პარიზი 4400 პარასპორტსმენის მისაღებად ემზადება, რომლებიც 23 სხვადასხვა დისციპლინაში იასპარეზებენ. მათ შორის იქნება საქართველოს დელეგაციაც, რომელსაც რეკორდული რაოდენობის, 14 პარასპორტსმენი ეყოლება, სპორტის 6 სახეობაში. ესენია: პარაჯუდო, პარაწოლჭიმი, პარამძლეოსნობა, პარატაეკვანდო, ეტლით ფარიკაობა და პარასროლა.
„4 წელი როცა ემზადები ამ ერთი შეჯიბრისთვის და მერე უკვე მოდის დრო, რომ უნდა იჭიდაო, ზუსტად ეს წნეხია, რომ აღარ გინდა კიდევ 4 წელი ამის მოლოდინში გაატარო. ამიტომაც ცოტა ისტრესები, მაგრამ, ჩემი აზრით, ბიჭებმა ეს უკვე გადავლახეთ და პრობლემას აღარ წარმოადგენს ჩვენთვის ეს ყველაფერი“,-ამბობს ზურაბ ზურაბიანი, საქართველოს პარაჯუდოკათა ნაკრების წევრი.
გახსნის ცერემონია პარიზში, კონკორდის მოედანსა და ელიზეს მინდვრებზე გაიმართება. ამ შოუზე დასწრება საერთო ჯამში 50 000 ადამიანს შეეძლება, პირველ 15 000 მაყურებელს უფასოდ, ხოლო დანარჩენ 35 000-ს კი ბილეთებით.
„გახსნის ცერემონია ნათლად გვაჩვენებს თუ რამდენად მნიშვნელოვანია პარიზისთვის პირველი პარალიმპიადა. ჩვენთვის ძალიან დიდი გამოწვევა იყო, სულ რაღაც 2 კვირაში გადაწყობა პარალიმპიადისთვის. ეს პარალიმპიური თამაშები აუცილებლად უნდა გახდეს კოლექტიური რეფლექსიის მთავარი წყარო, საიდანაც შეზღუდული შესაძლებლობების მქონე პირებზე გავრცელდება სწორი მესიჯები, რომ ისინი საზოგადეოების სრულფასოვანი წევრები არიან და მათი დისკრიმინაცია დაუშვებელია”,-ამბობს ტონი ეტანგუე პარიზის პარალიმპიადის პრეზიდენტი
ორგანიზატორებს სურთ, რომ ის მუხტი, რაც პარიზის ოლიმპიადამ შექმნა, პარალიმპიადასაც გადაეცეს და უმაღლეს დონეზე ჩატარდეს ყველაფერი.
ის ობიექტები, რომლებიც პარიზის ოლიმპიადისთვის გაკეთდა, პარალიმპიადაზეც იმოქმედებს, თუმცა ამჯერად ყველაფერი პარასპორტსმენებზე იქნება ადაპტირებული.
ვერსალის სასახლე საცხენოსნო ღონისძიებებს უმასპინძლებს, დიდი სასახლე კი ეტლით ფარიკაობას, ხოლო ეიფელის კოშკის ქვეშ, პლაჟის ფრენბურთის მატჩები გაიმართება.
საფრანგეთის შინაგან საქმეთა მინისტრის ჟერალდ დარმანინის განცხადებით, დაახლოებით 25,000 პოლიციელი იზრუნებს პარალიმპიადის უსაფრთხოდ ჩატარებაზე.
