ისრაელის საელჩო უსამძიმრებს ისრაელში ტერაქტის დროს საქართველოს დაღუპული მოქალაქის ოჯახს. საელჩოს ინფორმაციით, ილია ნოზაძე ისრაელში ნათესავების მოსანახულებლად ჩავიდა, თუმცა 1-ელი ოქტომბრის ღამეს ქალაქ იაფაში მომხდარი სროლისას დაიღუპა.
„ტერორიზმი არავის ინდობს განურჩევლად ეროვნებისა, რელიგიისა თუ ასაკისა. ამ საზარელ მოვლენას, როდესაც პალესტინელმა ტერორისტებმა ცეცხლი გაუხსნეს მოქალაქეებს ისრაელის ცენტრში, თელ-ავივში, შვიდი უდანაშაულო ადამიანი ემსხვერპლა, ცხრა კი დაშავდა“, – წერია საელჩოს განცხადებაში.
როგორც ცნობილია, 1-ელ ოქტომბერს ძველ ქალაქ იაფაში, რომელიც თელ-ავივთან არის გაერთიანებული, უცნობებმა ავტომატური ცეცხლსასროლი იარაღიდან ცეცხლი გაუხსნეს გამვლელებს. ბოლო მონაცემებით, დაღუპულია ექვსი მოქალაქე, ხოლო დაჭრილია – 9, მათგან ოთხის მდგომარეობა კრიტიკულია.
ისრაელის საელჩოს მიერ ფეისბუკზე გამოქვეყნებულ განცხადებაში ვკითხულობთ: „მსოფლიო უნდა გაერთიანდეს ტერორიზმსა და მის წამყვან მხარდამჭერ რეჟიმთან, თეირანის რეჟიმთან, ბრძოლაში“.
