უკრაინული სამხედრო დანაყოფის „სპარტანის“ ჯარისკაცები წვრთნებს ყოველდღიურად ატარებენ. ვარჯიში უმეტესად დონეცკის აღმოსავლეთ რეგიონის პოკროვსკის რაიონში მიმდინარეობს – ეს ადგილი ამჟამად ბრძოლის ეპიცენტრია.
ქალაქი, სადაც ოდესღაც დაახლოებით 60 000 ადამიანი ცხოვრობდა, თვეების განმავლობაში რუსეთის მხრიდან განუწყვეტელი თავდასხმების სამიზნე იყო.
„მისიები გვაქვს პოკროვსკის სექტორში. დინამიკა იგივეა, როგორიც ადრე იყო. ჩვენ წარმატებით ვასრულებთ დავალებებს. რუსები კვლავ ცდილობენ თავდასხმას, მაგრამ ჩვენ ისევ ვუტევთ. მათი დანაკარგი საკმაოდ დიდია“, – ამბობს ივან პოპოვი „სპარტანის” დანაყოფის მეთაურის მოადგილე.
რუსებმა პოკროვსკის გარშემო შექმნეს ე.წ. „ჯიბე“, იგივე ალყა, თუმცა უკრაინელი სამხედროები ქალაქს კვლავ აკონტროლებენ. შესაბამისად, საცხოვრებელ ტერიტორიაზე ბრძოლა ჯერ არ დაწყებულა.
გავრცელდა ინფორმაცია ქალაქში რუსი დივერსანტების შესვლის შესახებ, თუმცა როგორც სამხედროები ამბობენ, ეს ჯგუფები განეიტრალებულია.
„ჩვენ პერსონალს იმის მიხედვით ვამზადებთ, თუ რამდენი ჯარისკაცია მობილიზებული წვრთნისთვის. ეს ნიშნავს, რომ მათი ჩამოსვლიდან ორი კვირა მუშაობა სავალდებულოა. მაშინაც კი, თუ ადაპტაციის კურსი არ გვაქვს, მაინც ვატარებთ მათთვის წვრთნებს. ჩვენ მუდმივად ვაუმჯობესებთ მათ უნარებს. ჯარისკაცებმა ყოველთვის უნდა განაგრძონ სწავლა და სცადონ საკუთარი უნარების გაუმჯობესება – ეს გადაარჩენს როგორც მათ, ისე თანამებრძოლების სიცოცხლეს“, – ამბობს ივან პოპოვი „სპარტანის” დანაყოფის მეთაურის მოადგილე.
საწვრთნელ პოლიგონზე, რომელიც ფრონტიდან მხოლოდ 45 კილომეტრის დაშორებით მდებარეობს, ყველაფერი ისეა მოწყობილი, თითქოს რეალური ბრძოლაა.
35 წლის ჯარისკაცი, მეტსახელად „კომრადი“, არმიას ახლახან შეუერთდა. ის არ ფიქრობს, რომ ომი მალე დასრულდება.
„შიში ნორმალურია. რაც შეეხება მოტივაციას, უკან დასახევი გზა არ არსებობს. თუ ჯარში ხარ, უნდა იბრძოლო. თუ უკვე აქ ვართ, უნდა დავიცვათ მშვიდობიანი მოსახლეობა და ასევე ერთმანეთი. ჩვენ ყოველთვის მზად ვართ ექსტრემალური სიტუაციებისთვის, ამიტომ ჩვენი სხეული ავტომატურად პასუხობს საფრთხეს. იქამდე ვხვეწთ ჩვენს უნარებს, სანამ ინსტინქტებად არ ჩამოგვიყალიბდება. შეიძლება ომის დროს დადგეს ისეთი მომენტი, რომ ფიქრის დრო აღარ გვქონდეს. ამ დროს მხოლოდ ვარჯიშის დროს გამომუშავებული უნარები დაგვეხმარება“, – ამბობს „კომრადი” დანაყოფ „სპარტანის” სამხედრო მოსამსახურე.
საერთო ჯამში უკრაინის ძალები ინტენსიურ ბრძოლაში არიან ჩართული 1000-კილომეტრიან ფრონტის ხაზზე, რომელიც უკრაინის ჩრდილო-აღმოსავლეთიდან სამხრეთ-აღმოსავლეთამდეა გადაჭიმული.
ამ მომენტში პოკროვსკის რაიონი ყველაზე მეტად ზარალდება, რადგან რუსეთი მეზობელ დნეპროპეტროვსკის რეგიონში ცდილობს შეჭრას.
უკრაინას, სამწუხაროდ, არ ჰყავს იმდენი სამხედრო, რამდენიც მას სჭირდება.
