ისრაელის ციხეებიდან გათავისუფლებული პალესტინელები უკვე ღაზის სექტორში არიან. მათ ექიმები გადაუდებელ სამედიცინო დახმარებას უწევენ. მედიკოსები ამბობენ, რომ გათავისუფლებული პატიმრების ჯანმრთელობის მდგომარეობა რთულია, ზოგიერთ შემთხვევაში კი – კრიტიკულიც.
„დაპატიმრებამდე 127 კილოგრამს ვიწონიდი და დღეს 68 კილოგრამი ვარ. მცემდნენ, რა დროსაც მხარი დამიზიანეს. 8 თვის განმავლობაში ერთი აბი ტკივილგამაყუჩებელი არ მიმიღია. როცა ვეუბნებოდი, რომ ტკივილისგან ვიტანჯებოდი, კვლავ შემოდიოდნენ და მცემდნენ“, – ამბობს პატიმრობიდან გათავისუფლებული პალესტინელი, ქამალ აბუ შანაბი.
პალესტინელი პატიმრების ნაწილს სხეულზე ძალადობის კვალი ეტყობათ. გაეროს 2024 წლის ანგარიშის თანახმად, 7 ოქტომბრის შემდეგ ისრაელმა დააკავა ათასობით პალესტინელი, რომელთაც არ უზრუნველყოფდნენ საკვებით, წყლითა და სამედიცინო დახმარებით. ამავე ანგარიშის თანახმად, ბევრი წამებისა და დამამცირებელი მოპყრობის მსხვერპლი გახდა.
