ვოლოდიმირ ზელენსკიმ სამშვიდობო გეგმის 20 პუნქტი წარადგინა. უკრაინული მედია იუწყება, ე. წ. საბაზისო დოკუმენტის დეტალები ცნობილი უკრაინის პრეზიდენტის დღევანდელი ბრიფინგიდან გახდა. ზელენსკის განმარტებით, პროექტში წარმოდგენილი ბევრი პოზიცია უკრაინის და აშშ-ის საერთო ხედვას ასახავს.
უკრაინის პრეზიდენტის თანახმად, ძირითადი პუქნტები შემდეგ დებულებებს ითვალისწინებს:
უკრაინის სუვერენიტეტს კვლავ დადასტურებს შეთანხმების ყველა ხელმწომწერი მხარე;
რუსეთსა და უკრაინას შორის გაფორმდება თავდაუსხმელობის სრული და უპირობო შეთანხმება;
უკრაინა ძლიერ უსაფრთხოების გარანტიებს მიიღებს.
ქვეყნის შეიარაღებული ძალების რაოდენობა მშვიდობიან პერიოდში 800 000 სამხედრო იქნება;
ამერიკის შეერთებული შტატები, ნატო და ევროპის ხელმომწერი სახელმწიფოები უკრაინას ნატო-ს მე-5 მუხლის მსგავს უსაფრთხოების გარანტიებს მისცემენ;
რუსეთი ევროპისა და უკრაინის მიმართ თავდაუსხმელობის პოლიტიკას ყველა საჭირო კანონში დაამტკიცებს;
უკრაინა განსაზღვრულ ვადაში გახდება ევროკავშირის წევრი;
უკრაინა გლობალური განვითარების ძლიერ პაკეტს მიიღებს;
შექიმნება რამდენიმე ფონდი უკრაინის ეკონომიკისა აღდგენისა და ჰუმანიტარული საკითხების გადასაწყვეტად – მიზანი 800 მილიარდი დოლარის მოზიდვა იქნება;
უკრაინა დააჩქარებს თავისუფალი ვაჭრობის შეთანხმების პროცესს ამერიკის შეერთებულ შტატებთან;
უკრაინა ადასტურებს, რომ დარჩება არაბირთვულ სახელმწიფოდ;
ზაპოროჟიეს ატომური ელექტროსადგურის მართვას სამი ქვეყანა – უკრაინა, ამერიკის შეერთებული შტატები და რუსეთი ერთობლივად უზრუნველყოფენ, თუმცა დეტალები კვლავ განიხილება;
ორივე ქვეყანა იღებს ვალდებულებას, რომ შექიმნება პროგრამები, რომლებიც ტოლერანტობას ხელს შეუწყობს და რასიზმს აღმოფხვრის;
ტერიტორიების შესახებ პუნქტები შეთანხმებული არ არის. თუმცა, გადაწყვეტის რამდენიმე ვარიანტია: პირველი – დონეცკის, ლუგანსკის, ზაპოროჟიესა და ხერსონის ოლქებში, შეთანხმების თარიღის მიხედვით, ჯარების განლაგების ადგილი დე-ფაქტო კონტაქტის ხაზად იქნება აღიარებული, რომელსაც საერთაშორისო ძალები გააკონტროლებენ, მეორე – დონბასის თავისუფალი ეკონომიკური ზონის შექმნა, რომელიც ამ ზონის დემილიტარიზაციას ითვალისწინებს. უკრაინა ჯარების გაყვანას ეწინააღმდეგება. ეს ვარიანტი რეფერენდუმის ჩატარებას მოითხოვს. ტერიტორიული საკითხი შეიძლება, საბოლოოდ ლიდერების დონეზე გადაწყდეს;
შეთანხმების შემდეგ რუსეთი და უკრაინა იღებენ ვალდებულებას, მომავლში ტერიტორიული მოწყობა ძალის გამოყენებით არ შეცვალონ;
რუსეთი უკრაინას მდინარე დნეპრისა და შავი ზღვის კომერციული მიზნებისთვის გამოყენებაში ხელს არ შეუშლის;
შეიქმნება ჰუმანიტარული კომიტეტი, რომელიც ტყვეებთან, პოლიტპატიმრებსა და ბავშვების დაბრუნებასთან დაკავშირებულ საკითხებსზე იმუშაევებს;
უკრაინამ შეთანხმების ხელმოწერიდან მოკლე ვადაში არჩევნები უნდა ჩაატაროს;
ეს შეთანხმება იურიდიულად სავალდებულო იქნება და მის შესრულებას გააკონტროლებს „მშვიდობის საბჭო“, რომელსაც აშშ-ის პრეზიდენტი, დონალდ ტრამპი უხელმძღვანელებს;
როგორც კი შეთანხმებაზე თანხმობას ყველა მხარე გამოაცხადებს, სრული ცეცხლის შეწყვეტა ამოქმედდება.
როგორც ვოლოდიმირ ზელენსკი აცხადებს, ამ პროექტთან დაკავშირებით რუსული მხარისგან პასუხს დღესვე ელის.
