ჯანდაცვის სამინისტროში, იშვიათი დაავადებების საკითხებზე მომუშავე საკოორდინაციო საბჭოს, შეხვედრა გაიმართა, სადაც აქონდროპლაზიისა და სხვა იშვიათი დაავადებების მკურნალობის სტრატეგიის შემუშავების მიმართულებით იმსჯელეს და დაიწყეს აქონდროპლაზიის მართვის პროტოკოლზე მუშაობა.
საბჭოს წევრებმა, აქონდროპლაზიის სამკურნალო სხვადასხვა მეთოდები განიხილეს. მათ შორის მედიკამენტი ვოსორიტიდი. შეხვედრას ესწრებოდნენ ჯანდაცვის სამინისტროს წარმომადგენლები, ასევე ექსპერტები ამ სფეროში და გაეროსა და ჯანდაცვის მსოფლიო ორგანიზაციის წარმომადგენლები.
შეხვედრის შემდეგ განაცხადეს, რომ პრეპარატი, რომლის შემოტანასაც აქონდროპლაზიის დიაგნოზის მქონე ბავშვების მშობლები უკვე მეოთხე თვეა ითხოვენ და ამ მოთხოვნით აქციებს მართავენ, დანერგვის ადრეულ ეტაპს გადის, შესაბამისად მისი გვერდითი ეფექტების, ასევე გრძელვადიან პერიოდში, მკურნალობის ეფექტურობის შესახებ, მწირი ინფორმაცია მოიპოვება.
ჯანდაცვის სამინისტროს მიერ გავრცელებულ განცხადებაში ნათქვამია:
“ჯანმრთელობის მსოფლიო ორგანიზაციის ოფიციალურ წერილში, რომელიც სამინისტრომ პრეპარატთან დაკავშირებით გამოითხოვა, აღნიშნულია, რომ ვოსორიტიდი არ არის შეყვანილი ჯანმოს ესენციური მედიკამენტების სიაში და შესაბამისად, არ არსებობს საერთაშორისო გაიდლაინები. მწირ ინფორმაციაზე მიუთითებენ ისეთ ქვეყნებში, როგორიცაა გერმანია, ინგლისი და უელსი, სადაც მედიკამენტის შეფასების პროცედურა შეჩერებულია.”
ჯანდაცვის სამინისტროში გამართულ საკოორდინაციო საბჭოზე არ მიუწვევიათ აქონდროპლაზიის დიაგნოზის მქონე პაციენტთა წარმომადგენლები.
ანანო ღუდუშაური
