მთავარი საქართველო საქართველოში გადაადგილებაზე დაწესებული შეზღუდვა ერთი საათით შემცირდა

საქართველოში გადაადგილებაზე დაწესებული შეზღუდვა ერთი საათით შემცირდა

საქართველოში გადაადგილებაზე დაწესებული შეზღუდვა 1 ივნისიდან ერთი საათით შემცირდა.

ეს გადაწყვეტილება უწყებათაშორის საკოორდინაციო საბჭოზე მიიღეს.

შეზღუდვა 23 საათიდან დილის 4 საათამდე მოქმედებს. როგორც საკოორდინაციო საბჭოსთან არსებული ოპერაციული შტაბის უფროსი, გიორგი ღიბრაძე აცხადებს, ეს ფერმერთა მხარდაჭერის მიზნით მოხდა.

ამ ვითარებამ ხელი ფერმერებს სასოფლო-სამეურნეო პროდუქციის ქალაქში ჩამოტანასა და რეალიზებაში უნდა შეუწყოს ხელი.

დღეიდან ასევე სახმელეთო საზღვრებიც იხსნება. კვების ობიექტები კი სტუმრებს, შაბათ-კვირას უკვე დახურულ სივრცეშიც უმასპინძლებენ.

 
საკოორდინაციო საბჭოზე, კორონავისრუსთან დაკავშირებული ვითარებაც განიხილეს. დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, საქართველოში სამხრეთ-აფრიკული შტამის ერთი შემთხვევა დადასტურდა.


“საუბარია B.351 შტამზე, რომელიც დაუდასტურდა საქართველოს ერთ მოქალაქეს მოგზაურობის ისტორიით დუბაიში. მისი კლინიკური მდგომარეობა დამაკმაყოფილებელია, სრულიად განკურნებულია. ოჯახის კონტაქტები გამოკვლეულია და თითოეულის ტესტის პასუხი უარყოფითია. დროულად გადავიდა თვითიზოლაციაში”, – აცხადებს ამირან გამყრელიძე.

ჯანდაცვის მინისტრის მოადგილემ, თამარ გაბუნიამ, მასობრივ ვაქცინაციაზე ისაუბრა. მისი თქმით, სექტემბრისთვის ქვეყანაში ვაქცინის საკმარისი დოზები იქნება იმისათვის, რომ მოსახლეობის 55% აიცრას.

“გეგმის შესრულებისთვის ჩვენ დღეში დაახლოებით 15-16 000 პირი უნდა ავცრათ და ვაქცინების საჭირო რაოდენობა, რომლის მობილიზებაც უნდა გავაკეთოთ არის დაახლოებით 4 მილიონამდე. ევროკავშირი აქტიურად მუშაობს უკვე ჩვენთან იმისთვის, რომ დაიწყოს ვაქცინების გაზიარების მექანიზმის ამოქმედება. ყველაფერი ეს ქმნის უკვე სექტემბრისთვის ვაქცინების საკმარის რაოდენობას იმისათვის, რომ ჩვენ დაახლოებით 55% მოცვა შევძლოთ. დარჩენილი 5%-ის მობილიზებაზეც მიდის მუშაობა და ვფიქრობ, ამ მხრივ პრობლემები არ იქნება”, – განაცხადა თამარ გაბუნიამ.

საბჭოს წევრების განცხადებით, შეზღუდვების კიდევ უფრო მეტად შემსუბუქება ჯერჯერობით არ იგეგმება, რათა ამჟამინდელი ეპიდვითარება შენარჩუნდეს და ტურისტული სეზონის მოახლოებასთან ერთად ინფიცირების დონე არ გაიზარდოს.

მარიამ ქუხილავა

უახლესი

სხვა ამბები

საქართველოშისაქართველოში

Send this to a friend