10 სექტემბერს, თბილისის დროით 22:30 საათზე, აშშ-ის ჰელსინკის კომისიაში განიხილავენ საქართველოს შესახებ მომზადებულ დოკუმენტს სახელწოდებით „პარტნიორიდან პრობლემამდე: საქართველოს ანტიამერიკული გადახვევა“.
ინფორმაცია განხილვის შესახებ თავად აშშ-ის ჰელსინკის კომისიამ გაავრცელა. განცხადებაში ნათქვამია, რომ მოსმენაზე განიხილავენ „საქართველოს ავტორიტარიზმისკენ გადახრის გლობალურ შედეგებს“. ოფიციალურ ვებგვერდზე გამოქვეყნებულ განცხადებაში ასევე წერია, რომ ოდესღაც აშშ-ის პარტნიორ ქვეყანას, საქართველოს, ხელისუფლება რუსეთის ორბიტაზე აბრუნებს.
„დღეს „ქართული ოცნება“ ქვეყანას რუსეთის ორბიტაზე აბრუნებს და ჩინეთსა და აშშ-ის სხვა მოწინააღმდეგეებთან ურთიერთობას აღრმავებს. ბოლო რამდენიმე წლის განმავლობაში „ქართულმა ოცნებამ“ დაშალა საქართველოს ინსტიტუტები და კიდევ უფრო შეარყია საქართველოს სუვერენიტეტი ჩინური ინვესტიციების მოზიდვით. ამავდროულად, აშშ-ის ბიზნესებისთვის შუა დერეფნის ვაჭრობისა და ცენტრალური აზიის იშვიათ მიწათა ელემენტებზე წვდომის დაბლოკვით“, – წერია განცხადებაში.
Georgia was once a core U.S. partner and a beacon of freedom in the Caucasus. Today, the ruling Georgian Dream party is dragging the country back into Russia’s orbit and deepening their relationship with China and other U.S. adversaries. (1/2) https://t.co/KLOcWtKxHR
— U.S. Helsinki Commission (@HelsinkiComm) September 8, 2025
ჰელსინკის კომისია ასევე წერს, რომ განიხილავენ „მეგობარი აქტის“ მიღების საკითხსაც.
„ეს მოსმენა განიხილავს საქართველოს ავტორიტარიზმისკენ გადახრის გლობალურ შედეგებს. ასევე განიხილება აშშ-ის მიერ გასატარებელი პოლიტიკა, მათ შორის „მეგობარი აქტის“ მიღების საკითხიც, რათა შეერთებული შტატები დაეხმაროს ქართველ ხალხს აშშ-თან ხანგრძლივი, ორმხრივად სასარგებლო ურთიერთობების შენარჩუნებაში“, – ნათქვამია ჰელსინკის კომისიის განცხადებაში.
ჰელსინკის კომისიაზე მოუსმენენ საქართველოს მე-5 პრეზიდენტს, სალომე ზურაბიშვილს, საქართველოს თავდაცვის ყოფილ მინისტრს, თინათინ ხიდეშელსა და „ჰადსონის ინსტიტუტის“ უფროს მკვლევარ ლუკ კოფის.
