მთავარი კუბი არასამთავრობო ორგანიზაციები "მკვლელი რობოტების" აკრძალვას ითხოვენ

არასამთავრობო ორგანიზაციები “მკვლელი რობოტების” აკრძალვას ითხოვენ

არასამთავრობო ორგანიზაციები და აქტივისტები მოითხოვენ, რომ აიკრძალოს ისეთი შეიარაღების გამოყენება, რომელსაც ფუნქციონირება ადამიანის ჩართულობის გარეშე შეუძლია.

გაეროში რვა წელიწადზე მეტია მიმდინარეობს მსჯელობა, თუ როგორ უნდა დარეგულირდეს ისეთი ავტონომიური ლეტალური იარაღები, რომლებსაც კომპიუტერები და ხელოვნური ინტელექტი მართავს.

ეს საკითხია განხილვის ერთ-ერთი თემა გაეროს კონვენციური იარაღების რიგით მეექვსე კონფერენციაზე, რომელიც 13 დეკემბერს დაიწყო და 17 დეკემბრამდე გაგრძელდება. სწორედ ამ კონფერენციაზე უნდა შეთანხმდნენ მხარეები, არის თუ არა საჭირო ამ საკითხზე საერთაშორისო ხელშეკრულების გაფორმება.

ქვეყნების დიდი ნაწილი და რამდენიმე არასამთავრობო ორგანიზაცია ასეთი შეთანხმების აუცილებლობაზე საუბრობს, თუმცა არიან ქვეყნებიც, რომლებიც თავს იკავებენ, მაგალითად, ამერიკის შეერთებული შტატები, რუსეთი, ისრაელი და ინდოეთი.

ორგანიზაცია “შეაჩერე მკვლელი რობოტები” საზოგადოებაში ამ საკითხზე ცნობიერების ამაღლებაზე მუშაობს.

“იქნება ეს ბრძოლის ველზე, თუ ქალაქში აქციების დროს, მანქანებს არ შეუძლიათ რთული ეთიკური გადაწყვეტილებების მიღება და იმის აღქმა, თუ რამდენად ღირებულია ადამიანის სიცოცხლე. მანქანები ვერ აღიქვამენ კონტექსტს და ვერ იაზრებენ მიღებული გადაწყვეტილებების შედეგებს”, — ვკითხულობთ მათ ვებსაიტზე.

მიმდინარე კონფერენციას გაეროს გენერალური მდივანი ანტონიო გუტერეშიც გამოეხმაურა. მისი თქმით, საჭიროა ავტონომიური ლეტალური რობოტების რეგულირების ამბიციური გეგმა.

“მკვლელი რობოტების” შესახებ საერთაშორისო შეთანხმების მიღწევის მოწოდებით შექმნილია პეტიციაც, რომელსაც ხელი უკვე 17 000-ზე მეტმა ადამიანმა მოაწერა.

უახლესი

სხვა ამბები

Send this to a friend