თბილისის 2024 წლის ბიუჯეტი მილიარდ 963 მილიონი ლარი იქნება – ეს განცხადება თბილისის მერმა, კახა კალაძემ დედაქალაქის მთავრობის წლის პირველ სხდომაზე გააკეთა.
კალაძემ განმარტა, რომ თბილისის მერიას გარკვეული თანხები წინა წელს დაწყებული სამუშაოებიდან გადმოჰყვა, რომელიც დამატებით შემოსავლებთან ერთად, მთლიანად აისახება მიმდინარე წლის ბიუჯეტში.
კახა კალაძემ ასევე ისაუბრა იმაზე, რომ მიმდინარე თვიდან თბილისის ყველა საჯარო ბაღის 11 188 თანამშრომელი 15%-ით მომატებულ ანაზღაურებას მიიღებს.
მერმა უნებართვო მშენებლობის შესახებაც ისაუბრა და განაცხადა, რომ კულტურული მემკვიდრეობის დამცავ ზონაში უნებართვო მშენებლობის შემთხვევაში, სახელმწიფო ან მუნიციპალიტეტის საკუთრებაში არსებულ უძრავ ქონებაზე ჯარიმა 250 000 ლარი იქნება, ნაცვლად 25 000 ლარისა. როგორც მან თბილისის მერიის მთავრობის სხდომაზე განაცხადა, ეს კანონი ძალაში 11 იანვრიდან შევა.
„მინდა, მოსახლეობას ინფორმაცია მივაწოდო გასული წლის ბიუჯეტთან დაკავშირებითაც. 2023 წელი საკმაოდ წარმატებით დაიხურა, რაც იმას ნიშნავს, რომ ბიუჯეტის შესრულება 95%-მდეა. რაც შეეხება საშემოსავლო ნაწილს, მისი შესრულება დაახლოებით 100 მილიონი ლარით არის გადაჭარბებული. გარდა ამისა, გარკვეული თანხები წინა წელს დაწყებული სამუშაოებიდან გადმოგვყვა, რომელიც დამატებით შემოსავლებთან ერთად, მთლიანად აისახება მიმდინარე წლის ბიუჯეტში. ამ ყველაფრიდან გამომდინარე, 2024 წლის ბიუჯეტი, რომელიც 1 763 000 000 (მილიარდ 763 მლნ) ლარის ოდენობით დამტკიცდა, გახდება 1 963 000 000 (მილიარდ 963 მლნ) ლარი, რაც საშუალებას მოგვცემს, ქალაქისთვის უფრო მეტი მნიშვნელოვანი და წარმატებული პროექტი განვახორციელოთ. პირობას გაძლევთ, რომ 2024 წელი კიდევ უფრო შთამბეჭდავი იქნება ჩვენი ქალაქისთვის. ბევრი საინტერესო პროექტის განხორციელება იგეგმება. ყველა, ვისაც ამ ქალაქის წინსვლა და განვითარება უხარია, ვფიქრობ, ხედავს 2017 წლიდან როგორ იცვლება ჩვენი ქალაქი. რამდენი საინტერესო და მნიშვნელოვანი პროექტი ხორციელდება. ცხადია, ამ სამუშაოებს თან ახლავს გარკვეული დისკომფორტი, მაგრამ სხვანაირად შეუძლებელია“,-განაცხადა კალაძემ.
ალეკო გვეტაძე
