის დრო იყო. ეს არაჩვეულებრივი ქალაქია. აქ მშვენიერი აკადემია გვაქვს. კარგი ახალგაზრდა ფეხბურთელებიც გვყავს. ჩემი მიზანი სწორედ ის იყო, რომ კადემიაში მივსულიყავი, დამეთვალიერებინა და აკადემიაში დონის გაუმჯობესების მიზნით შემდგომი სამუშაოები განგვეხილა.
გვიამბეთ, როგორ მიმდინარეობს საქართველოში ინტერის აკადემიის სამუშაოები და სამომავლოდ რა გეგმები გაქვთ?
საქართველოში ინტერის აკადემია სამი წლის წინ დავაარსეთ, ახლა კი ხელშეკრულება ხუთი წლით გავახანგრძლივეთ. აქ ჩვენმა პარტნიორებმა შესანიშნავი სამუშაოები ჩაატარეს. ამ ეტაპზე აკადემიაში დაახლოებით 500 ბავშვი გვყავს. ჩვენი მიზანია, გავზარდოთ ახალგაზრდა მოთამაშეების რაოდენობა, მაგრამ უფრო მნიშვნელოვანი უკვე მიღწეული მაღალი დონის შენარჩუნებაა. აკადემიაში ბავშვების რაოდენობის გაზრდის ხარჯზე ხარისხი არ უნდა დავწიოთ. ჩვენი მეთოდოლოგია, ჩვენი სტრატეგია დაფუძნებულია ყოველდღიურ მუშაობაზე, რომ ახალგაზრდებს განვითარებაში დავეხმაროთ, რომ მანთ თავიანთი დრო გონივრულად გამოიყენონ. ეს ყველაფერი კი ასახულია იმ ხანგრძლივ შეთანხმებაში, რომელსაც ხელი სამი წლის წინ მოვაწერეთ, ახლა კი გავახანგრძლივეთ.
ინტერის აკადემიას ხშირად ვეტერანი ფეხბურთელები ჩამოჰყავს, რათა თავიანთი გამოცდილება ბავშვებსა და ახალგაზრდებს გაუზიარონ. იმ ფეხბურთელებისთვის, რომლებიც საფეხბურთო კარიერას ახლა იწყებენ, რამდენად მნიშვნელოვანია, გამოცდილება მიიღონ იმ ფეხბურთელებისგან, რომლებსაც უმაღლეს დონეზე უთამაშიათ?
ეს ძალიან მნიშვნელოვანია, რადგან ყოფილ ფეხბურთელებს დიდი გამოცდილება აქვთ და მათ შეუძლიათ, ახალგაზრდებს ხელი შეუწყონ. ამასთანავე, გვჯერა, რომ ჩვენს აკადემიაში, ჩვენს გუნდში ახალგაზრდა მწვრთნელების დასაქმებით ბავშვებს უკეთესი მომავლის შექმნაში დავეხმარებით. ჩვენთვის მნიშვნელოვანია, გვერდით დავუდგეთ ჩვენს პარტნიორებს, ჩვენს ოჯახებს, ჩვენს ახალგაზრდებს, რომ ისინი, პირველ რიგში, იყვნენ კარგი ადამიანები, შემდეგ კი კარგი მოთამაშეები. სწორედ ეს არის ჩვენი ფილოსიფიაც, რომ ეთიკური და საგანმანათლებლო კუთხით მათ ჩვენი გამოცდილება გავუზიაროთ.
რატომ არის ასეთი მნიშვნელოვანი ინტერ მილანისთვის მსოფლიოს მასშტაბით, მათ შორის საქართველოშიც, სხვადასხვა აკადემიის გახსნა?
ეს შესანიშნავი შესაძლებლობაა იმისა, რომ ბევრი ქვეყანა გავიცნოთ. ამავდროულად, შეგვიძლია ჩვენი ტექნიკური ცოდნა და ნოუ-ჰაუ ექსპორტზე გავიტანოთ. ეს ჩვენი ბრენდის გაზრდის შესაძლებლობაა. გასულ წელს ჩვენ სერია ა მეოცედ მოვიგეთ და ლოგოზე მეორე ვარსკვლავის ტარების უფლება მოვიპოვეთ. ესეც ჩვენი ბრენდის მსოფლიოს მასშტაბით გაძლიერების ნიშანია. აკადემია სამუშაოს კი პირველი ეტაპია. ჩვენ, ყველანი, ფეხბურთში ვმუშაობთ, აკადემიები კი ფეხბურთის საწყისია. იმისთვის, რომ პირველ გუნდში კარგი მოთამაშეები გყავდეს, აუცილებელია ძლიერი აკადემია.
საქართველოსა და მსგავსი ქვეყნებისთვის რამდენად მნიშვნელოვანია იმ აკადემიების არსებობა და მათში ინვესტიციის ჩადება, სადაც ახალგაზრდა პროფესიონალებს ან უბრალოდ სპორტის მოყვარულ ახალგაზრდებს ექნებათ შესაძლებლობა, ისწავლონ და გამოცდილება მიიღონ?
ვფიქრობ, რომ ქვეყნისთვის აკადამია ძალიან ფასეულია. საქართველო მშვენიერი ქვეყანაა, მაგრამ არც ისე დიდია. შესაბამისად, აკადემიაში მოთამაშეების დიდი რაოდენობა არ გვყავს. ჩვენთან ძალიან ბევრი ადამიანი სხვადასხვა ტიპის მეთოდოლოგიით მუშაობს. აქ მუშაობით კმაყოფილები ვართ. ჩვენი სურვილია ჩვენი, ინტერის საფეხბურთო იდეოლოგია გაგაცნოთ. ვიცით, რომ საქართველოს ფეხბურთის დიდი ისტორია და ტრადიცია გააჩნია. როგორც ვთქვი, ბევრი მოთამაშე არ გვყავს, თუმცა, ამის მიუხედავად, აქ ახალგაზრდა პროფესიონალების თამაშის ხარისხი ძალიან მაღალია. გვიხარია, აქ რომ ვართ და საქართველოს წინსვლაში ვეხმარებით.
რა მნიშვნელობა აქვს ამ აკადემიას ქართული ფეხბურთისთვის, პროფესიონალი გუნდებისა და სამომავლოდ ეროვნული ნაკრებისთვის?
ჩვენთვის აკადემია ტექნიკური, კომერციული პროექტია. ჩვენი ერთ-ერთი მთავარი მიზანი მოთამაშეების დონის გაუმჯობესებაა. ვფიქრობ, რომ ამით ადგილობრივ გუნდებსა და სამომავლოდ ეროვნულ ნაკრებსაც დავეხმარებით. წელს აკადემიაში 15 ფეხბურთელი გვყავს, რომლებიც საქართველოს ახალგაზრდულ ნაკრებში თამაშობენ.
ეს ძალიან მნიშვნელოვანია. ჩვენ ვახსენეთ საქართველოს ეროვნული ნაკრები, რომელსაც ძალიან წარმატებული ზაფხული ჰქონდა, შედგა დებიუტი ევროპის ჩემპიონატზე, საქართველოს ნაკრებმა პლეიოფშიც ითამაშა. გუნდმა ერთა ლიგის ახალი სეზონი გამარჯვებებით დაიწყო, თუმცა შემდეგ რამდენიმე მატჩში დამარცხდა კიდეც.
რა შეგიძლიათ გვითხრათ ჩვენი ნაკრების ბოლოდროინდელი წარმატების შესახებ? როგორ ფიქრობთ, რა არის ამის მიზეზი?
ერთი წლის წინ აქ ახალგაზრდული ნაკრების წარმომადგენლებს შევხვდი. ამ კუთხით თქვენთან ძალიან კარგი ხალხი მუშაობს. როგორც აღვნიშნე, თქვენ მაღალი დონის მოთამაშეები გყავთ, ახლა კი განვითარების კარგი გეგმაც გაქვთ. ეს ძალიან მნიშვნელოვანია იმისათვის, რომ ნაკრებმა კარგი შედეგები დადოს. ვფიქრობ, რომ საქართველომ კარგი პროექტი წამოიწყო, იპოვა გზა, რომ ერთ-ერთი გამორჩეული ნაკრები ჰყოლოდა არა მხოლოდ კონკრეტულ რეგიონში, არამედ მთელს მსოფლიოში. ბევრი კარგი ფეხბურთელი გყავთ, რამდენიმე მათგანი იტალიაშიც თამაშობს. ამ ფეხბურთელებს იტალიაში უკვე კარგად ვიცნობთ. ვფიქრობ, რომ ამ მხრივ საქართველო დიდ და მნიშვნელოვან სამუშაოს ასრულებს.
თქვენ იტალიაში მოთამაშე ქართველი ლეგიონერები ახსენეთ, სერია ა-ში ამ დროისთვის სამი ქართველი თამაშობს, ხვიჩა კვარაცხელია „ნაპოლიში“, საბა საზონოვი და საბა გოგლიჩიძე „ემპოლიში“, ასევე იტალიაში არიან გიორგი კვერნაძე და ლუკა ლოჩოშვილიც. როგორ ფიქრობთ, ბოლო პერიოდში რატომ დაინტერესდა იტალია ქართველი მოთამაშეებით?
საქართველოში ბევრი კარგი ფეხბურთელია, მიზეზიც სწორედ ესაა. ჩვენ გვსურს, რომ იტალიურ გუნდებში მაღალი დონის მოთამაშეებმა იასპარეზონ. ეს ქართველების შრომის შედეგია, იმედია, რომ სამომავლოდ იტალიაში ჩვენი აკადემიის აღზრდილებიც ითამაშებენ.
როგორ ფიქრობთ, რა პოტენციალი აქვს ქართულ ფეხბურთს? რამდენად არის გაზრდის პერსპექტივა და იმის შანსი, რომ უფრო მეტმა ქართველმა ფეხბურთელმა იასპარეზოს ტოპლიგებში, მაგალითად, სერია ა-ში და თუნდაც ინტერში?
ვფიქრობ, რომ საქართველოში გაწეული თავდაუზოგავი შრომის შედეგად იტალიის ჩემპიონატში სამომავლოდ კიდევ უფრო მეტი კარგი ქართველი ფეხბურთელი გვეყოლება. ეს ნამდვილად ასეა. თუმცა არ არის საჭირო ახალგაზრდა ფეხბურთელები წნეხის ქვეშ მოვაქციოთ. მათ განვითარებისთვის დრო უნდა მივცეთ, თუმცა დარწმუნებული ვარ, რომ სამომავლოდ იტალიაში კიდევ უფრო მეტი კარგი ქართველი ფეხბურთელი ითამაშებს.
და ბოლოს… ევროპის ჩემპიონატზე ეროვნული ნაკრების, ასევე 21-წლამდელთა და ხვიჩა კვარაცხელიას წარმატების შემდეგ საქართველოში ერთგვარი საფეხბურთო ბუმია, ყველას სურს, შევიდეს საფეხბურთო კლუბებში და ფეხბურთში ინვესტიცია ჩადოს. როგორ ფიქრობთ, კიდევ რა ნაბიჯები უნდა გადაიდგას ქართული ფეხბურთისთვის, რა არის საჭირო იმისათვის, რომ ქვეყანაში სპორტის ეს სახეობა კიდევ უფრო მასშტაბური გახდეს და განვითარდეს?
ვფიქრობ, რომ ამ შემთხვევაში ფეხბურთი ოჯახებისა და ზოგადად საზოგადოების ხელშეწყობის ერთგვარ გზად უნდა იქცეს. რა თქმა უნდა, ყველა ოცნებობს, რომ ერთ დღეს კარგი ფეხბურთელი გახდეს, თუმცა ჩვენს საქმეში მნიშვნელოვანი ისაა, რომ სპორტმა ახალგზარდებს სამომავლოდ ბევრი დადებითი თვისება მისცეს. ვფიქრობ, ჩვენი სპორტი ახალგაზრდებს კარგ ადამიანებად ჩამოყალიბებაში უწყობს ხელს. გვჭირდება ბევრი კარგი ახალგაზრდა, ამიტომაც გუნდებმა, როგორც უკვე აღვნიშნე, საგანმანათლებლო და ეთიკური სტრატეგიაც უნდა შეიმუშაონ. იმედი გვაქვს, რომ ბევრი ახალგაზრდა შეძლებს პროფესიონალურ დონეზე ფეხბურთის თამაშს იტალიაში ან თუნდაც საქართველოში, თუმცა უფრო მნიშვნელოვანია კარგი პიროვნებების ჩამოყალიბება, ისეთების, რომლებიც საქართველოს წინსვლას შეუწყობენ ხელს.
