პარლამენტის რიგგარეშე სხდომაზე, ახალი თავდაცვის კოდექსის მუხლობრივი განხილვა დღესაც გრძელდება, სანამ მას მეორე მოსმენით მიიღებენ. მთავარი მომხსენებელი თავდაცვის მინისტრის მოადგილე გრიგოლ გიორგაძეა, რომელიც დეპუტატების შეკითხვებს ტრიბუნიდან პასუხობს.
მისი განცხადებით, ეს კოდექსი ყველა მიმართულებით აწესრიგებს თავდაცვის კანონმდებლობას, რაც მისივე თქმით ნატოს სტანდარტებთან შესაბამისობაშია. კანონპროექტის ავტორებს მხარს უჭერს მმართველი პარტიაც.
ოპოზიციის წარმომადგენელი დეპუტატები კი აცხადებენ, რომ ყველა ასპექტით ახალი თავდაცვის კოდექსი დისკრიმინაციული, არაეფექტური და რესპრესიულია.
ამ ახალი კოდექსის მისაღებად 40-ზე მეტ კანონში უნდა შევიდეს ცვლილება, რის გამოც პარლამენტში განხილვის პროცესი რამდენიმე დღეა მიმდინარეობს.
თავდაცვის უწყების ცნობით, ახალი „თავდაცვის კოდექსით“:
– იცვლება სავალდებულო სამხედრო სამსახურის ნაკლოვანი სისტემა;
– ძლიერდება ჯარის სოციალური გარანტიები;
– იქმნება რეზერვის მყარი საფუძველი, რაც მნიშვნელოვანია ქვეყნის თავდაცვისუნარიანობისთვის.
– ყველა წვევამდელი შეასრულებს მხოლოდ სამხედრო ფუნქციას და იმსახურებს თავდაცვის ძალებში;
– ნაცვლად მუნიციპალიტეტებისა, გაწვევის ორგანიზებას და ნატოს სტანდარტებით წვრთნას განახორციელებს მხოლოდ თავდაცვის სამინისტრო;
– ყველა წვევამდელი გაივლის ძირითად საწყის საბრძოლო მომზადებას (BCT) და შემდგომ წვრთნებს;
– არსებული 12-თვიანი სავალდებულო სამსახურის ვადა მნიშვნელოვნად მცირდება.
ახალი კოდექსით, სტუდენტებს, მხოლოდ მათი სურვილის შემთხვევაში, არდადეგების პერიოდში ან უქმე დღეების ხარჯზე, წვევამდელთა ეროვნული სამხედრო სამსახური მოხდილად ჩაეთვლებათ:
– თუ სამხედრო წვრთნას გაივლიან ყოველწლიურად, ზაფხულში 1 თვის განმავლობაში, მომდევნო 4 წელი;
– ან გაივლიან 2-წლიან უმცროს ოფიცერთა მომზადების პროგრამას ისე, რომ ხელი არ შეეშლებათ განათლების მიღებაში, ხოლო სწავლის დასრულებისა და ხარისხის მიღების შემთხვევაში, მიენიჭებათ ლეიტენანტის სამხედრო წოდება, აკადემიური ხარისხის ვერ მიღების შემთხვევაში კი – სერჟანტის წოდება;
– ან გარკვეული კრიტერიუმების შესაბამისად, ჩაირიცხებიან უკვე მოქმედ ანაზღაურებად ტერიტორიულ რეზერვში და იმსახურებენ 4 წლის განმავლობაში წელიწადში 45 დღე, რომლის სამი წლის ამოწურვის შემდგომ, წვევამდელთა ეროვნული სამსახური მოხდილად ჩაეთვლებათ. აღნიშნული პირობებით სარგებლობის საშუალება ექნებათ ასევე უმაღლესი განათლების მქონე წვევამდელებს.
ახალი კოდექსით იცვლება გადავადების პირობები:
– აღმოიფხვრება საკანონმდებლო ხარვეზი და გამოირიცხება ფიქტიური „რელიგიური ორგანიზაციების“ არაკეთილსინდისიერი გამოყენება ჯარის თავიდან არიდების მიზნით.
ახალი კოდექსით უმჯობესდება სამხედროების სოციალური გარანტიები მრავალწლიანი სამსახურის დაფასების მიზნით:
– თავდაცვის სამინისტრო ვალდებული იქნება სამხედროთა გარკვეული კატეგორიისთვის, ყოველ სამ წელიწადში ერთხელ, თანადაფინანსებით, უზრუნველყოს საცხოვრებელი ფართების (ბინების) მშენებლობა;
– სამხედროები უზრუნველყოფილი არიან უმაღლესი ხარისხის სამხედრო აღჭურვილობით, საცხოვრებელი პირობებით, კვებით, სამედიცინო დაზღვევით და გაუმჯობესებული სოციალური პირობებით.
ალეკო გვეტაძე
