საფრანგეთი და ესპანეთი ირანის ისლამური რევოლუციის გუშაგთა კორპუსის ტერორისტულ ორგანიზაციად გამოცხადებას მხარს უჭერენ. ეს ახალი იმპულსია სიმბოლური ნაბიჯისთვის, რომლის გადადგმაზეც ევროკავშირი უარს დიდი ხნის განმავლობაში ამბობდა.
იდეა დღის წესრიგში ირანში საპროტესტო გამოსვლების ძალადობრივი ჩახშობის შემდეგ დაბრუნდა, თუმცა თავდაპირველად საფრანგეთი და ესპანეთი – ევროკავშირის წევრი ორი დიდი სახელმწიფო – მას სკეპტიკურად უყურებდნენ. ეს კი კითხვის ნიშნის ქვეშ აყენებდა, შეძლებდა თუ არა ევროკავშირი ერთიან პოზიციამდე მისვლას.
ვითარება ოთხშაბათს შეიცვალა – ერთი დღით ადრე, ვიდრე ევროკავშირის საგარეო საქმეთა მინისტრები ამ მწვავე საკითხზე მსჯელობისთვის ბრიუსელში შეიკრიბებოდნენ.
„საფრანგეთი მხარს უჭერს ისლამური რევოლუციის გუშაგთა კორპუსის ევროკავშირის ტერორისტული ორგანიზაციების სიაში შეყვანას“, – განაცხადა ელისეს სასახლემ.
იმას, რომ გადაწყვეტილებას მხარს მადრიდიც დაუჭერს, ესპანეთის საგარეო საქმეთა სამინისტროდან წყაროები ადასტურებენ.
ისლამური რევოლუციის გუშაგთა კორპუსს ბრალად ირანში საპროტესტო გამოსვლების ძალადობრივი ჩახშობის ორგანიზებას, რუსეთისთვის იარაღის მიწოდებას, ისრაელის მიმართულებით ბალისტიკური რაკეტების გაშვებასა და მჭიდრო კავშირებს სდებენ ისეთ შეიარაღებულ მოკავშირეებთან, როგორიცაა „ჰეზბოლა“, „ჰამასი“ და იემენელი ჰუთები.
ამერიკის შეერთებულმა შტატებმა, კანადამ და ავსტრალიამ ისლამური რევოლუციის გუშაგთა კორპუსი ტერორისტულ ორგანიზაციად უკვე გამოაცხადეს. იმავე გადაწყვეტილების მიღებისკენ ევროკავშირს გერმანიამ და ნიდერლანდებმა არაერთხელ მოუწოდეს.
კვირის დასაწყისში მხარდაჭერისკენ გადაიხარა იტალიაც, რომელიც თავდაპირველად ინიციატივის წინააღმდეგი იყო. რომის პოზიციამ შეცვლა მას შემდეგ დაიწყო, რაც ახალი მონაცემები გავრცელდა ირანში პროტესტის სასტიკად ჩახშობის მასშტაბების შესახებ.
ამერიკის შეერთებულ შტატებში დაფუძნებული ადამიანის უფლებათა დამცველი აქტივისტების საინფორმაციო სააგენტოს მონაცემებით, დაღუპულია სულ მცირე 5 777 ირანელი. ორგანიზაცია ცნობას თითოეული დაღუპულის შესახებ ირანში აქტივისტების ქსელის მეშვეობით ამოწმებს. ინტერნეტის გათიშვა კი მონაცემების შეგროვებას მნიშვნელოვნად ართულებს.
ისლამური რევოლუციის გუშაგთა კორპუსის ტერორისტულ ორგანიზაციად გამოცხადება მისი ყველა წევრის აქტივების გაყინვას, ფინანსური მხარდაჭერის აკრძალვასა და სამოგზაურო შეზღუდვების დაწესებას ითვალისწინებს. ევროკავშირის სანქციების ფარგლებში ბევრი მათგანის წინააღმდეგ მსგავსი ზომები უკვე მოქმედებს.
ვარაუდობენ, რომ ისლამური რევოლუციის გუშაგთა კორპუსის შემადგენლობაში დაახლოებით 125 000-დან 190 000-მდე სამხედრო მოსამსახურეა.
საფრანგეთისა და ესპანეთის მიერ პოზიციების ცვლილებამ შესაძლოა სხვა სკეპტიკურად განწყობილი სახელმწიფოებიც დაარწმუნოს და გადაწყვეტილების მიღებას გზა გაუხსნას.
ამჟამად ევროკავშირის ტერორისტულ სიაში 22 დაჯგუფებაა. მათ შორის „ჰამასი“, „ჰეზბოლას“ სამხედრო ფრთა და „ქურთისტანის მუშათა პარტია“.
