უკრაინაში სამი დღეა, საპროტესტო აქციები იმართება. დემონსტრაციები მას შემდეგ დაიწყო, რაც უკრაინის რადამ მიიღო სადავო კანონი, რომელიც გენპროკურატურას ქვეყნის ორი უმთავრესი ანტიკორუფციული სააგენტოს საქმიანობის ზედამხედველობის უფლებამოსილებას ანიჭებს.
კრიტიკოსთა აზრით, ეს სააგენტოების დამოუკიდებლობას შეასუსტებს და გამოძიების პროცესზე პრეზიდენტის გარემოცვის ზეგავლენას გააძლიერებს.
„ეს იმიტომ არ ხდება, რომ ჩვენ ზელენსკის წინააღმდეგი ვართ და არც იმიტომ, რომ მთავრობის ყველა წევრის გადაყენება გვსურს. ეს მხოლოდ იმიტომ ხდება, რომ ჩვენი ანტიკორუფციული ინსტიტუტები: უკრაინის ეროვნული ანტიკორუფციული სააგენტო და სპეციალიზებული ანტიკორუფციული ოფისი ან სხვა სამთავრობო უწყებები ქვეყნის დამოუკიდებლობისა და გამარჯვებისთვის მნიშვნელოვანია. ყველაფერ ამასთან ერთად, სრული პროპაგანდაა, რომ ჩვენ მთავრობის დაშლას ვცდილობთ. აქ ვრჩები, რადგან ჩემი ქვეყანა და მისი მომავალი ჩემთვის მნიშვნელოვანია“, – ამბობს დემონსტრანტი, მიკოლა ბეზკროვნი.
მასშტაბურმა საპროტესტო აქციებმა მოიცვა დედაქალაქი კიევი, ასევე, ლვივი, ხარკივი და სხვა ქალაქები. ვითარების განმუხტვისთვის, უკრაინის პრეზიდენტმა, ვოლიდიმირ ზელენსკიმ ახალი კანონპროექტი წარადგინა, რომელშიც, მისი თქმით, ეროვნული ანტიკორუფციული სააგენტოსა და სპეციალიზებული ანტიკორუფციული პროკურორის ოფისის დამოუკიდებლობა გარანტირებული იქნება.
მიუხედავად ამისა, ქუჩაში პროტესტი გრძელდება. დემონსტრანტების თქმით, არ დაიშლებიან იქამდე, სანამ უკრაინის პარლამენტი ახალ კანონპროექტს არ მიიღებს და მას ვოლოდიმირ ზელენსკი ხელს არ მოაწერს.
ჯერჯერობით უცნობია პარლამენტში კენჭისყრის თარიღი.
