ინდოეთის პრემიერ-მინისტრი, ნარენდრა მოდი, მეზობელ ბანგლადეშში განვითარებულ მოვლენებს ეხმაურება.
დღეს, ინდოეთის დამოუკიდებლობის 78-ე წლისთავისადმი მიძღვნილ ღონისძიებაზე სიტყვით გამოსვლისას ქვეყნის პრემიერ-მინისტრმა მეზობელ სახელმწიფოში ხელისუფლების შეცვლასა და ინდუსებსა და სხვა უმცირესობებზე თავდასხმების შესახებ ისაუბრა და აღნიშნა, რომ ინდოეთს ბანგლადეშში არსებული არეულობა აწუხებს.
,,შეიხ ჰასინას წასვლის შემდეგ გახშირდა თავდასხმები. ამის მიზეზი ისაა, რომ იგი მხარს გვიჭერდა.” – ბანგლადეშის ინდუისტური უმცირესობის წარმომადგენელი.https://t.co/0JdSme62gF
— Euronews Georgia (@EuronewsGeorgia) August 13, 2024
მოდიმ თქვა ისიც, რომ ინდოეთი მეზობლის მხარდაჭერას გააგრძელებს.
„იმედი გვაქვს, რომ ბანგლადეშში ვითარება მალე დასტაბილურდება… ინდოეთს არა ომის, არამედ მშვიდობის სჯერა“მ – აღნიშნა ნარენდრა მოდიმ სიტყვით გამოსვლისას.
5 აგვისტოს ინდოეთში გაიქცა ბანგლადეშის ყოფილი პრემიერ-მინისტრი, შეიხ ჰასინა. თანამდებობიდან გადადგომასა და ქვეყნის დატოვებას წინ რამდენიმე კვირიანი ძალადობრივი საპროტესტო აქციები უძღოდა.
სავარაუდოდ, ჰასინა ბანგლადეშში იქამდე დარჩება, ვიდრე არ გადაწყვეტს, სად მოითხოვს თავშესაფარს.
„როგორც მეზობლებს, ბანგლადეშში განვითარებული მოვლენები გვაწუხებს. ვიმედოვნებ, რომ ვითარება მალე დასტაბილურდება და უზრუნველყოფილი იქნება ინდუსებისა და სხვა უმცირესობების უსაფრთხოება. როგორც მათ კეთილისმსურველებს, იმედი გვაქვს, რომ უახლოეს დღეებში ბანგლადეშის განვითარებაში საკუთარ წვლილს შევიტანთ“, – ამბობს ნარენდრა მოდი.
