უკრაინელებისთვის მოდა ყოველთვის მნიშვნელოვანი იყო. უკრაინა არაერთ წარმატებულ მოდის კვირეულს მასპინძლობდა და უკრაინელი დიზაინერების შემოქმედებას ყოველთვის ყურადღებით აკვირდებოდნენ მოდის ინდუსტრიის წარმომადგენლები.
დღეს კი ისინი უკრაინაში მიმდინარე ომს გულმხურვალედ ეხმიანებიან. მსოფლიოში წარმატებული დიზაინერები და მოდის სახლები თავიანთ პოდიუმებს უკრაინელებისთვის სოლიდარობის გამოსახატად იყნებენ.
ერთ-ერთი პირველი ბრენდი, რომელმაც უკრაინას სოლიდარობა გამოუცხადა ,,ბალენსიაგა” აღმოჩნდა. მსოფლიოში ცნობილი მოდის სახლის ქართველმა ხელმძღვანელმა, დემნა გვასალიამ პარიზის მოდის კვირეულზე 2022 წლის ზამთრის კოლექცია წარადგინა.
,,ბალენსიაგას“ შოუ თოვლიანი ქარიშხლის თანხლებით მიმდინარეობდა. იგი დიზაინერმა, უკრაინელების უშიშრობას, გამძლეობას, მშვიდობასა და სიყვარულის გამარჯვებას მიუძღვნეს. წარმმართველი ფერი შავი იყო – გლოვისა და მწუხარების, ალაგ-ალაგ გამონათებული თეთრი სამოსი შავს ანაცვლებდა და სიბნელისა და სინათლის გზაგასაყარზე, ბალენსიგას მოდის სახლის მოდელები თოვლიან გზას მიუყვებოდნენ, როგორც ეს ჭუბერის უღელტეხილზე უკვე მოხდა.
ჯორჯო არმანის მილანის შოუ კი მუსიკის გარეშე ჩაატარა. როგორც თავად დიზაინერმა განაცხადა, ეს გადაწყვეტილება მან უკრაინაში განვითარებული ტრაგედიის გამო მიიღო.
უკრაინელების დასახმარებლად მოდის სახლმა ,,გუჩიმ“ 500,000 აშშ დოლარი გაეროს ლტოლვილთა სააგენტოს გადასცა. ბრენდებმა შანელმა, ლუი ვიტონმა და ჰერმესმა სხვადსხვა ფონდში, უკრაინელი ბავშვებისა და ოჯახების დასახმარებლად მილიონობით ევრო გადარიცხეს, რუსეთში კი ყველა მაღაზია დახურეს და კომერციული საქმიანობა შეაჩერეს.
უკრაინელი ბავშვების დასახმარებლად ქართველი დიზაინერებიც გაერთიანდნენ. დიზაინერ ავთანდილ ცქვიტინიძის ინიციატივით, სხვადასხვა კოლექციის გაყიდვიდან შემოსული თანხა უკრაინელი ბავშვებისთვის გადაირიცხება.
კიდევ ერთი წარმატებული ქართველი დიზაინერი ქეთი ჩხიკვაძე ,,ევრონიუს ჯორჯიას“ პარიზიდან ჩაერთო და უკრაინაში მიმდინარე ომის პარალელურად, მსოფლიოში წამყვანი დიზაინერების გამოხმაურებებზე ისაუბრა.
მოდის სახლებისა და დიზაინერების ერთიანობით მოხერხდა მილიონობით დოლარის შეგროვება უკრაინის მოქალაქეების დასახმარებლად. მოდის ინდუსტრიის წარმომადგენლები სუნთქვაშეკრული ადევნებენ თვალს უკრაინაში მიმდინარე მოვლენებს და იმედს გამოთქვამენ, რომ უკრაინა მომავალშიც უდიდეს წვლილს შეიტანს მსოფლიო მოდის განვითარებაში.
ავტორი: მარიამ ქობულია
