აქციებისას დაკავებულ დავით ლომიძესა და თემურ ზასოხაშვილს 4 წლითა და 6 თვით პატიმრობა მიესაჯათ. გადაწყვეტილება მოსამართლე ნინო გალუსტაშვილმა მიიღო.
თბილისის საქალაქო სასამართლოში დღეს ამ საქმეზე ჩანიშნულ სხდომაზე ბრალდებულებმა ვრცელ საბოლოო სიტყვაზე უარი თქვეს. ნაცვლად ამისა, მათ სასამართლოს სთხოვეს, ობიექტურად განეხილა საქმე და სამართლიანი გადაწყვეტილება მიეღო. ბრალდებულებმა თქვეს ისიც, რომ თავს უდანაშაულოდ მიიჩნევენ.
დავით ლომიძე და თემურ ზასოხაშვილი გასული წლის პირველ დეკემბერს დააკავეს. პროკურატურა მათ პარლამენტთან მიმდინარე საპროტესტო აქციაზე შინაგან საქმეთა სამინისტროს განსაკუთრებულ დავალებათა დეპარტამენტის თანამშრომლების მიმართულებით „მოლოტოვის კოქტეილების“ სროლას ედავებოდა.
საგამოძიებო უწყების თანახმად, დავით ლომიძისა და თემურ ზასოხაშვილის ქმედების შედეგად შინაგან საქმეთა სამინისტროს წყლის ჭავლის მანქანა დაზიანდა.
ბრალდებულთა უფლებადამცველები აღნიშნავენ, რომ განაჩენი უკანონოა და თბილისის საქალაქო სასამართლოს გადაწყვეტილებას სააპელაციო საამართლოში აუცილებლად გაასაჩივრებენ.
„სიმართლე გითხრათ, გამამტყუნებელი განაჩენის მოლოდინი გვქონდა. იქიდან გამომდინარე, რომ სასამართლო აღნიშნულ საქმეებზე პრეცენდენტს არ დაუშვებს. სამწუხაროა, რადგან სასამართლო, და ზოგადად მართლმსაჯულება, კანონის უზენაესობას უნდა ეყრდნობოდეს, თუმცა დღეს კანონის უზენაესობაზე საუბარი ზედმეტია. მოსამართლემ შაბლონურად გამოიტანა გადაწყვეტილება, როგორც სხვა პოლიტიკურ საქმეებზე, და აქაც სასჯელის სახით 4 წელი და 6 თვე გამოიყენა. უდავოდ გავასაჩივრებთ გადაწყვეტილებას სააპელაციო სასამართლოში. ბოლომდე მივყვებით.
დღეს მოსამართლემ განმარტა, რომ მსჯავრდებულებს შეწყალებაზე მიმართვის უფლება აქვთ, თუმცა მათ საკუთარი პოზიცია დააფიქსირეს და თქვეს, რომ არ აპირებენ შეწყალების თაობაზე პრეზიდენტს მიმართონ.
ეს განაჩენი უკანონოა. გარკვეულ ვადაში ჩაგვბარდება დასაბუთებული განაჩენი – ფორმალურად ქვია დასაბუთებული, თორემ პირობას ვიძლევი, რომ შეუძლებელია – მოსამართლე უბრალოდ ვერ დაასაბუთებს ამ ბრალდებას, რადგან ამ სისხლის სამართლის საქმეში არ არსებობს არცერთი პირდაპირი მტკიცებულება, რომელიც გონივრულ ეჭვს მიღმა დაადასტურებდა ჩვენი დაცვის ქვეშ მყოფების ბრალეულობას“, – განაცხადა დავით ლომიძის ადვოკატმა, დიმიტრი ვარდიაშვილმა განაჩენის გამოცხადების შემდეგ.
ეს ნინო გალუსტაშვილის მესამე განაჩენია აქციებისას დაკავებულთა საქმეზე. მანვე მიიღო გადაწყვეტილება მათე დევიძისა და გიორგი მინდაძის საქმეებზეც და მათ 4.5 და 5 წლით პატიმრობა მიუსაჯა.
