უკრაინის პრეზიდენტი ვოლოდიმირ ზელენსკი კიევისთვის დამატებითი მხარდაჭერის მოპოვების მიზნით პენსილვანიის შტატში საბრძოლო მასალის ქარხანას ეწვია.
რუსებთან გასამკლავებლად კრიტიკულად მნიშვნელოვანი და საჭირო საბრძოლო მასალა ჰაუბიცის ჭურვია. გასული წლის განმავლობაში წარმოება გაიზარდა და კიევს სამ მილიონამდე ჭურვი გადაეცა.
უკრაინის პრეზიდენტი ვოლოდიმირ ზელენსკი ამბობს, რომ მისთვის და მისი გუნდისთვის დიდი პატივია, აქ ყოფნა. ამერიკაში ვიზიტიც მან პენსილვანიის შტატიდან, ამ ქალაქიდან და ამ ქარხნიდან დაიწყო. ზელენსკი მადლობას უხდის იმ 400 თანამშრომელს, რომლებიც მილიონობით უკრაინელის გადარჩენას უწყობენ ხელს.
"დღევანდელი სამყარო არც ერთი ბრძოლის წაგების საშუალებას არ იძლევა, როცა ერთ მხარეს თავისუფლებაა, მეორე მხარეს კი ის, რასაც არასდროს ვუსურვებთ ჩვენს შვილებს“ – განაცხადა უკრაინის პრეზიდენტმა, ვოლოდიმირ ზელენსკიმ.https://t.co/bLKeSRTSlK
— Euronews Georgia (@EuronewsGeorgia) September 23, 2024
ვოლოდიმირ ზელენსკის დატვირთული კვირა ელის. იგი დღეს სიტყვით უნდა გამოვიდეს გაეროს გენერალური ასამბლეის ყოველწლიურ შეკრებაზე. ხვალ იგი შეერთებული შტატების პრეზიდენტ ჯო ბაიდენს შეხვდება, შემდეგ კი – ვიცე-პრეზიდენტ კამალა ჰარისს.
