მსოფლიოში ყველაზე დიდი ავიამზიდი, „ჯერალდ ფორდი“, რომელიც ვაშინგტონსა და თეირანს შორის დაძაბულობის ფონზე ახლო აღმოსავლეთისკენ მიემართება, უკვე კუნძულ კრეტაზე, შეერთებული შტატების საზღვაო ბაზაზე იმყოფება.
გავრცელებული ცნობებით, ავიამზიდი ბაზაზე საწვავის შესავსებად ოთხი დღის განმავლობაში დარჩება.
ამერიკის შეერთებული შტატების პრეზიდენტი, დონალდ ტრამპი, სამხედრო მოქმედებებით თეირანს არაერთხელ დაემუქრა იმ შემთხვევაში, თუ ირანი შტატებთან ახალ შეთანხმებას არ დადებს.
ტრამპის ადმინისტრაციამ ამერიკის შეერთებული შტატების სამხედრო ძალები ახლო აღმოსავლეთში ბოლო ათწლეულების განმავლობაში უპრეცედენტოდ გაზარდა, რათა ირანი დათმობებზე წასვლას აიძულოს. ეს ყველაფერი მოლაპარაკებების პარალელურად მიმდინარეობს — თეირანის ბირთვულ პროგრამასთან დაკავშირებით ორ ქვეყანას შორის, ომანის შუამავლობით, მიმდინარე მოლაპარაკებების მორიგი რაუნდი ჟენევაში ხუთშაბათსაა ჩანიშნული.
პრეზიდენტმა ტრამპმა გასულ კვირას განაცხადა, რომ ირანის წინააღმდეგ „შეზღუდულ დარტყმებს“ განიხილავს. ამის საპასუხოდ ირანში განაცხადეს, რომ ნებისმიერი დარტყმა თავდასხმად შეფასდება და შესაბამის, „სასტიკ“ პასუხს გამოიწვევს. როგორც ვაშინგტონი, ისე თეირანი მიანიშნებენ, რომ მოლაპარაკებების ჩავარდნის შემთხვევაში ომისთვის მზად არიან.
ისლამური რესპუბლიკა უპრეცედენტო ზეწოლის ქვეშაა მას შემდეგ, რაც გასულ წელს ისრაელმა და ამერიკის შეერთებულმა შტატებმა 12-დღიანი კონფლიქტის დროს თეირანის ბირთვულ ობიექტებსა და მაღალი რანგის სამხედრო ხელმძღვანელობაზე იერიშები მიიტანეს. ამას ემატება დეკემბერსა და იანვარში ჰიპერინფლაციით გამოწვეული მასშტაბური საპროტესტო გამოსვლების ძალადობრივად ჩახშობასთან დაკავშირებული რეაქციაც.
კრეტაზე მდებარე საზღვაო ბაზაზე — US Naval Support Activity Souda Bay — სადაც ამჟამად ავიამზიდი „ჯერალდ ფორდი“ იმყოფება, დაახლოებით 1 000 ადამიანი მუშაობს.
არც საბერძნეთის თავდაცვის სამინისტროს და არც ამერიკის შეერთებული შტატების საელჩოს ათენში ავიამზიდის ბაზაზე ჩასვლის შესახებ ოფიციალური კომენტარი არ გაუკეთებიათ. „ჯერალდ ფორდს“ 75-ზე მეტი სამხედრო თვითმფრინავის გადაყვანა შეუძლია.
ამჟამად ვაშინგტონს ახლო აღმოსავლეთში ათზე მეტი სამხედრო გემი ჰყავს, მათ შორის ერთი ავიამზიდი — „აბრაამ ლინკოლნი“ — და ცხრა გამანადგურებელი.
რეგიონში ერთდროულად ორი ამერიკული ავიამზიდის ყოფნა, რომელთაგან თითოეული ათეულობით საბრძოლო თვითმფრინავსა და ათასობით მეზღვაურს ატარებს, იშვიათია.
გასული წლის ივნისში, როდესაც ისრაელთან ერთად ამერიკის შეერთებულმა შტატებმა 12-დღიანი კონფლიქტისას ირანის სამ ბირთვულ ობიექტზე იერიში მიიტანა, ვაშინგტონს რეგიონში ორი ასეთი გემი ჰყავდა.
