ისრაელის თავდაცვის ძალების ინფორმაციით, ქალაქ ღაზაში მასშტაბური გვირაბების ქსელი აღმოაჩინეს. გვირაბების ქსელი შეხვედრების ოთახებს, სამეთაურო ცენტრებსა და „ჰამასის“ ლიდერთა იაჰია სინვარისა და ისმაილ ჰანიეს საცხოვრებლებსაც მოიცავს. როგორც ისრაელის თავდაცვის ძალები ამბობენ, მიწისქვეშა ინფრასტრუქტურა 20 მეტრის სიღრმეზეა განთავსებული და უზრუნველყოფილია ლიფტით, წყალმომარაგებით, ელექტროენერგიითა და ყველა საჭირო კომუნიკაციით, რომლებიც ამ გვირაბებში დიდი ხნით ყოფნისთვისაა საჭირო. ბეირუთში “ჰამასის” ერთ-ერთმა ლიდერმა პრესკონფერენციაზე განაცხადა, რომ მოლაპარაკება მძევლების გათავისუფლების შესახებ აღარ შედგება.
„ჩვენი პოზიცია ცხადი იყო მუდამ. ყველა მხარეს ვაცნობეთ, რომ ტყვეების საკითხზე მოლაპარაკებას აზრი არ აქვს მანამ, სანამ ისრაელის აგრესია გრძელდება. ამის შესახებ ყველამ იცის და დასამატებელი არაფერი გვაქვს. ახლა ყურადღება გამახვილებულია აგრესიის შეჩერებაზე, განსაკუთრებით იმიტომ, რომ ჩვენმა მტერმა კარგად იცის, რომ ვერცერთ მიზანს ვერ მიაღწევს. მათი ნებისმიერი მცდელობა, დაიბრუნონ ტყვეები, სრულდება იმით, რომ იბრუნებენ ცხედრებს ან მის ნაწილებს. რაც შეეხება მომავალს, ისრაელს მომავალი არ აქვს. მომავალი ჩვენია, პალესტინის მიწაზე ოკუპაციას მომავალი არ აქვს”, – განახადა “ჰამასის” წარმომადგენელმა ოსამა ჰამდანმა.
ისრაელის თავდაცვის ძალების ინფორმაციით, გაიზარდა სამხედრო ოპერაციის არეალი. მხოლოდ ერთ დღეში განადგურდა “ჰამასის” 230 სამიზნე. საჰაერო იერიშები გრძელდება ღაზის სექტორის სხვადასხვა ადგილას, მათ შორის ქალაქ ღაზაში, ხან-იუნისში და რაფაჰში. ისრაელის თავდაცვის ძალების სპიკერის თქმით, სამხედრო ოპერაციის მიმდინარეობისას “ჰამასის” წინააღმდეგ არაერთი მტკიცებულებაა მოპოვებული.
Here’s what IDF troops found in a school in Jabalya following the evacuation of civilians while conducting searches in the area.
— Israel Defense Forces (@IDF) December 21, 2023
This is not the first time Hamas exploited its own people as shields to conceal their terrorist activity. pic.twitter.com/MiN7ptSXaZ
ამერიკის შეერთებული შტატების სახელმწიფო მდივანმა ენტონი ბლინკენმა განაცხადა, რომ ამერიკის შეერთებული შტატების მიზანია, ეს კონფლიქტი ისე დასრულდეს, რომ 7 ოქტომბრის მსგავსი შემთხვევა, როდესაც „ჰამასმა“ ისრაელის წინააღმდეგ მასშტაბური იერიში წამოიწყო, აღარ განმეორდეს. ბლინკენი მიიჩნევს, რომ ყველა დატყვევებულ ოჯახს მალე უნდა დაუბრუნდეს.
“ჩემთვის გასაოცარია ის, რომ მსოფლიოს ბევრი ქვეყანა მოუწოდებს ისრაელს დაასრულოს კონფლიქტი, რაც ჩვენც ძალიან გვინდა, თუმცა ფაქტობრივად, არავინ მიმართავს “ჰამასს”, შეწყვიტოს მშვიდობიანი მოსახლეობის დამალვა, დაყაროს იარაღი და დანებდეს. ომი ხვალვე დასრულდება, თუ “ჰამასი” ამას გააკეთებს. ერთი თვის წინაც, 6 კვირის წინაც დასრულდებოდა, ეს გადაწყვეტილება რომ მიეღო “ჰამასს”. როგორ შეიძლება არ მოუწოდებდე აგრესორს და მხოლოდ მსხვერპლს უყენებდე მოთხოვნებს?” – აღნიშნავს ამერიკის შეერთებული შტატების სახელმწიფო მდივანი.
ამ დროისათვის 129 ისრაელელი რჩება „ჰამასის“ ტყვეობაში. საომარ მოქმედებებს 20 000-ამდე პალესტინელი შეეწირა.
Gaza: The humanitarian system is on the edge of collapse with 2.2M people at risk of immediate peril.
— United Nations (@UN) December 21, 2023
The crisis is also causing socioeconomic setbacks to neighbouring countries.
Urgent measures are needed to end the devastation & suffering. https://t.co/UjXj4Lj6hu via @UNDP pic.twitter.com/T9a2VokN4B
ოფიციალური ინფორმაციით, სახმელეთო იერიშის დაწყების შემდეგ ისრაელის თავდაცვის ძალების 130-ზე მეტი ჯარისკაცია დაღუპული.
