46 სხდომა, 139 გამოკითხული პირი და 8 დაკავებული პოლიტიკური ოპონენტი – ეს არის „ქართული ოცნების“ ინიციატივით შექმნილი დროებითი საგამოძიებო კომისიის შვიდთვიანი მუშაობის სტატისტიკა. დასკვნით სხდომაზე ერთხმად დამტკიცდა 430-გვერდიანი დოკუმენტი.
მისი შინაარსი უცნობი დარჩება სექტემბრამდე, ვიდრე დოკუმენტი პარლამენტს პლენარული სხდომისთვის წარედგინება.
კომისიის თავმჯდომარის, თეა წულუკიანის აზრით, საჭიროა, დასკვნა წიგნის სახით დაიბეჭდოს და „სულ მცირე, ინგლისურ ენაზე ითარგმნოს“. ის ასევე იმედოვნებს, რომ კომისიის დასკვნას „განსაკუთრებით ახალგაზრდები“ წაიკითხავენ.
„პარლამენტს აქვს ამის შესაძლებლობა, შესანიშნავი სტამბა, თანამშრომლები. კარგი იქნებოდა, პლენარული სხდომისთვის გარეგნულად სამუშაო ვერსიით კი არა, არამედ, მაგალითად, დასტამბული, წიგნის სახით, დიზაინერი რომ თავის წვლილს შეიტანს, ასეთი ფორმით შევთავაზოთ თითოეულ ჩვენს კოლეგას. პლენარული სხდომის მერე დავბეჭდოთ მეტიც, იმისთვის, რომ განსაკუთრებით ახალგაზრდებმა წაიკითხონ“, – განაცხადა თეა წულუკიანმა.
დროებითი კომისიის დასკვნით სხდომაზე მისმა წევრებმა თავმჯდომარეს მადლობა არაერთხელ გადაუხადეს. შემდეგ შეფასდა დასკვნითი დოკუმენტის შინაარსიც.
„ეს დასკვნა ნამდვილად ისტორიული იქნება, მისი შინაარსისა და არქიტექტურის მიხედვით… ამ ყველაფრის საფუძველი იყო ქალბატონი თეა წულუკიანის მაღალი პროფესიონალიზმი და დიდი გამოცდილება, რისთვისაც მას ძალიან დიდი მადლობა მინდა გადავუხადო“, – თქვა ილია ინჯიამ, დროებითი კომისიის წევრმა.
„მართლაც, უზარმაზარი მნიშვნელობა ჰქონდა ჩვენი კომისიის თავმჯდომარის უზარმაზარ გამოცდილებას. ძალიან მიხარია, ასეთი ტიპის დასკვნების სტანდარტმა აიწია. ჩვენ შემდეგ ვინც გააკეთებს ასეთ რაღაცას, ამაზე ქვემოთ აღარ ჩამოვა. თამასა უკვე მაღლა არის აწეული. სამართლებრივი და პოლიტიკური კულტურის განვითარებისთვის ეს დიდი მნიშვნელობის მქონეა…“ – ამბობს დროებითი კომისიის წევრი, თენგიზ შარმანაშვილი.
„ქართული ოცნებისთვის“ დროებითი საგამოძიებო კომისიის იდეა, საქმიანობა და დასკვნა „ისტორიული“ აღმოჩნდა, ოპოზიციისთვის კი სახელმწიფოს წინაშე „ღალატის ტოლფასი“.
„ეს კომისია საქართველოს ისტორიის რუსული ვერსიით გადაწერის მცდელობის ბინძური კომისიაა. ეს არის კომისია, რომელიც მიზნად ისახავდა არა მხოლოდ საქართველოს დადანაშაულებას ომში, არამედ იმდროინდელი უმაღლესი მთავარსარდლის – მიხეილ სააკაშვილის დადანაშაულებას, რომელიც სწორედ პუტინის დაკვეთით დღესაც იხდის სასჯელს იმისთვის, რომ მან შექმნა თანამედროვე, წარმატებული ქართული სახელმწიფო და ეს სახელმწიფო არ დაუთმო მტერს 2008 წელს…“ – განაცხადა „ერთიანი ნაციონალური მოძრაობის“ თავმჯდომარემ თინა ბოკუჩავამ.
დროებით კომისიას თავდაპირველად 3 თვის განმავლობაში უნდა ემუშავა, თუმცა, ყოველგვარი წინააღმდეგობის გარეშე პარლამენტმა კომისიის უფლებამოსილება სამჯერ გაახანგრძლივა. კომისიაში ოპოზიციის სტატუსით ჩაერთო „ხალხის ძალა“ – პარტია, რომელიც საკანონმდებლო ორგანოში „ქართული ოცნების“ საარჩევნო სიით მოხვდა და მოგვიანებით მას გამოეყო.
გარდა უფლებამოსილების ვადისა „ქართული ოცნების“ ინიციატივით შექმნილმა კომისიამ შეიცვალა გამოსაძიებელ საქმეთა ნუსხაც. თავდაპირველად მმართველმა პარტიამ მიზნად დაისახა ყოფილი ხელისუფლების, „ნაციონალური მოძრაობის“ საქმიანობის შესწავლა. მოგვიანებით გამოძიება შეეხო 2012 წლის შემდეგ არსებულ პერიოდს – სამიზნედ კი იქცნენ „ქართული ოცნების“ ოპონენტები, მათ შორის ყოფილი თანაგუნდელები, მაგალითად, ყოფილი პრემიერ-მინისტრის, გიორგი გახარიას სახით. კომისიამ ის ორჯერ გამოჰკითხა – 2019 წლის 20 ივნისისა და „ჩორჩანას საგუშაგოს“ საქმეებზე.
კომისიამ დაიბარა სხვა ოპოზიციონერი პოლიტიკოსებიც, თუმცა სხდომაზე გამოუცხადებლობისთვის მათ გირაო შეეფარდათ. კანონით დადგენილ ვადებში გირაოს გადახდას მათგან რამდენიმე დასთანხმდა, თუმცა საბოლოოდ სასამართლომ რვავე ოპოზიციონერ პოლიტიკოსს პატიმრობა შეუფარდა და ორი წლით აუკრძალა საჯარო თანამდებობის დაკავება.
შვიდთვიანი მუშაობის ფარგლებში კომისიას არც გამოუკითხავს და არც დაუბარებია „ნაციონალური მოძრაობის“ ხელისუფლების მინისტრები – გრიგოლ ვაშაძის, ზურაბ ნოღაიდელისა და ირაკლი ოქრუაშვილის გარდა. ეს კი იმის მიუხედავად, რომ კომისიის წევრები „სამართლიანობის აღდგენის მოტივით“ დებდნენ ყველა პასუხისმგებელი პირის გამოკითხვის პირობას.
კომისიის საქმიანობამ არაერთგვაროვანი დამოკიდებულება გამოიწვია საზოგადოებაშიც. 2008 წლის აგვისტოს ომთან დაკავშირებით სხდომებზე გაკეთებულმა განცხადებებმა მოქალაქეთა დიდი ნაწილი ქუჩაში გამოიყვანა მთავარი გზავნილებით – „ნაომარი ქვეყანა ბოდიშს არ იხდის!“ და „ანწუხელიძე უკვდავია!“
