დავოსში მსოფლიო ეკონომიკური ფორუმის ფარგლებში გამართულ ღონისძიებაზე აშშ-ის ფინანსთა მინისტრმა სკოტ ბესენტმა ევროპელი ლიდერები გააკრიტიკა. საუბრისას მან განაცხადა, რომ აშშ რვა ევროპულ ქვეყანას 10-პროცენტიან ტარიფს უწესებს, რადგან მათ გრენლანდიაში ჯარები გაგზავნეს. ბესენტმა ევროკავშირს მოუწოდა, დაელოდოს ტრამპის ჩასვლას დავოსში. მისი თქმით, მას მიაჩნია, რომ ევროპელები მხარს დაუჭერენ ტრამპის პოზიციას გრენლანდიასთან დაკავშირებით მას შემდეგ, რაც მის არგუმენტებს მოისმენენ.
„პრეზიდენტს აშკარად სჯერა, რომ ეროვნული უსაფრთხოება ეკონომიკური უსაფრთხოებაა, ხოლო ეკონომიკური უსაფრთხოება — ეროვნული უსაფრთხოება. ჩვენ გრენლანდიას 10-პროცენტიან ტარიფს არ ვუწესებთ. ჩვენ 10-პროცენტიან ტარიფს ვუწესებთ იმ რვა ქვეყანას, რომლებმაც გადაწყვიტეს გრენლანდიაში ჯარები გაეგზავნათ. ნამდვილად ვერ ვხვდები, რას ცდილობდნენ.
ამიტომაც პრეზიდენტმა ტრამპმა მკაფიოდ განაცხადა, რომ ჩვენ არ გადავაბარებთ ჩვენს ეროვნულ უსაფრთხოებას სხვა ქვეყნებს. ჩვენმა პარტნიორმა გაერთიანებულმა სამეფომ გვიმტყუნა დიეგო გარსიაზე მდებარე ბაზის საკითხში, რომელსაც მრავალი წლის განმავლობაში ერთად ვიყენებდით და ახლა მათ სურთ მისი გადაცემა მავრიკისთვის.
„ასე რომ, პრეზიდენტი ტრამპი ამ საკითხში სერიოზულია. ყველას ვეტყოდი: ღრმად ჩაისუნთქეთ. ნუ გამოავლენთ ამ იმპულსურ გაბრაზებას, რასაც ვხედავთ”, – განაცხადა აშშ-ის ფინანსთა მინისტრმა სკოტ ბესენტმა.
ამერიკის პრეზიდენტის, დონალდ ტრამპის ამ განცხადების გამო უოლ-სტრიტის საფონდო ბირჟებზე, ვარდნა თითქმის ყველა სექტორში გამოვლინდა. არსებული შეფასებებით, ზარალი ფართომასშტაბიანი იყო. აშშ-ის ძირითადი საფონდო ინდექსები გასული კვირის დანაკარგებს აგრძელებს, რაც წლის არასტაბილურ დასაწყისზე მიუთითებს.
