თითქმის მილიონ-ნახევარი ადამიანი იძულებით გადაადგილებულ პირად იქცა ღაზაში მიმდინარე ომის გამო.
ღაზაში ზოგი თავს გაეროს მიერ მართულ დაწესებულებას აფარებს. ხოლო სხვები კი იძულებული არიან, ღამე სკოლებსა და საავადმყოფოებთან ახლოს ქუჩებში გაათენონ. ნებისმიერ შემთხვევაში საკვების დეფიციტია, დაზიანებულია წყლის მომარაგებისა და კანალიზაციის სისტემები, შეზღუდულია წვდომა სასმელ წყალზე. ასეთ პირობებში გაზრდილია ინფექციების რისკი, რომლებიც ტრავმების, ოპერაციებისა და ჭრილობების შედეგად ჩნდება.
ადგილობრივები ამბობენ, რომ სათანადო სველი წერტილები არ არსებობს, რეგიონში საშინელი მდგომარეობაა.
ჯანდაცვის მხრივაც ურთულესი, კატასტროფული ვითარებაა, სიბინძურე და დაავადებები კი ყველაზე მეტად ბავშვებზე მოქმედებს.
Risk of disease spread soars in #Gaza as health facilities, water and sanitation systems disrupted
As deaths and injuries in Gaza continue to rise due to intensified hostilities, intense overcrowding and disrupted health, water, and sanitation systems pose an added danger: the… pic.twitter.com/GdP96i5CCm
— World Health Organization (WHO) (@WHO) November 8, 2023
განსაკუთრებით დიდი საფრთხის წინაშე ორსული ქალები და ახალშობილები არიან. ბოლო ინფორმაციით, ღაზის სექტორში 50 000 ქალი ბავშვს ელოდება, დაახლოებით 337 000 კი 5 წლამდე ასაკის ბავშვია.
ნასერის საავადმყოფოს თანამშრომელი ასაად ალ-ნავაჟა ამბობს, რომ სამშობიარო განყოფილებაში გაორმაგდა სამუშაო ღაზის მოსახლეობის ჩრდილოეთიდან სამხრეთის მიმართულებით გადაადგილების გამო.
ომისა და სტრესის ფონზე გაიზარდა ნაადრევი მშობიარობის შემთხვევებიც.
ჯანმო კი ღაზის სექტორში ჰუმანიტარული დახმარების მყისიერად და დაჩქარებული წესით შეტანას მოითხოვს.
