1 მარტიდან აბონენტები სარეკლამო შეტყობინებებს წინასწარი თანხმობის გარეშე აღარ მიიღებენ. ამ ცვლილებას პერსონალურ მონაცემთა დაცვის შესახებ ახალი კანონი ითვალისწინებს, რომელიც საქართველოს პარლამენტმა გასულ წელს მიიღო.
ახალი საკანონმდებლო აქტის მიზანია ხელი შეუწყოს საქართველოს მიერ საერთაშორისო ვალდებულებების შესრულებასა და პერსონალურ მონაცემთა დაცვის სფეროში არსებული კანონმდებლობის ევროპულ სტანდარტებთან დაახლოებას.
რას ითვალისწინებს ახალი კანონი – ამ თემაზე ევრონიუს ჯორჯიას ეთერში პერსონალურ მონაცემთა დაცვის სამსახურის კერძო სექტორზე ზედამხედველობის დეპარტამენტის უფროსმა, არჩილ ჯაველიძემ და პერსონალურ მონაცემთა დაცვის სამსახურის საერთაშორისო ურთიერთობების, ანალიტიკისა და სტრატეგიული განვითარების დეპარტამენტის უფროსმა, ანა თოხაძემ ისაუბრეს.
